ដោយ៖ ស៊ុន ណារិន | ថ្ងៃសុក្រ ទី18 កញ្ញា 2015
http://vodhotnews.com
មន្រ្តីក្រសួងបរិស្ថានឲ្យដឹងថាក្រសួងបានបញ្ចប់សេចក្តីព្រាងច្បាប់ស្តីពីការវាយតម្លៃហេតុប៉ះពាល់ប៉ះរិស្ថាន ប៉ុន្តែមិនទាន់បញ្ជូនទៅទីស្តីការគណៈរដ្ឋមន្រ្តីនៅឡើយទេ ដោយរង់ចាំក្រមបរិស្ថានមួយទៀតដែលក្រសួងកំពុងតែរៀបចំ។
នាយកខុទ្ទកាល័យនិងជាអ្នកនាំពាក្យក្រសួងបរិ
ក្រសួងបរិស្ថាននឹងបញ្ជូនសេចក្តីព្រាងច្បាប់ទាំងពីរនេះទៅទីស្តីការគណៈរដ្ឋមន្រ្តីនិងរដ្ឋសភា ដើម្បីអនុម័ត ដោយរំពឹងថានឹងអនុម័តរួចរាល់នៅក្នុងឆ្នាំ២០១៧។ នេះបើតាមអ្នកនាំពាក្យក្រសួងបរិស្ថាន។
អ្នកសម្របសម្រួលគម្រោងកំណែទម្រង់ដីធ្លីនៃមជ្ឈមណ្ឌលសិទ្ធិមនុស្សកម្ពុជា លោក វណ្ណ សូផាត មានប្រសាសន៍ថាកន្លងទៅលោកឃើញមានច្បាប់ច្រើនទាក់ទងនឹងការវាយតម្លៃហេតុប៉ះពាល់បរិស្ថាន តែលោកថាការអនុវត្តមិនបានល្អ ដែលនាំឲ្យប្រជាពលរដ្ឋរងគ្រោះនិងប៉ះពាល់បរិស្ថាន។ លោកបញ្ជាក់ថា៖ “ការបង្កើតច្បាប់ច្រើនវាល្អ សំខាន់ការអនុវត្តនោះវិញទេ។ ប្រជាពលរដ្ឋរងគ្រោះ ដោយរងការចោទថារំលោភដីក្រុមហ៊ុន។ អញ្ចឹងច្បាប់វាប្រសើរហើយ តែសំខាន់ធ្វើយ៉ាងម៉េចបម្រើប្រជាពលរដ្ឋនិរក្សាបរិស្ថានពិតប្រាកដ”។
លោកបន្តថាការវាយតម្លៃលើដីសម្បទានសេដ្ឋកិច្ចនិងការវាយតម្លៃលើការស្ថាបនាទំនប់វារីអគ្គិសនីមិនទាន់ធ្វើបានល្អនៅឡើយទេ។ ដីសម្បទានសេដ្ឋកិច្ចជាង៧០ភាគរយមិនទទួលបានការប្រឹក្សាពីមូលដ្ឋានលើការប៉ះពាល់ដល់ការរស់នៅរបស់ប្រជាជននិងផលប៉ះពាល់បរិស្ថាននោះទេ។ នេះបើតាមការអះអាងរបស់លោក វណ្ណ សូផាត។
បើតាមរបាយការណ៍របស់លោក វណ្ណ សូផាត រហូតដល់ឆ្នាំ២០១១ លោកកត់ត្រាថាប្រជាពលរដ្ឋជាង៣០ម៉ឺននាក់រងផលប៉ះពាល់ដោយសារការផ្តល់ដីសម្បទានសេដ្ឋកិច្ច ប៉ុន្តែលោកថាចំនួននេះកើនឡើងរហូតមកដល់ពេលនេះ ដោយសារការផ្តល់ដីសម្បទានសង្គមកិច្ច។
នាយខុទ្ទកាល័យក្រសួងបរិស្ថាន លោក ស្រ៊ុន ដារិទ្ធិ ប្រាប់វីអូឌីថារដ្ឋាភិបាលបានសម្រេចកាត់បន្ថយរយៈពេលវិនិយោគលើដីសម្បទានសេដ្ឋកិច្ចពី៧០ឆ្នាំឬ៩០ឆ្នាំ មកត្រឹម៥០ឆ្នាំទាំងអស់។ លោកបន្តថាក្រសួងបរិស្ថានបានវាយតម្លៃក្រុមហ៊ុនដីសម្បទានសេដ្ឋកិច្ចចំនួន១១៣ដែលមានផ្ទៃដីសរុប៦១០២៩៦,៧៥ហិកតាដែលក្នុងនោះ គម្រោង២៣(ផ្ទៃដីសុរប៩០៦៨២ហិកតា)ត្រូវបានរដ្ឋាភិបាលសម្រេចដកហូតសិទ្ធិវិនិយោគ គម្រោង៤(ផ្ទៃដី១៥៧៩៩ហិកតា)ត្រូវបានកាត់បន្ថយទំហំផ្ទៃដី វិនិយោគនិងគម្រោងចំនួន២០(ផ្ទៃដីសរុប១៣១៧១៧,៧៥ហិកតា)ត្រូវបានរដ្ឋាភិបាលទុកពេលឲ្យ៦ខែទៅ១ឆ្នាំ ដើម្បីបន្តនីតិវិធី(ស្ថិតនៅក្រោមការតាមដាន)ហើយគម្រោងចំនួន៤១(ផ្ទៃដីសរុបជិត២០ម៉ឺនហិកតា)ត្រូវបានរដ្ឋាភិបាលសម្រេចឲ្យបន្តអនុវត្តគម្រោង ដោយកាត់បន្ថយរយៈពេលនៃកិច្ចសន្យាមកត្រឹម៥០ឆ្នាំ។
លោក ស្រ៊ុន ដារិទ្ធិ មានប្រសាសន៍ថាជាគោលការណ៍រដ្ឋាភិបាលមិនសិទ្ធិបន្ថយរយៈពេលនៃការវិនិយោគ ដោយមិនមានការផ្តល់សំណងអ្វីឡើយ បើទោះជាមានការតវ៉ាក៏ដោយ។ លោកបញ្ជាក់ថា៖ "(ការសម្រេចកាត់បន្ថយវិនិយោគដីមកត្រឹម៥០ឆ្នាំ) ការសម្រេចផ្នែកនយោបាយស្របទៅតាមច្បាប់។ ច្បាប់រដ្ឋប្បវេណីអនុញ្ញាតឲ្យយើងធ្វើអញ្ចឹង”។ លោកបន្តថាក្រុមហ៊ុនដែលរដ្ឋាភិបាលអនុញ្ញាតឲ្យបន្តនីតិវិធីនិងស្ថិតក្រោមការតាមដាន រដ្ឋាភិបាលនឹងកាត់បន្ថយមករយៈពេល៥០ឆ្នាំដូចគ្នា ដោយគ្រាន់តែរង់ចាំសេចក្តីជូនដំណឹង(សជណ)តែប៉ុណ្ណោះ។ លោកបន្ថែមថាក្រុមហ៊ុនខ្លះគ្រាន់តែទទួលបានគោលការណ៍ដីសម្បទានពីរដ្ឋាភិបាលច្រើនឆ្នាំមកហើយ ប៉ុន្តែមិនទាន់មានកិច្ចសន្យាជាមួយក្រសួងបរិស្ថាន ដូច្នេះលោកថារដ្ឋាភិបាលអាចដកហូតដីមកបាន នៅពេលសិក្សាឃើញថាមានភាពមិនប្រក្រតី។
អ្នកនាំពាក្យនិងជាអនុរដ្ឋលេខាធិការក្រសួងកសិកម្មរុក្ខាប្រមាញ់ និងនេសាទលោក អ៊ាង សុផល្លែត ឲ្យដឹងថាគិតត្រឹមថ្ងៃទី៥ខែសីហាក្រុមហ៊ុនចំនួន៧៧ដែលស្ថិតនៅក្រោមក្រសួងកសិកម្ម ត្រូវបានត្រួតពិនិត្យ និងវាយតម្លៃ ដែលក្នុងនោះក្រុមហ៊ុនចំនួន១០ ត្រូវបានដកហូត ក្រុមហ៊ុន៦ត្រូវបានឲ្យសម្រួលផ្ទៃដីក្រុមហ៊ុន៥៤ ត្រូវបានអនុញ្ញាតឲ្យបន្តនីតិវិធីនិងក្រុមហ៊ុន៧ ត្រូវបានទុកពេលឲ្យពី៦ខែទៅ១ឆ្នាំ ដើម្បីបន្តនីតិវិធី។
បើតាមមន្រ្តីក្រសួងកសិកម្ម មានក្រុមហ៊ុនសរុបចំនួន១២២លើផ្ទៃដីសរុបចន្លោះពី១,២លានហិកតាទៅ ១,៣លានហិកតាដែលបានទទួលការអនុញ្ញាតនិងចុះកិច្ចសន្យាជាមួយរដ្ឋាភិបាលក្នុងការអភិវឌ្ឍវិនិយោគ។
គួរបញ្ជាក់ថា កាលពីថ្ងៃទី៧ ខែឧសភា ឆ្នាំ២០១២ លោកនាយករដ្ឋមន្ត្រី ហ៊ុន សែន បានចេញសេចក្តីប្រកាសផ្អាកជាបន្ទាន់នូវការផ្តល់ដីសម្បទានសេដ្ឋកិច្ច ឲ្យទៅក្រុមហ៊ុនឯកជន ហើយបានអំពាវនាវឲ្យពិនិត្យមើលឡើងវិញនូវដីសម្បទានដែលមានស្រាប់ទាំងអស់៕
សរសេរមកកាន់លោក ស៊ុន ណារិន តាមរយៈsun_narin@vodhotnews.com