ដោយ៖ លី បេឡា | ថ្ងៃពុធ ទី6 មករា 2016
http://vodhotnews.com
ស្តាប់សំឡេង៖ |
ចម្លងទុក |
អ្នកធ្វើដំណើរនៅលើផ្លូវជាតិលេខ៤សំដៅចូលទីក្រុងភ្នំពេញហើយត្រូវបាននគរបាលចរាចរណ៍ហៅឈប់ចូលកន្លែងផាកពិន័យដោយសារអ្នកជិះពីក្រោយមិនមានពាក់មួកសុវត្ថិភាពនោះលោក ពុត លី អះអាងថាលោកមិនដឹងពីកំហុសនៃអ្នកជិះពីក្រោយមិនពាក់មួកសុវត្ថិភាពនិងមិនពីចំនួនទឹកប្រាក់នៃការផាកពិន័យលើកកំហុសនេះទេ។ លោកអះអាងថាមូលហេតុដែលលោកមិនដឹងពីព័ត៌មានទាំងនេះដោយសារតែលោកនៅស្រែចម្ការហើយរវល់ក្នុងការប្រមូលផល។
លោកបន្ថែមថា៖ “អត់សូវបានដឹងដែរបើយើងមិនសូវបានមើលទូរទស្សន៍ផង ហើយយើងជាប់ច្រូតកាត់អស់កំលាំងពេកមិនសូវបានបើកទូរទស្សន៍មើលអាល័យតែប្រមូលផល”។
អង្គុយនៅលើរ៉ឺម៉ក់កងបីរបស់ខ្លួនរង់ចាំដឹកភ្ញៀវលោក ទុយ វ៉ុន និយាយថាកាលពីមុនលោកធ្លាប់ដឹងថាអ្នកធ្វើដំណើតាមម៉ូតូទាំងអស់ត្រូវតែពាក់មួកសុវត្ថិភាពប៉ុន្តែលោកថានៅពេលច្បាប់ថ្មីចេញមកនេះលោកមិនទាន់បានដឹងនៅឡើយទេថាតម្រូវឲ្យរូបលោកត្រូវបំពេញបែបបទអ្វីខ្លះទៀត។
លោកបន្ថែមថា៖ “ឮសូរថាចាប់អ្នកជិះពីក្រោយអត់មានមួកជិះពីរនាក់ឲ្យមានមួកទាំង២ហើយកង់បីអត់ទាន់ដឹងថាម៉េចទេកង់បីមិនដឹងថាកង់បីត្រូវបានយកពន្ធឬយ៉ាងម៉េចឬក៏ចាប់យកប័ណ្ណបើកបរអត់ទាន់ដឹងទេព្រោះខ្ញុំជាអ្នកបើកកង់បីឥឡូវហ្នឹងម៉ូតូដឹងតែចាប់មួកពីក្រោយហើយ”។
ពលរដ្ឋខ្លះទៀតដែលបានដឹងខ្លះៗពីច្បាប់ថ្មីនេះបានត្អូញត្អែរថាច្បាប់ដែលបង្កើនការផាកពិន័យ៥ដងនេះធ្វើឲ្យប៉ះពាល់ដល់ជីវភាពរបស់ពួកគេ។
អង្គុយនៅលើម៉ូតូរងចាំដឹកភ្ញៀវនិងពិភាក្សារឿងច្បាប់ចរាចរណ៍ជាមួយអ្នករត់ម៉ូតូឌុប៤នាក់ផ្សេងទៀតបុរសសំបុរសខ្ពស់ដែលជាអ្នករត់ម៉ូតូឌុបលោក មឿក គ្រឿន ឲ្យដឹងថាលោកក៏បានដឹងពីច្បាប់ចរាចរណ៍ខ្លះៗដែរដូចជាការតម្រូវឲ្យដឹកមនុស្សតែម្នាក់ជាមួយនឹងមួកសុវត្ថិភាពនិងការតម្រូវឲ្យមានដាក់ឯកសារតាមខ្លួននិងទាមទាឲ្យមានប័ណ្ណបើកបរផងដែរ។
និយាយបណ្ដើរសើចបណ្ដើរលោក មឿក គ្រឿន ក៏បានរិះគន់ចំពោះការតម្រូវរបស់ច្បាប់ចរាចរណ៍ថ្មីនោះផងដែរដោយលោកថាវាអាចធ្វើឲ្យប៉ះពាល់ដល់ជីវភាពគ្រួសារលោកយ៉ាងធ្ងន់ធ្ងរ។
លោកបន្ថែមថា៖ “ពីរនាក់ក៏ដឹកអត់បានទៀតហើយគេទៅណាគេទៅពីរនាក់យើងរំលែកគេៗម៉េចជិះដូចប្ដីទៅមុនប្រពន្ធទៅក្រោយគេអត់ព្រម។ ចឹងពិបាកច្រើនណាស់លើកមុនធ្លាប់រកបាន៧ម៉ឺនចឹងឥឡូវរកបានតែ១៥០០០រៀល។ អញ្ចឹងរកលែងបានហើយបើរកបាន២ម៉ឺនទៅដល់កន្លែងនោះគេសង្កត់បង់៦ម៉ឺនទៅបានអី ចឹងមានតែឲ្យប្រពន្ធផ្ញើរលុយពីផ្ទះមកថែមទៀត ចឹងមានតែចងការគេថែមរិតតែក្រទៀត”។
អ្នករត់ម៉ូតូឌុបរូបនេះបន្ថែមដែរថាគ្រាន់តែបានដឹងពីការផាកពិន័យបែបនេះមានអ្នករត់ម៉ូតូឌុបមួយចំនួនមិនហ៊ានចេញរត់ឌុបទៀតទេដោយសារមិនមានឯកសារគ្រប់គ្រាន់។
អនុប្រធាននាយកដ្ឋាននគរបាលចរាចរណ៍និងសណ្ដាប់ធ្នាប់សាធារណៈនៃក្រសួងមហាផ្ទៃលោក ឡុង ធូ បានឲ្យដឹងថាមុននឹងច្បាប់ចរាចរណ៍ថ្មីនេះចាប់ផ្ដើមអនុវត្តរដ្ឋាភិបាលបានធ្វើការអប់រំផ្សព្វផ្សាយរយៈពេលមួយឆ្នាំមកហើយ។ លោកបន្ថែមថាមុននឹងធ្វើការផាកពិន័យសមត្ថកិច្ចគ្រាន់តែធ្វើការណែនាំដោយមិនមានការបង្ខំឲ្យអ្នកផ្ទះផ្ញើរលុយមកឲ្យបង់នោះទេ។
លោកបន្ថែមថា៖ “បងប្អូនប្រជាពលរដ្ឋទាំងអស់នោះប្រហែលជាគាត់មិនបានចូលរួមការផ្សព្វផ្សាយស្ដីពីវិធានការដែលត្រូវរឹតបន្តឹងនៅពេលខាងមុខនិងកម្រិតនៃអនុក្រឹត្យ០៨៥ស្ដីពីការផាកពិន័យតាមប្រព័ន្ធថ្មី។ ចឹងខ្ញុំសូមជម្រាបថាជាគោលការណ៍គ្រឺះនិងជាបំណងរបស់ថ្នាក់ជាតិរបស់រដ្ឋាភិបាលនិងប្រមុខប្រធានគណៈកម្មការសុវត្ថិភាពចរាចរណ៍ផ្លូវជាតិដែលមានសម្ដេចក្រឡាហោមជាប្រធានលោកមិនចង់បានទេប្រាក់ពីការផាកពិន័យ។ អីចឹងទេបើប្រជាពលរដ្ឋយល់ឃើញថាកម្រិតផាកនេះធ្ងន់ណាស់ សូមចូលរួមនាំគ្នាគោរពទៅ”។
ក្នុងច្បាប់ចរាចរណ៍ថ្មីដែលចាប់ផ្ដើមអនុវត្តនៅដើមឆ្នាំ២០១៦នេះមានចំណុចសំខាន់មួយចំនួនដែលអ្នកបើកបរថាពិបាកអនុវត្តតាមនោះដូចជាការតម្រូវឲ្យយកឯកសារដើមពាក់ព័ន្ធតាមខ្លួន ការតម្រូវឲ្យឌុបមនុស្សតែម្នាក់ជាមួយនឹងមួកសុវត្ថិភាព ការតម្រូវឲ្យមានប័ណ្ណបើកបរមួយសម្រាប់ម៉ូតូមួយគ្រឿងជាដើម។
អនុក្រឹត្យថ្មីមួយបន្ថែមលើច្បាប់ចរាចរណ៍ផ្លូវគោកថ្មីបានផ្តល់អំណាចឲ្យសមត្ថកិច្ចអាចពិន័យអ្នកបើកបរយានយន្តដែលមិនបានភ្ជាប់តាមខ្លួននូវឯកសារដើមរួមមានប័ណ្ណ បើកបរយានយន្ត ប័ណ្ណសម្គាល់យានយន្ត វិញ្ញាបនប័ត្រត្រួតពិនិត្យលក្ខណៈបច្ចេកទេសយានយន្តឬលិខិតអនុញ្ញាតធ្វើអាជីវកម្មចំពោះរថយន្តដែលប្រកបអាជីវកម្មដឹកជញ្ជូន។
បើតាមអនុក្រឹត្យរបស់លោកនាយករដ្ឋមន្រ្តី ហ៊ុន សែន ការផាកពិន័យអន្តរការណ៍ចំពោះអ្នកបើកបរទោចក្រយានយន្តឬទោចក្រយានយន្តសណ្តោងរ៉ឺម៉កឬត្រីចក្រយានយន្តមានចំនួនទឹកប្រាក់១៥០០០រៀល អ្នកបើកបរយានយន្តធុនស្រាលចំនួនទឹកប្រាក់២៥០០០រៀល និងអ្នកបើកបរយានយន្តធុនធ្ងន់ចំនួនទឹកប្រាក់៥០០០០រៀល៕
សូមសរសេរមកកាន់លោក លី បេឡា តាមរយៈ bela@vodhotnews.com