ដោយ៖ កាន់ វិច្ឆិកា | ថ្ងៃពុធ ទី6 មករា 2016, 05:57 PM
http://vodhotnews.com
មន្ត្រីក្រសួងសាធារណការ និងដឹកជញ្ជូន ឲ្យដឹងថា ប្រជាពលរដ្ឋអាចទៅដាក់ពាក្យធ្វើប័ណ្ណបើកបរម៉ូតូចាប់ពីថ្ងៃនេះតទៅ ក្រោយពីប្រកាសអន្តរក្រសួងស្ដីពីការកំណត់តម្លៃថ្មីសម្រាប់សេវាធ្វើប័ណ្ណបើកបរម៉ូតូត្រូវបានប្រកាសជាផ្លូវការ។
កាលពីចុងខែធ្នូ ឆ្នាំ២០១៥ លោកនាយករដ្ឋមន្ត្រី ហ៊ុន សែន បានបញ្ជាឲ្យក្រសួងសាធារណការ និងដឹកជញ្ជូនផ្អាកបណ្តោះអាសន្នការធ្វើប័ណ្ណបើកបរម៉ូតូឡាន ក្រោយពីលោកបានទទួលការត្អូញត្អែរពីប្រជាពលរដ្ឋតាមរយៈហ្វេសប៊ុករបស់លោកថា តម្លៃធ្វើប័ណ្ណបើកបរថ្លៃពេក។ លោក ហ៊ុន សែន បានបញ្ជាឲ្យក្រសួងពាក់ព័ន្ធពិនិត្យមើលលទ្ធភាពក្នុងការបញ្ចុះតម្លៃធ្វើប័ណ្ណបើកបរម៉ូតូនេះ។
អ្នកនាំពាក្យក្រសួងសាធារណៈការ និងដឹកជញ្ជូន លោក ចាន់ តារា មានប្រសាសន៍ថា ក្រោយពីមានការប្រជុំពិភាក្សាគ្នា ក្រសួងសាធារណការ និងដឹកជញ្ជូន និងក្រសួងសេដ្ឋកិច្ច និងហិរញ្ញវត្ថុ បានចេញប្រកាសរួមមួយដើម្បីកំណត់តម្លៃ និងនីតិវិធីថ្មីក្នុងការធ្វើប័ណ្ណបើកបរម៉ូតូ។ លោកថា ក្រោយពីប្រកាសអន្តរក្រសួងនេះត្រូវបានប្រកាសនៅថ្ងៃនេះ ប្រជាពលរដ្ឋអាចទៅដាក់ពាក្យ ដើម្បីប្រឡងយកប័ណ្ណបើកបរម៉ូតូបាន ដោយយោងតាមតម្លៃ និងនីតិវិធីថ្មីដែលបានកំណត់នៅក្នុងប្រកាសនោះ ដោយមិនមានការយកតម្លៃលើសឡើយ។
លោកមានប្រសាសន៍ថា៖ “តម្លៃសេវាសាធារណៈគឺបិទផ្សាយគ្រប់កន្លែងទាំងអស់ដែលទទួលសេវាហ្នឹង ឥឡូវមែនទែនបងប្អូនប្រជាពលរដ្ឋដឹងគ្រប់គ្នា ដឹងថា២៥០០០រៀល បើសិនជាអ្នកណាហ៊ានទារលុយលើសយើងមានសិទ្ធិប្តឹង ប្តឹងទៅគ្រប់កន្លែងដែលអាចធ្វើទៅបាន ទី១គឺអង្គភាពដែលអនុវត្តផ្ទាល់ហ្នឹង មានទំនាក់ទំនងមន្ត្រីណាដែលទទួលខុសត្រូវព័ត៌មានហ្នឹងលោកអាចដាក់ប្តឹងទៅបាន ទី២អាចដាក់ប្តឹងទៅបានតាមប្រព័ន្ធព័ត៌មានក្តី តាមអង្គភាពប្រឆាំងអំពើពុករលួយក៏អាចដាក់ទៅបាន ដាក់ទៅ បើមិនហ៊ានទៅខ្លួនឯង ដាក់សំបុត្រចោលទៅ ប្តឹងទៅបុគ្គលណាមួយធ្វើឥចឹង ដើម្បីយើងមានវិធានការផ្លូវច្បាប់”។
អត្ថបទទាក់ទង
- វិភាគ៖ កម្សោយរដ្ឋឬពលរដ្ឋដែលបង្កឧបសគ្គក្នុងការអនុវត្តច្បាប់ចរាចរណ៍ថ្មី?
- មន្ត្រីជំនាញនៅក្រសួងសាធារណការថា ពលរដ្ឋត្រូវឆ្លងកាត់ការប្រឡងដើម្បីបានប័ណ្ណបើកបរម៉ូតូ
- នាយករដ្ឋមន្ត្រីប្រកាសថា ពលរដ្ឋអាចធ្វើប័ណ្ណបើកបរម៉ូតូបានដោយពុំចាំបាច់រៀនបើកបរនោះទេ
- នាយករដ្ឋមន្រ្តីបញ្ជាឲ្យផ្អាកការធ្វើប័ណ្ណបើកម៉ូតូឡាននិងពិចារណាការបញ្ចុះតម្លៃ
ប្រធានអង្គភាពផ្តល់ប័ណ្ណបើកបរ និងសុវត្ថិភាពចរាចរណ៍ផ្លូវគោក លោក មាស ចន្ថា មានប្រសាសន៍ថា ទីតាំងនៃការធ្វើប័ណ្ណបើកបរក្នុងរាជធានីភ្នំពេញមានចំនួន៣គឺនៅអង្គភាពផ្តល់ប័ណ្ណបើកបរ ក្រុមហ៊ុនហុងដា (NCX) និងមន្ទីរសាធារណៈការ។ លោកបន្ថែមថា សម្រាប់ការធ្វើប័ណ្ណបើកបរថ្មីគឺមិនតម្រូវឲ្យប្រជាពលរដ្ឋរៀននោះទេ គឺមកប្រឡងយកតែម្តង។ ទោះជាយ៉ាងណា លោកថា អង្គភាពរបស់លោកនឹងសហការជាមួយស្ថាប័នពាក់ព័ន្ធផ្សេងទៀតចុះបង្រៀន និងអប់រំពីច្បាប់ចរាចរនៅតាមបណ្តាសាលារៀនក្នុងពេលឆាប់ៗ។
យោងតាមប្រកាសរួមចុះហត្ថលេខាដោយរដ្ឋមន្ត្រីក្រសួងសេដ្ឋកិច្ច និងហិរញ្ញវត្ថុ និងរដ្ឋមន្ត្រីក្រសួងសាធារណការ ថ្ងៃទី០៥ ខែវិច្ឆិកា ឆ្នាំ២០១៦ បង្ហាញថា តម្លៃសាធារណៈលើការប្រឡងយកប័ណ្ណបើកបរ និងប្តូរ ពន្យារ ទុតិយតា តតិយតា ប័ណ្ណបើកបរត្រូវបានផ្លាស់ប្តូរ។ ក្នុងនោះ សេវានីមួយៗត្រូវបញ្ចុះមកនៅតម្លៃចាប់ពី១០០០០រៀល ទៅ៣៥០០០រៀល៕
តារាងកំណត់តម្លៃសេវាធ្វើប័ណ្ណបើកបរម៉ូតូ នៅក្នុងប្រកាសរួមរបស់ក្រសួងសេដ្ឋកិច្ច និងហិរញ្ញវត្ថុ និងក្រសួងសាធារណការ និងដឹកជញ្ជូន
សរសេរមកកញ្ញា កាន់ វិច្ឆិកា វិច្ឆិកា តាមរយៈ vicheika@vhotnews.com