ដោយ៖​ ណាត សុភាព​​ | ថ្ងៃចន្ទ ទី2 វិច្ឆិកា 2015, 04:44 PM​
http://vodhotnews.com

ប្រធានគណបក្ស​សង្រ្គោះជាតិ លោក សម រង្ស៊ី​ កាលពីកន្លងទៅ

មេដឹក​នាំគណបក្ស​ប្រឆំាងលោក សម រង្ស៊ី ​នឹង​វិលត្រឡប់មកដល់ប្រទេសកម្ពុជា​វិញ​នៅយប់​ថ្ងៃអង្គារ​ស្អែក​នេះ ដើម្បីអ្វីដែលលោកអះអាងថាជាភាពចាំបាច់នៃវប្បធម៌សន្ទនា ដោយ​សារ​តំណាងរាស្ត្ររបស់លោកពីររូប​​ត្រូវបានបាតុករ​វាយ​ឲ្យ​រងរបួស​ធ្ងន់​នៅក្បែរ​​រដ្ឋសភា កាលពីចុងខែតុលា។ នេះបើតាម​ហ្វេសប៊ុក ​លោក សម រង្ស៊ី​ កាលពីថ្ងៃទី១ខែវិច្ឆិកា​នេះ។

យ៉ាងណាក៏ដោយតំណាង​រាស្ត្រគណបក្សសង្គ្រោះជាតិ ​លោក អេង​ ឆៃអ៊ាង មានប្រសាសន៍ថាលោក សម រង្ស៊ី​ ត្រឡប់មក​កម្ពុជានៅម៉ោង៧និង៣០យប់​ថ្ងៃស្អែក​នេះ គឺគ្រាន់តែមក​ចូល​រួម​បុណ្យកឋិនទានមួយនៅខេត្តកណ្តាល។ លោកបន្ត​ថា​លោក សម​ រង្ស៊ី ទំនង​ជា​មិនមានគម្រោង​ជួបជាមួយ​ភាគីគណបក្ស​នយោ​បាយ​ណាមួយនោះទេ។ លោក​ថ្លែង​ថា​៖ “បាទកម្មវិធីក្នុងប្រទេសប្រហែលជាមានខ្ញុំដឹងមានគឺគាត់ធ្វើការចូលរួមបុណ្យកឋិនមួយនៅខេត្តកណ្តាល(អ្នក​ព័ត៌មានសួរ៖ ប៉ុន្តែអត់មានគោលបំណងត្រូវជួបជជែកគ្នា​រឿ​ងនយោបាយ​ជា​មួយគណបក្សនយោបាយណាមួយទេ? អត់មានអីទំាងអស់ ប៉ុន្តែគាត់ទាក់ទង​គ្នាយ៉ា​ងម៉េចពីនោះមក ខ្ញុំអត់ដឹងទេ”។

លោក អេង​ ឆៃអ៊ាង បន្ថែម​ថាវត្តមានលោក សម រង្ស៊ី មក​កម្ពុជា​មាន​តែចំនួន​២ថ្ងៃតែប៉ុណ្ណោះ បន្ទាប់មក​លោក សម រង្ស៊ី នឹង​ធ្វើដំណើរ​ទៅប្រទេស​ម៉ុងហ្គោលីបន្ត​ទៀត​។

សាស្ត្រាចារ្យវិទ្យាសាស្ត្រនយោបាយ លោក រស់ រ៉ាវុធ យល់ថាលោក សម​ រង្ស៊ី គួរ​តែជជែក​គ្នាអំពីស្ថានការនយោបាយនៅកម្ពុជាជាមួយមេដឹកនាំគណបក្ស​ប្រជាជន។ លោកថានេះជា​ជម្រើសល្អ​រវាង​គណបក្ស​ទំាង​ពីរ ដើម្បី​កុំឲ្យ​ស្ថានការនយោបាយឡើង​កម្តៅ​ ខាតប្រយោជន៍ពលរដ្ឋ​និង​ជាតិ។ លោក​មានប្រសាសន៍ថា​៖ “ខ្ញុំគិតថារឿងបញ្ហាជជែកគ្នារវាងគណបក្សទំាងពីរនេះ គួរតែកើតមានឡើងហើយ ឲ្យបានមានលក្ខណៈជិត​ស្និទ្ធឲ្យល្អនឹងគ្នា ឲ្យយល់ចិត្តគ្នា ក៏ពិតមែនហើយថាការជជែកគ្នាជាសិទ្ធិរបស់អ្នកនយោបាយ ក៏ប៉ុន្តែយើងពិនិត្យមើលលក្ខណៈនយោបាយរបស់ខ្មែរយើង កាលណាឃ្លាតឆ្ងាយពីគ្នាគឺមិនយល់គ្នាធ្វើឲ្យស្ថានការណ៍ឡើងកម្តៅ​ ធ្វើឲ្យខាតបង់គឺប្រទេសកម្ពុជាក៏ដូចជាប្រជាពលរដ្ឋកម្ពុជាទំាងមូល”។​

កាលពីថ្ងៃទី២៩ ខែតុលា ក្រោយពីការប្រើហិង្សាលើតំណាង​រាស្ត្រពីររូប​របស់គណបក្ស​សង្គ្រោះជាតិ គឺលោក​សម រង្ស៊ី បាន​ផ្ញើ​លិខិត​ទៅ​កាន់​លោក ស ខេង ប្រធានក្រុម​តំណាងរាស្ត្រ​នៃ​គណបក្ស​ប្រជាជន​កម្ពុជា ដោយ​បញ្ជាក់​ប្រាប់ថាលោក​ថ្កោលទោស​ចំពោះកុប្បករ​ដែល​បាន​វាយដំ​តំណាងរាស្ត្រ​កាលពី​ថ្ងៃ​ទី​២៦​ ខែតុលា​។ នៅក្នុង​លិខិតនោះ​លោក សម រង្ស៊ី  ក៏​បាន​ស្នើ​ឲ្យ​សម​ភាគី​របស់​ខ្លួន ពង្រឹង​វប្បធម៌​សន្ទនា ដើម្បី​ដោះស្រាយ​បញ្ហា​របស់​ជាតិ​រួម​គ្នា​ទៀត​។​

​ទន្ទឹមនឹងនោះ​ លោក សម រង្ស៊ី ក៏​បាន​ស្នើ​ឲ្យ​លោក ស ខេង ជួយ​ចាត់​វិធានកា​រនា​ធា​ដល់​សន្តិសុខនិងសុវត្ថិភាពតំណាងរាស្ត្រ​ទាំងអស់​ ដោយ​សារ​តំណាង​រាស្ត្ររបស់ខ្លួ​នពីររូប​ត្រូវបានជន​ដៃដល់​ដែលគាំទ្រ​គណបក្ស​ប្រជាជន​កម្ពុជា​បង្កហិង្សា​ឲ្យ​របួស​ធ្ងន់​ នៅពេលពួកបាតុកទាមទារឲ្យដក លោក កឹម សុខា​​។

លោក ស ខេង បាន​ឆ្លើយតប​តាម​លិខិត​ទៅ​លោក​សម រង្ស៊ី ​វិញ​ថា រូបលោក​ផ្ទាល់ ក៏ដូចជារដ្ឋាភិបាល​សម្តែង​ការសោកស្តាយ​ហេតុការណ៍​ហិង្សា​លើ​តំណាងរាស្ត្រ​និងថ្កោលទោស​ចំពោះ​អ្នកប្រព្រឹត្ត​។  លោក ស ខេង ក៏​បាន​ប្តេជ្ញា​ថានឹង​ស៊ើបអង្កេត​ស្វែង​រកជនដៃដល់មក​ផ្តន្ទាទោស​ឲ្យបាន៕

សរសេរមកកាន់លោក ណាត សុភាព តាមរយៈsopheap@vodhotnews.com