លោក ទូច ដាណារ៉ា និងអ្នកនាង សុខ សោម៉ាវត្តី។ វុទ្ធី
Mon, 4 January 2016
ស៊ូ វុទ្ធី
ភ្នំពេញប៉ុស្តិ៍
ភ្នំពេញ: នៅក្រោយការហ៊ុមព័ទ្ធពីចំណងស្នេហ៍ដើរដល់ផ្លូវបំបែក តែមិនមានភាគីណាក្លាហានទម្លាយអាថ៌កំបាំងឲ្យមហាជនអស់ចម្ងល់ និងទន្ទឹមនឹងដំណឹងស្វាមីឡើងតំណែង កាន់តួនាទីជាស្នងការរងខេត្តមណ្ឌលគិរីនោះ នៅពេលសុំរំឭករឿងចំណងប្តីប្រពន្ធជាថ្មី ពិធីការិនីកូនមួយ អ្នកនាង សុខ សោម៉ាវត្តី បែរជាពោលពាក្យថា រឿងប្តីឈប់និយាយហើយ។
មិនមែនទើបថ្មីៗនេះទេដែលមានចំហាយព័ត៌មានមិនល្អ ជ្រែកពិភពសិល្បៈថា ចំណងស្នេហាកូនមួយរវាងអ្នកនាង សុខ សោម៉ាវត្តី និង លោក ទូច ដាណារ៉ា កូនប្រុសអតីតមេប៉ូលិសក្រុងភ្នំពេញ ប្រសូតឡើងក្រោមជីវិតអាពាហ៍ពិពាហ៍ផ្អើលអស់តារាសិល្បៈនិងមន្ត្រីរាជការកាលពីរបីឆ្នាំមុននោះ ល្បីដើរដល់ផ្លូវបំបែក ចែកបង្វេចគ្នាទៅនៅពួនសម្ងំក្នុងបន្ទប់គេងផ្សេងគ្នា។
ប៉ុន្តែរាល់សំណួរសួរជជែកពីរឿងនេះ អ្នកនាង សុខ សោម៉ាវត្តី ជាពិធីការិនីនិងតារាសម្តែងនិយមស្ទីលកាយវិការក្រមិចក្រមើម សម្ដីប៉ប្លូច តែងតែអះអាងថា ជីវិតប្តីប្រពន្ធនាងមិនបានជួបរឿងដូចគេនិយាយទេ ដោយគ្រាន់តែរស់នៅមិនសូវបានមានភាពស្និទ្ធស្នាលនឹងគ្នាប៉ុណ្ណោះ ពីព្រោះការងាររវល់រៀងៗខ្លួន។
ប៉ុន្តែពីក្រោយខ្នងនៃសម្ដីអះអាងបន្សាបព្យុះព័ត៌មានអាស្រូវស្នេហ៍នោះ មានព័ត៌មានទម្លាយចេញជាហូហែពីអ្នកសិល្បៈស្និទ្ធនឹងនាងថា ការពិតសម្ដីដែល សុខ សោម៉ាវត្តី អះអាងគឺជាការបិទបាំងតែប៉ុណ្ណោះ។ ពួកគេមិនបានរួមរស់ជុំគ្នាដូចកាលពីគ្រាដែលទើបរៀបការឡើយ។
ប្រភពដដែលបានបង្ហើបថា៖ «តាមតែការឃ្លាតឆ្ងាយពីគ្នានោះ ទំនងជាពួកគេក៏មិននៅទំនេរដែរ។ មិនថា តែលោក ពេជ្រ ទេមានអ្នកថ្មី ស្រស់ស្រី វត្តី ក៏មានដែរ។ តែនាងកំពុងរៀបគម្រោងដើរតាមគន្លង អ្នកនាង ចន ច័ន្ទលក្ខិណា ដោយរង់ចាំស្នេហ៍ចេញលទ្ធផលដាច់ស្រឡះសិន ទើបគេហ៊ានបញ្ចេញចំណងជីវិតថ្មី»។
ទន្ទឹមនឹងការលើកឡើងនៅក្នុងអ៊ីនស្តាក្រាមរបស់អ្នកនាង សុខ សុម៉ាវត្តី គ្រាដែលស្វាមី លោកទូច ដាណារ៉ា ទទួលបានតំណែងកាន់តែធំ ធ្វើជាស្នងការរងខេត្តមណ្ឌលគិរីនោះ នាងបែរជាសរសេរសារបង្ហោះថា៖ «គ្មានស្នេហា គ្មានអ្វីប្លែកផង សប្បាយចង់ស្លាប់។ ត្រូវតែសប្បាយចិត្តនឹងអ្វីដែលយើងមាន។ កុំកើតទុក្ខនឹងអ្វីដែលបានបាត់បង់ ព្រោះអ្វីៗបានកំណត់ហើយ កុំចង់ឈ្នះអី។ អ្នកដែលឈឺចាប់គឺខ្លួនឯងទេ»។
ពេលសូមបកស្រាយពីសារបង្ហោះក្នុងអ៊ីនស្តាក្រាម និងសួរថា តើមានអារម្មណ៍សប្បាយយ៉ាងណាទេ ស្វាមីបានឡើងឋានៈកាន់តែធំនោះ អ្នកនាង សុខ សោម៉ាវត្តី ប្រាប់ថា ការបង្ហោះសារនោះមិនមែនទើបតែបង្ហោះថ្មីៗនេះទេ នាងបង្ហោះវាយូរថ្ងៃហើយ។ សារនេះ មិនជាសម្ដីអ្វីទេ វាជាសារបែបអប់រំសង្គមទូទៅ»។
ពិធីការិនីកូនមួយ កំពុងហ៊ុមព័ទ្ធរឿងបែកបាក់ប្តី រូបនេះ បានប្រាប់ថា៖ «សារនោះ គឺចង់អប់រំ ពិសេសយុវវ័យ មិនចង់បង្ហាញពីន័យផ្ទាល់ខ្លួន ឬចង់ប្រាប់ថា ជីវិតខ្ញុំដូចនោះទេ»។
សុខ សោម៉ាវត្តី បានបញ្ជាក់ចុងក្រោយថា៖ «ដោយឡែកចម្លើយពាក់ព័ន្ធរឿងប្តី ចំពោះរឿងនេះខ្ញុំសូមមិននិយាយ ហើយក៏ឈប់ខ្វល់នឹងសំណួររឿងហ្នឹងតទៅទៀតដែរ»៕