ដោយ៖ ញឹម សុខន | ថ្ងៃអាទិត្យ ទី27 ធ្នូ 2015
http://vodhotnews.com
មេដឹកនាំបក្សប្រឆាំងលោក កឹម សុខា ប្រកាសផ្សព្វផ្សាយតាមបណ្តាញសង្គមផ្ទាល់ពីប្រវត្តិ និងសកម្មភាពសិទ្ធិមនុស្ស ពីអតីតកាលដែលលោកថា ដើម្បីរំឭកខួប១០ឆ្នាំនៃការចាប់ឃុំខ្លួនពីសំណាក់រដ្ឋាភិបាល។
នៅលើបណ្តាញសង្គមផ្ទាល់របស់លោក កឹម សុខា បានសរសេរថា សៀវភៅដែលគ្រោងនឹងផ្សព្វផ្សាយនៅថ្ងៃទី៣១ ខែធ្នូនោះ សហការីរបស់លោក ជាអ្នកកត់ត្រាឡើង ដើម្បីបង្ហាញពីជីវប្រវត្ត និងសកម្មភាពសិទ្ធិមនុស្ស ពេលលោកធ្វើជាប្រធានមជ្ឈមណ្ឌលសិទ្ធិមនុស្សកម្ពុជា នៅពេលកន្លងទៅ។
ម្យាងវិញទៀត កំណត់ត្រាបញ្ជាក់ថា លោក កឹម សុខា គឺជាអ្នកពុះពារតស៊ូដើម្បី សេរីភាព យុត្ដិធម៌និងជំរុញឲ្យមានការរីកចំរើនផ្នែកសិទ្ធិមនុស្ស គ្មានការតក់ស្លុត រហូតរដ្ឋាភិបាលចាប់ខ្លួន។
កំណត់ត្រាដដែលសរសេរថា លោក កឹម សុខា ត្រូវអាជ្ញាធររាជរដ្ឋាភិបាល ចាប់ខ្លួននៅថ្ងៃទី៣១ ខែធ្នូ ឆ្នាំ២០០៥ វេលាម៉ោង១៣ និង៣០នាទី នៅស្នាក់ការកណ្តាល ក្នុងរាជធានីភ្នំពេញ។
ក្រោយពីចាប់ខ្លួនលោក កឹម សុខា ត្រូវសមត្ថកិច្ច បានបញ្ជូនទៅឃុំខ្លួននៅពន្ធនាគារព្រៃស ចោទពីបទបរិហារកេរ្ដិ៍ និងជេរប្រមាថប្រមុខរាជរដ្ឋាភិបាល។
កំណត់ត្រាឲ្យដឹងថា ក្រោយពីឃុំខ្លួនជិត២០ថ្ងៃ រដ្ឋាភិបាលបាន សម្រេចឲ្យដោះលែង លោក កឹម សុខា វិញ នៅថ្ងៃទី១៧ ខែមករា ឆ្នាំ២០០៦។
ពេលបានចេញពីមណ្ឌលឃុំឃាំងលោក កឹម សុខា ប្រកាសឈប់ធ្វើជាប្រធានមជ្ឈមណ្ឌលសិទ្ធិមនុស្សកម្ពុជាឆ្នាំ២០០៧ ហើយសកម្មជនសិទ្ធមនុស្សដ៍លឹចធ្លោរូបនោះ បានហកមកប្រឡូកក្នុងឆាកនយោបាយវិញ ។
ពេលនេះ លោក កឹម សុខា បានក្លាយជាមេដឹកនាំបក្សប្រឆាំង ដ៏ធំមួយនៅកម្ពុជា ពោលគឺលោកមានតួនាទីជាអនុប្រធានគណបក្សសង្គ្រោះជាតិ៕
សូមសរសេរមកកាន់លោក ញឹម សុខន តាមរយៈsokhorn@vodhotnews.com
GOD bless you H E SO-KHA ‘ long live mr SO KHA ‘