តារាសម្ដែង ប៉ែន ចំរ៉ុង ក្នុងថ្ងៃសម្ពោធហាងការ៉េម ឡឺ ក្លាស្សែស៍។ វុទ្ធី
Wed, 6 January 2016
ស៊ូ វុទ្ធី
ភ្នំពេញប៉ុស្តិ៍
ភ្នំពេញ: បង្ហាញវត្តមានជាមួយនឹងសកម្មភាពចាត់ចែង រត់ខ្វែងដៃខ្វែងជើង លោក ប៉ែន ចំរ៉ុង តារាភាពយន្ដ អនាគតកូនប្រសាថៅកែមហាហង្ស នៅថ្ងៃបើកសម្ពោធហាងលក់ការ៉េមដ៏ទំនើប ឡឺ ក្លាស្សែស៍ (Le Glacage) តាំងពីថ្ងៃបាក់រសៀលលុះរាត្រី បានទាក់ទាញការចាប់អារម្មណ៍របស់មហាជនភ្ញាក់ផ្អើលថា «ចំរ៉ុង មិនទាន់បានក្លាយជាកូនប្រសាថៅកែទ្រព្យស្តុកពេញសិទ្ធិផង សល់លុយវាល់ម៉ឺនដុល្លារបើកហាងហើយតើ»។
ស្វាគមន៍ឆ្នាំ ២០១៦ ថ្ងៃទី ១ ខែមករា ក៏ជាថ្ងៃបុណ្យចូលឆ្នាំសកល តារាសម្តែងដែលទើបនឹងស្ងប់រឿងលួចស្រឡាញ់កូនស្រីថៅកែមហាហង្ស តែត្រូវថៅកែផលិតកម្មនេះប្រកាសតាមវាយ ដល់គ្រប់ឆាកសិល្បៈ លោក ប៉ែន ចំរ៉ុង បានធ្វើឲ្យមហាជន ភ្ញាក់ផ្អើលជាមួយឱកាសបើកសម្ពោធហាងការ៉េមធំមួយ នៅតាមបណ្ដោយផ្លូវ ៣៦០ ជិតឡានទឹក ដែលមានតម្លៃជាង ៧ ម៉ឺនដុល្លារឯណោះ។
ជាមួយការភ្ញាក់ផ្អើលនោះ ក៏មានការលាន់មាត់ថា «ទំនងជា ប៉ែន ចំរ៉ុង និងអនាគតឪពុកក្មេក លោក អ៊ិន សុភិន ស៊ី ខ្សែកន្លុះគ្នា ហើយក៏បោះលុយឲ្យអនាគតកូនប្រសាមកបើកហាងលក់ការ៉េមនេះ»។
ប៉ុន្តែនៅពេលបង្ហើបពីសំណួរនិងការសង្ស័យជុំវិញការបើកសម្ពោធហាងការ៉េមទំនើបទើបមានដំបូងនៅកម្ពុជា ឡឺ ក្លាស្សែស៍ តារាភាពយន្ដជាប់ងារផ្ទុះរឿងអាស្រូវប្រចាំឆ្នាំ ២០១៥ រឿងឪពុកក្មេកដេញវាយនោះ លោក ប៉ែន ចំរ៉ុង ក៏បានចេញធ្វើការបដិសេធភ្លាមៗ។
នៅចំពោះមុខភ្ញៀវចូលរួមពិធីបើកសម្ពោធនោះ តារាភាពយន្ដក្លាយជាស្វាមី កូនថៅកែផលិតកម្មមហាហង្ស ទាំងមិនទាន់ត្រូវបានមេបាផ្សំផ្គុំ លោក ប៉ែន ចំរ៉ុង បានបកស្រាយថា៖ «ឡឺ ក្លាស្សែស៍ ហ្នឹង មិនមែនរបស់ខ្ញុំទេ ខ្ញុំអត់ទាន់មានលទ្ធភាពបើកហាងអីអស់ច្រើនយ៉ាងនេះទេ។ ឡឺ ក្លាស្សែស៍ វាជារបស់មិត្តភក្ដិខ្ញុំ»។
សារភាពថា៖«មិត្តភក្ដិគេពឹងឲ្យខ្ញុំជួយចាត់ចែង ទាំងការសម្របសម្រួលពិធីបើកសម្ពោធនេះ តារាប្រុសកាយវិការក្រមិចក្រមើម និងល្បីពូកែលួងលោមស្រីៗឲ្យលង់ស្នេហ៍ លោក ប៉ែន ចំរ៉ុង បានស្គាល់ម្ចាស់ហាងការ៉េម ឡឺ ក្លាស្សែស៍ ជាច្រើនឆ្នាំមកហើយ ហើយដោយការរាប់អានមានភាពស្និទ្ធស្នាលខ្លាំងជាហេតុធ្វើឲ្យមានការទុកចិត្តគ្នា ហើយក៏បានពឹងឲ្យលោកជួយរៀបចំកម្មវិធីបើកសម្ពោធហាងនេះឡើង។
លោកបានបកស្រាយទៀតថា៖ «ថៅកែ ឡឺ ក្លាស្សែស៍ គាត់ប្រគល់ឲ្យខ្ញុំរៀបចំឲ្យ ខ្ញុំបានហៅតារាច្រើនដែរ ក្នុងហ្នឹងមាន ក្រុម Original Song ដែរ ហើយ Nikiki ក៏ហៅដែរ»។
ក្នុងវត្តមានសស្រាក់សស្រាំបើកសម្ពោធហាងការ៉េមដោយគ្មានមុខអនាគតភរិយាតារាសម្ដែង នាង ភិន សុដាលីស ចូលរួមនោះ លោក ប៉ែន ចំរ៉ុង ក៏សារភាពផងថា៖ «នៅពេលនេះខ្ញុំ មិនទាន់មានគម្រោងបង្កើតមុខរបរទេ។ ប៉ុន្តែបើទៅថ្ងៃអនាគត អាចនឹងសាកល្បងរកស៊ី មុខរបរសមល្មមមួយ ពួកយើងមានគម្រោងនេះ»។
លោក ប៉ែន ចំរ៉ុង បានបញ្ជាក់ថា៖ «ពេលនេះការងារសិល្បៈមមាញឹកខ្លាំងណាស់ ដកឃ្លាមិនរួចឡើយ ចាំមើលក្រោយពីរៀបការរួចសិនចាំគិតរឿងរកស៊ីនេះ»៕