ដោយ៖​ ស៊ុន​ ណារិន​ | ថ្ងៃសុក្រ ទី18 កញ្ញា 2015
http://vodhotnews.com

អដ្ឋិធាតុរបស់លោក ជា ស៊ីម កំពុង​​ត្រូវ​បាន​ដង្ហែទៅតម្កល់នៅខេត្ត​ព្រៃវែង នៅព្រឹកថ្ងៃ​សុក្រនេះ (រូបថតដោយ ​ទេព សូនី)

អដ្ឋិធាតុរបស់​អតីតប្រធាន​ព្រឹទ្ធសភា​ លោក ជា ស៊ីម នៅព្រឹកថ្ងៃ​សុក្រនេះ ត្រូវបាន​​ដង្ហែចេញពីគេហដ្ឋាន​នៅរាជធានីភ្នំពេញ យក​ទៅ​តម្កល់នៅខេត្ត​ព្រៃវែងដែល​ជា​ស្រុកកំណើ​ត​របស់លោក។​

​កាលពីថ្ងៃ​ព្រហស្បតិ៍ដែល​​ជា​​បុណ្យខួបគម្រប់១០០ថ្ងៃ ក្រុមគ្រួសារសព​បាន​រៀ​បចំ​ពិធី​ ដើម្បីឧទ្ទិសកុសលជូនដល់ដួងវិញ្ញាណក្ខន្ធ​របស់​លោក ជា ស៊ីម​ អតីតប្រធានគណបក្ស​ប្រជាជនកម្ពុជា។​

នៅព្រឹកថ្ងៃសុក្រនេះ អដ្ឋិធាតុ​ត្រូវ​បាន​ដង្ហែ​ចេញពីគេហដ្ឋាននៅចំការមន​ឆ្ពោះទៅកាន់​ស្រុកកំណើត​របស់លោកក្នុង​​ភូមិ​កន្លែង​ជ្រៅ ឃុំក្របៅ​ ស្រុកកំចាយ​មារ ខេត្តព្រៃវែង។ នៅ​តាម​ផ្លូវ​មាន​សមត្ថកិច្ច​យាម​កាម​និង​សម្រួ​ល​ចរាចរណ៍​ជា​បន្ត​បន្ទាប់​។​

សេចក្តីជូនដំណឹង​របស់​សាលារាជធានីភ្នំពេញ​ឲ្យ​ដឹង​ថាកំណាត់​ផ្លូវ​នរោត្តម​ចាប់​ពីស្តុបក្រសួង​មហាផ្ទៃ​រហូត​ដល់​ស្តុប​ព្រះអង្គ​ឌួង ផ្លូវ​ក្រមួន​សរ កំណាត់មហាវិថី​ព្រះមុនីវង្ស​ចាប់ពីស្តុប​BKC​រហូត​ដល់​មុខ​ស្ថាន​ទូត​បារាំង ឆ្លងកាត់ស្ពា​នជ្រោយ​ចង្វារ​និង​ផ្លូវ​ជាតិ​លេខ​៦អា រួច​បទស្តាំ​ឆ្លង​កាត់ស្ពាន​ព្រែក​តាមាក់។

​គួរបញ្ជាក់​ថា ប្រធាន​គណបក្ស​ប្រជាជន​កម្ពុជា និង​ជា​ប្រធានព្រឹទ្ធសភា​លោក ជា ស៊ីម បាន​ទទួលមរណភាព​កាលពី​ម៉ោង​៣ និង​៤៥​នាទី រសៀល​ថ្ងៃ​ទី​៨ ខែមិថុនា ក្នុង​ជន្មាយុ​៨៣​ឆ្នាំ ដោយ​រោគាពាធ៕

រូបថត​ដោយ​ទេព សូនី

រូបថត​ដោយ​ទេព សូនី

សរសេរមកកាន់លោក ស៊ុន ណារិន តាមរយៈsun_narin@vodhotnews.com