ដោយ៖​ បូ សាវី​ | ថ្ងៃចន្ទ ទី4 មករា 2016, 04:36 PM​
http://vodhotnews.com

ក្រុមអ្នកតវ៉ាបានលើក​រូប​ថតនាយករដ្ឋមន្ដ្រីលោក ហ៊ុន សែន និងភរិយារ​បស់​​លោកព្រម​ទាំងរូប​សញ្ញាគណបក្សប្រជាជន (ដោយ បូ សាវី)

---

ក្រុមអ្នកតវ៉ាបានលើក​រូប​ថតនាយករដ្ឋមន្ដ្រីលោក ហ៊ុន សែន និងភរិយារ​បស់​​លោកព្រម​ទាំងរូប​សញ្ញាគណបក្សប្រជាជន​ផង​ដែរ។ ពួក​គាត់បាន​ស្រែក​តវ៉ាឲ្យតុលាការដោះលែងលោ​ក ហ៊ាង សារី ចៅ​សង្កាត់អំពិលដោយអះអាងថាការចោទប្រកាន់ចៅសង្កាត់កន្លងមកនោះ ខុសពីការពិត​ទាំង​ស្រុង។

ក្រុមបាតុករដែលមានទឹកភ្នែកហូរកាត់ផ្ទៃមុខផងនោះក៏បានសុំនាយករដ្ឋមន្ដ្រី ហ៊ុន សែន ឲ្យអន្ដ​រាគ​​មន៍​​ដោះ​លែងចៅសង្កាត់រូបនេះផងដែរ ដោយ​លើកឡើងថាមន្ដ្រីប​ក្សប្រឆាំង​រូបនោះ​បំរើការងារ​ជូន​ពលរដ្ឋ​ដោយ​សុច្ច​រិត​និងចេះជួយដោះទុក្ខលំបាករបស់ពលរដ្ឋ។

VOD មិនអាចទាក់ទងព្រះរាជអាជ្ញានៃសាលាដំបូងខេត្ដសៀមរាបលោក កើត វណ្ណារ៉េត ដើម្បីសុំការ​សាក​​​សួរពីបញ្ហានេះនៅឡើយទេដោយ​ទូរស័ព្ទ​ចូលច្រើនដងគ្មានអ្នកទទួល។

ប៉ុន្ដែចៅក្រមស៊ើបសួរលោក ឈុន ច័ន្ទសីហា បានចោទប្រកាន់ចៅសង្កាត់រូបនោះ​ទាក់ទងនឹង​ការចុះ​ហត្ថលេ​ខា​​រំ​លោភ​បំពាន​​លើ​ឯកសារ​អ្វីមួយ ដែល​​លោក​ថាចៅសង្កាត់​គ្មាន​សិទ្ធិ​សម្រេច។​ លោកថាចៅ​សង្កាត់​រូប​នោះប្រឈមជាប់​ទោសពី​២ឆ្នាំទៅ៥ឆ្នាំ។ លោកមា​ន​ប្រ​សាសន៍ថា​៖ ”ចឹងទៅ​គេសាកសួរទៅគាត់​បានទទួល​ស្គាល់​គាត់បាន[ចុះហត្ថលេខា]ពិតប្រាកដចឹងមែន។ ដូច្នេះគេឃុំខ្លួនដើម្បីធ្វើការស៊ើបអង្កេត​បន្ដ”។

មន្ដ្រីឃ្លាំមើលការរំលោភសិទ្ធិមនុស្សនៃសមាគមអាដហុកខេត្ដសៀមរាបលោក ​សួស ណារិន មានប្រ​សាសន៍ថាការឃុំខ្លួន​ចៅសង្កាត់នោះ​ជា​ឆន្ទានុសិទ្ធិរបស់តុលាការ ប៉ុន្ដែលោកថាបើមន្ដ្រីមូលដ្ឋាន​រូបនោះ​ធ្វើ​ខុសមែននោះគ្មា​នពលរដ្ឋជាង១៥០០នាក់នាំគ្នាមកតវ៉ាប្រឆាំងនឹងការឃុំខ្លួន​នោះទេ។ ​មន្ដ្រីសិទ្ធិមនុស្សរូបនោះហៅ​ការអនុវត្ដច្បាប់នៅកម្ពុជាមាន​ស្ត​ង់​ដារពីរដោយសារតែមេភូមិ ចៅសង្កាត់ ឬមេឃុំមកពី​គណបក្ស​ប្រជាជន​ដែល​ជាប់ពាក់​ព័ន្ធ​ការទិញលក់​ដី​នៅ​ក្នុងតំបន់អា​ជ្ញាធរជាតិ​អប្សរា​ដែរនោះ​មិនត្រូវ​បានស្ថាប័ននេះប្ដឹងទៅតុលាការឡើយ៕

សូម​សរសេរ​មក​កាន់​លោក បូ សាវី តាមរយៈ savy@vodhotnews.com