ដោយ៖ អ៊ិត សូធឿត | ថ្ងៃចន្ទ ទី4 មករា 2016, 03:34 PM
http://vodhotnews.com
ស្តាប់សំឡេង៖ |
ចម្លងទុក |
នាមួយរយៈចុងក្រោយនេះ អ្នកនយោបាយខ្មែរ និងថ្នាក់ដឹកនាំរដ្ឋាភិបាលបាននាំគ្នាបង្កើតគណនេយ្យ ក៏ដូចជាទំព័រហ្វេសប៊ុកផ្លូវការរបស់ខ្លួនជាបន្តបន្ទាប់។ ជាក់ស្ដែងដូចជាលោកនាយករដ្ឋមន្ត្រីដែលពីមុនធ្លាប់ប្រកាសថាលោកពុំប្រើប្រាស់បណ្ដាញសង្គមនេះនោះ បានប្រកាសទំព័រហ្វេសប៊ុកផ្លូវការរបស់លោកនៅក្នុងខែកញ្ញា ឆ្នាំ២០១៥។
លោកនាយករដ្ឋបានប្រកាសថា លោកលេងហ្វេសប៊ុកគឺដើម្បីទទួលព័ត៌មានពិតនិងគ្រប់ជ្រុងជ្រោយ។ លើសពីនេះទៅទៀត កាលពីសប្ដាហ៍មុន លោក ហ៊ុន សែន ក៏បានបញ្ជាឲ្យក្រសួងសាធារណការ និងដឹកជញ្ជូនផ្អាកបណ្តោះអាសន្នការធ្វើប័ណ្ណបើកបរម៉ូតូឡានក្រោយពីលោកបានទទួលការត្អូញត្អែរពីប្រជាពលរដ្ឋតាមរយៈហ្វេសប៊ុករបស់លោកថាតម្លៃធ្វើប័ណ្ណបើកបរថ្លៃពេក។ ប្រការនេះបាននាំឲ្យមានការពិភាក្សាពីឥទ្ធិរបស់បណ្ដាញសង្គមមួយនេះនៅក្នុងបញ្ហាសង្គមក៏ដូចជានយោបាយកម្ពុជា ដែលនាំឲ្យមានការលើកឡើងជាសំណួរថា តើបណ្ដាញសង្គមហ្វេសប៊ុកមានតួនាទីយ៉ាងណានៅក្នុងសង្គមកម្ពុជា?
អ្នកតាមដានការអភិវឌ្ឍសង្គមលោក កែម ឡី មានប្រសាសន៍ថា បណ្ដាញសង្គមបានដើរតួនាទីយ៉ាងសំខាន់នៅក្នុងសង្គមកម្ពុជាពិសេសសម្រាប់ប្រជាពលរដ្ឋកម្ពុជាក្នុងការប្រាស្រ័យទាក់ទងគ្នា ស្វែងរកចំណេះដឹង ទទួលបានព័ត៌មាន បន្ថែមលើប្រព័ន្ធផ្សព្វផ្សាយបែបប្រពៃណីដូចជាកាសែត វិទ្យុ និងទូរទស្សន៍ ដែលបង្កើតបានទៅជាប្រព័ន្ធផ្សព្វផ្សាយចម្រុះ។ លើសពីនេះទៅទៀតលោកថា បណ្ដាញសង្គមហ្វេសប៊ុកក៏ជាស្ពានទំនាក់ទំនងរវាងប្រជាពលរដ្ឋ និងថ្នាក់ដឹកនាំរដ្ឋាភិបាល និងអ្នកនយោបាយផងដែរ។ លោកបានបន្តថា៖ “សំខាន់ណាស់ទីមួយគឺសង្គមហ្វេសប៊ុកហ្នឹងជាកញ្ចក់មួយហើយជាយន្តការណ៍សម្រាប់ពង្រឹងអភិបាលកិច្ចល្អតម្លាភាពហើយជំរុញឲ្យមានការទទួលខុសត្រូវសង្គមចំពោះមន្ត្រីរដ្ឋាភិបាល ទីពីរគឺបិទគម្លាតបានន័យថាធ្វើម៉េចឲ្យពលរដ្ឋហ្នឹងនៅជិតអ្នកធ្វើសេចក្តីសម្រេចចិត្ត អ្នកនយោបាយ មន្ត្រីរដ្ឋាភិបាលគាត់មានហ្វេសប៊ុកគាត់អាចទាក់ទងផ្ទាល់តាមរយៈហ្វេសប៊ុកអាហ្នឹងរឿងទី២ រឿងទីបីជាខប្រជាធិបតេយ្យមួយដែលពលរដ្ឋអាចសំដែងមតិបញ្ចេញមតិតាមប្រព័ន្ធសង្គមហ្នឹង”។
សម្រាប់អ្នកស្រាវជ្រាវពីការអភិវឌ្ឍសង្គមលោកបណ្ឌិត មាស នី យល់ថា បណ្ដាញសង្គមហ្វេសប៊ុកបានជួយលើកទឹកចិត្តដល់ប្រជាពលរដ្ឋក្នុងការបញ្ចេញមតិ និងនិយាយពីបញ្ហាដែលពួកគាត់បានជួបប្រទះ ដែលពីមុនលោកថា ពលរដ្ឋមានការលាក់លៀមមិនហ៊ាននិយាយពីបញ្ហារបស់ខ្លួននោះទេ។ លើសពីនេះទៅទៀត លោកថា ការចូលរួមសន្ទនារបស់ថ្នាក់ដឹកនាំរដ្ឋាភិបាលនៅលើបណ្ដាញសង្គមហ្វេសប៊ុកបានផ្ដល់ឱកាសដល់ពលរដ្ឋក្នុងការរាយការណ៍បញ្ហារបស់ខ្លួនទៅកាន់ថ្នាក់ដឹកនាំរដ្ឋាភិបាល ដែលវាអាចនឹងកាត់បន្ថយឱកាស និងឥទ្ធពលរបស់រដ្ឋាភិបាលថ្នាក់ក្រោម ដែលលោកថា ពេលខ្លះធ្វើរបាយការណ៍មិនពិតទៅកាន់ថ្នាក់ដឹកនាំ។
មួយវិញទៀត លោកថា ការរាយការណ៍ដោយផ្ទាល់ពីប្រជាពលរដ្ឋនេះនឹងជួយឲ្យថ្នាក់ដឹកនាំបានដឹងបញ្ហានានាដោយផ្ទាល់ពីប្រជាពលរដ្ឋ ដែលលោកថា នេះអាចដំណាងឲ្យសមាជជាតិ ដោយសារពលរដ្ឋកម្ពុជាជាច្រើនប្រើប្រាស់បណ្ដាញសង្គមនេះ។ ទោះយ៉ាងណា លោកថាកត្តាសំខាន់គឺឆន្ទៈរបស់រដ្ឋាភិបាលក្នុងការដោះស្រាយបញ្ហាជូនប្រជាពលរដ្ឋ។ លោកបានបន្តថា៖ “អញ្ចឹងអានេះវាស្មើហ្នឹងសមាជជាតិដោយសាររដ្ឋាភិបាលបានការពារមិនចង់ឲ្យមានសមាជជាតិឬមិនចង់ឲ្យមានវេទិកាអីផ្សេងៗតែយើងមានឪកាសដាក់វេទិកានៅតាមប្រព័ន្ធសង្គមហ្វេសប៊ុក។ រឿងដែលសំខាន់គឺសុច្ឆន្ទៈរបស់រដ្ឋាភិបាលផ្ទាល់តែម្តង ប្រសិនបើរដ្ឋាភិបាលគាត់គិតថាការលើកទ្បើងរបស់ពលរដ្ឋនៅក្នុងសង្គមហ្វេសប៊ុកវាជារឿងមួយត្រឹមត្រូវហើយរដ្ឋាភិបាលក៏ត្រូវតែមានលទ្ធភាពឬសមត្ថភាពក្នុងការឆ្លើយតបដោះស្រាយទៅតាមគោលករណ៍ណាមួយដែលអាចធ្វើទៅបាននោះ អាហ្នឹងខ្ញុំគិតថាការប្រើបែបហ្នឹងវាហ្នឹងមានប្រយោជន៍ក៏ប៉ុន្តែបើសិនជាអ្នកដែលធ្វើការតិះដៀលទៅលើរឿងហ្នឹងមិនបានប្រើពាក្យពេចន៍ឲ្យសម”។
យ៉ាងណាក៏ដោយ សម្រាប់លោក កែម ឡី យល់ថា បណ្ដាញសង្គមហ្វេសប៊ុកគ្រាន់តែជាប្រភពព័ត៌មានមួយជ្រុងរបស់សង្គមដែលរដ្ឋាភិបាលអាចយកទៅពិចារណា។ លោកថា បន្ថែមពីលើព័ត៌មានបានមកពីបណ្ដាញសង្គម និងប្រព័ន្ធផ្សព្វផ្សាយ រដ្ឋាភិបាលគួរយកចិត្តទុកដាក់ពីមតិយោបល់របស់អង្គការសង្គមស៊ីវិលដែលផ្ដល់ទៅតាមក្រសួងនានា និងមតិយោបល់បានមកពីវេទិកាសាធារណៈ និងកិច្ចប្រជុំនានានៅតាមឃុំសង្កាត់ និងរាជធានីខេត្តក្រុង ដើម្បីកំណត់អាទិភាពនៃបញ្ហាក្នុងការដោះស្រាយ។ លោកបានបន្ថែមថា៖ “មួយទៀតគឺយើងត្រូវទទួលសម្លេងពីគណបក្សប្រឆាំងឬមួយក៏សម្លេងពីសាធារណជនទូទៅដើម្បីយកមកធ្វើការសន្និដ្ឋានប៉ុន្តែប្រសិនបើយើងគិតតែមួយជ្រុងយកតែមតិរបស់ប្រជាពលរដ្ឋតាមហ្វេសប៊ុកទៅឆ្លើយតបហើយយើងភ្លេចគិតមតិដែលរងគ្រោះដីធ្លី បាតុកម្ម កូដកម្ម អង្គការសង្គមស៊ីវិលឬក៏បេក្ខជននាៗដើម្បីយកមកធ្វើការសន្និដ្ឋានហើយកំណត់អាទិភាពក្នុងការឆ្លើយតបទេអាហ្នឹងវារិតតែជាកំហុសឆ្គងដ៏ធំមួយថែមទៀត”។
ស្រដៀងគ្នាដែរ លោក មាស នី មានប្រសាសន៍ថា ដើម្បីឲ្យយន្តការក្នុងការដោះស្រាយបញ្ហានានារបស់ជាតិមានប្រសិទ្ធិភាព ដំណោះស្រាយ ឬការឆ្លើយតបរបស់ថ្នាក់ដឹកគួរធ្វើឡើងក្នុងនាមរដ្ឋាភិបាលទាំងមូល ដោយឆ្លងកាត់ការពិភាក្សាជាមួយក្រសួងសមត្ថកិច្ចពាក់ព័ន្ធ ជាជាងបញ្ជា ឬការសម្រេចចិត្តរបស់នាយករដ្ឋមន្ត្រីតែម្នាក់ឯង។ លោកបានបន្តទៀតថា៖ “ក៏ប៉ុន្តែរឿងមួយដែលមិនសូវល្អនោះដែលខ្ញុំគិតឃើញគឺការឆ្លើយតបរបស់គាត់រហ័សពេកមិនទាន់បានទុកពេលវេលាខ្លះដើម្បីឲ្យប្រព័ន្ធគ្រប់គ្រងឬក៏ស្ថាប័នពាក់ព័ន្ធហ្នឹងក្នុងការពិចារណាហើយនឹងរៀបចំឬក៏ពិនិត្យមើលទ្បើងវិញនៅក្នុងនាមរដ្ឋាភិបាលចឹងនៅពេលណាដែលគាត់បញ្ចេញប្រតិកម្មលឿនពេកឧទាហរណ៍ថាមើលឃើញព័ត៌មានហ្នឹងហើយគាត់ចេញបញ្ជាភ្លាមៗនោះវាមានការពិបាកបន្តិចដោយសារតែរឿងប្រទេសជាតិទាំងមូលពេលខ្លះនៅក្នុងវិធានការខ្លះវាត្រូវការពេលវេលាដើម្បីជជែកគ្នាហើយនឹងជំរុញឲ្យប្រព័ន្ធស្ថាប័នពាក់ព័ន្ធហ្នឹងធ្វើការជាជាងចេញតែពីមនុស្សម្នាក់”។
លោក មាស នី បន្តថា ប្រជាពលរដ្ឋនឹងទទួលបានប្រយោជន៍កាន់តែច្រើនពីបណ្ដាញសង្គម ដោយលោកថា ប្រសិនបើរដ្ឋាភិបាលមើលឃើញថា បណ្ដាញសង្គមគឺជាមធ្យោបាយល្អសម្រាប់ខ្លួនក្នុងការទទួលបានព័ត៌មាន នោះរដ្ឋាភិបាលនឹងជួយសម្របសម្រួលដល់ប្រជាពលរដ្ឋក្នុងការផ្ដល់ព័ត៌មានបន្ថែមទៀត។
ជារួមក្រុមអ្នកវិភាគយល់ឃើញដូចគ្នាថា បណ្ដាញសង្គមបានដើរតួនាទីយ៉ាងសំខាន់ក្នុងការធ្វើជាមធ្យោបាយទំនាក់ទំនង និងជាស្ពានរវាងថ្នាក់ដឹកនាំជាមួយប្រជាពលរដ្ឋ។ បណ្ដាញសង្គមក៏បានដើរតួនាទីជាកញ្ចក់សង្គម ជាកន្លែងសម្ដែងមតិ និងស្វែងរកព័ត៌មាន ក៏ដូចជាពិភាក្សាលើប្រធានបទនានាពីបញ្ហាសង្គមដែលក្រុមអ្នកវិភាគមើលឃើញថា ជាចន្លោះប្រហោងនាពេលកន្លងមក។ ទោះជាយ៉ាងនេះក្ដី អ្នកវិភាគយល់ថា ហ្វេសប៊ុកជាប្រភពផ្ដល់ព័ត៌មាន និងឆ្លុះបញ្ចាំងពីបញ្ហាដែលកើតមានឡើងនៅក្នុងសង្គម តែការដោះស្រាយគឺស្ថិតនៅលើចេតនា និងឆន្ទៈរបស់រដ្ឋាភិបាល ហើយអាទិភាពនៃការដោះស្រាយបញ្ហាទាំងអស់នោះគួរត្រូវបានសិក្សាឲ្យបានល្អិតល្អន់ មុននឹងធ្វើការសម្រេចចិត្ត៕
សរសេរមកលោក អ៊ិត សូធឿត តាមរយៈ sothoeuth@vodhotnews.com