ដោយ៖ ឆោម ស្រីលក្ខណ៍ | ថ្ងៃព្រហស្បតិ៍ ទី8 តុលា 2015
http://vodhotnews.com
ពលរដ្ឋម្នាក់ដែលទទួលបានមកចាប់ឆ្នោតយកដីសង្គមកិច្ច។ (រូបថត៖ ឆោម ស្រីលក្ខណ៍)
ប្រជាពលរដ្ឋចំនួន៥៦១គ្រួសារ កាលពីព្រឹកថ្ងៃចន្ទនេះ បានមកចាប់ឆ្នោតយកដីឡូតិ៍សង្គមកិច្ច នៅសាលាស្រុកឆ្លូង ខេត្តក្រចេះ ដោយមានការចូលរួមពីលោក សរ ចំរុង អភិបាល នៃអភិបាលខេត្តក្រចេះ។
ពលរដ្ឋទាំងនេះមកពីឃុំចំនួន៤ រួមមានឃុំព្រែកសាម៉ាន់ ឃុំពង្រ ឃុំខ្សាច់អណ្តែត និងឃុំដំរីផុង ក្នុងស្រុកឆ្លូងខេត្តក្រចេះ។ ពួកគាត់ស្ថិតក្នុងចំណោមពលរដ្ឋទាំង៩៩៨គ្រួសារដែលនឹងទទួលបានដីសង្គមកិច្ចពីរដ្ឋាភិបាល។
លោក កៅ ម៉ាឌីឡែន ប្រធានមន្ទីររៀបចំដែនដី នគរូបនីយកម្ម សំណង់ និងសុរិយោដីខេត្ត បានលើកឡើងថា ការចាប់ឆ្នោតយកដីឡូតិ៍នេះ ជិតឈានចូលដល់ដំណាក់កាលចុងបញ្ជប់នៃបញ្ហាប្រជាពលរដ្ឋ៩៩៨គ្រួសារ ដែលការចាប់ឆ្នោតយកដីឡូតិ៍សម្បទានសង្គមកិច្ច គឺធ្វើឡើងបានពីរដំណាក់កាលហើយ ដោយក្រុមទី១ មានប្រជាពលរដ្ឋចំនួន២៩១គ្រួសារ និងក្រុមទី២មានចំនួន៥៦១គ្រួសារ។
ទោះជាយ៉ាងណា ក៏មានពលរដ្ឋរាប់សិបគ្រួសារទៀតដែលមិនមានឈ្មោះក្នុងបញ្ជីនៃគ្រួសារទាំង៩៩៨នោះ បានឡើងទៅរកអន្តរាគមន៍និងដាក់ញត្តិនៅរដ្ឋសភាជាតិ។ ពួកគាត់ធ្លាប់បានអះអាងថា អាជ្ញាធរបានហាមឃាត់ពូកគាត់មិនឲ្យដាំដុះលើដីរបស់ពួកគាត់ ហើយផ្តល់ពេលឲ្យពួកគេខ្លីពេកក្នុងការធ្វើអត្តសញ្ញាណកម្ម។
ការដែលគ្មានឈ្មោះក្នុងបញ្ជីនៃគ្រួសារទាំង៩៩៨ នេះ មានន័យថា ពួកគាត់ប្រឈមមុខនឹងការបាត់បង់ដីធ្លីនាពេលអនាគត៕
ពលរដ្ឋដែលមកចូលរួមចាប់ឆ្នោតកាលពីថ្ងៃទី៥ ខែតុលា ឆ្នាំ២០១៥ នៅសាលាខេត្តក្រចេះ (រូបថត៖ ឆោម ស្រីលក្ខណ៍)
ឆោម ស្រីលក្ខណ៍ ជាពលរដ្ឋអ្នកសារព័ត៌មាននៅខេត្តក្រចេះ