ដោយ៖​ បូ សាវី​ | ថ្ងៃសុក្រ ទី8 មករា 2016, 05:25 PM​
http://vodhotnews.com

ក្រុមគ្រួសារយុវជនដែលរងការចោទថាគម្រាមតាមបណ្ដាញសង្គម​ហ្វេស​ប៉ុនប៉ងសម្លាប់​លោក ហ៊ុន សែន ស្នើសុំឲ្យ​ដោះ​លែងសាច់​ញាតិរបស់​ពួក​គាត់វិញដោយអះអាងថាការចោទ​ប្រកាន់​នេះមិនមែន​ជា​ការ​ពិតព្រោះក្រុមគ្រួសារគាត់ជាសមាជិកគណបក្សកាន់អំណាច។​

កាលពីថ្ងៃទី០៦ខែមករានេះសមត្ថកិច្ចខេត្ដកំពងធំបានចាប់ខ្លួនយុវជនម្នាក់ឈ្មោះ ម៉ាន់ សំអ៊ាន់ អាយុ​​២៨ឆ្នាំ រស់នៅភូមិម្នាវ សង្កាត់ស្រយ៉ូវ ខេត្ដកំពង់ធំដោយចោទថាគម្រាមសម្លាប់ប្រមុខរដ្ឋាភិ​បាលតាមបណ្ដាញសង្គម។

ជនសង្ស័យត្រូវបានបញ្ជូនទៅកាន់ក្រសួងមហាផ្ទៃនិងសាលាដំបូងរាជធានីភ្នំពេញនៅថ្ងៃទី៨​ខែមករា​នេះ។

ជីតាជនសង្ស័យនិងត្រូវជាមេភូមិម្នាល សង្កាត់ស្រយ៉ូវ ក្រុងស្ទឹងសែន លោក ពេជ្រ ជា អះអាង​ប្រាប់​VODនៅរសៀលថ្ងៃនេះថា ចៅប្រុស​របស់​គាត់ឈ្មោះ ម៉ាន់ សំអ៊ាន់ មិនបានបង្ហោះសារពីការ​គម្រាមសម្លាប់​លោក​ ហ៊ុន សែន តាមបណ្ដាញសង្គមដូចការ​ចោទប្រកាន់​របស់​សមត្ថកិច្ច​ឡើយ​ដោយលោកអះអាងថាសាច់​​ញាតិ​គាត់ទាំងអស់ជាអ្នកគាំទ្រ​គណ​​បក្ស​ប្រជា​ជនកម្ពុជាខណៈលោកសង្ស័យហ្វេសប៊ុក​នេះមាន​អ្នក​បន្លំ ដើម្បី​ធ្វើបាបចៅរបស់គាត់​។ លោកបន្ដថាកន្លងមកអតីតគូរដណ្ដឹងចៅគាត់​នៅខេត្ដសៀមរាបធ្លាប់​បានគម្រាមតាមទូរស័ព្ទថារយៈពេល​៣ថ្ងៃ​ទៀត​យុវជនរូបនោះនឹងជាប់ពន្ធនាគារ។លោកមានប្រសាស៍ថា៖សូមឲ្យសម្ដេចជួយ​ចៅខ្ញុំនេះ​សមាជិកគណបក្សប្រជាជនដែរណា ខ្ញុំនៅប្រធានគណបក្សប្រជាជនសង្កាត់ហើយខ្ញុំ​ក៍ធ្លាប់ដឹងចិត្ដ​ដឹង​គំនិត​វា ពេលណាបោះឆ្នោតម្ដងៗវាឈឺចាប់ជាងគេទៀតដល់ទៅធ្វើចឹងវាអត់ត្រូវវា ដូចជាចិត្ដមិនប្រាថ្នាចឹង​វាថា​វាអត់​គោលបំណងធ្វើអីទៅលើសម្ដេចចឹងខ្ញុំសួរផ្ទាល់ណា។

ជាមួយគ្នានោះដែរម្ដាយជនសង្ស័យអ្នកស្រី ចេង លី អះអាងថា​កូនប្រុសរបស់គាត់ជាមនុស្សស្អាត​ស្អំនិងមិនធ្លាប់មានបញ្ហាជាមួយនរណាដែរ។ អ្នកស្រីថាការបង្ហោះសារគម្រាមសម្លាប់មិនដឹងជនណាពិត​ប្រាក​ដ​នោះទេប៉ុន្ដែអ្នកស្រីថា​អតីតគូរ​ដណ្ដឹង​​កូនរបស់គាត់ ធ្លាប់បានដូរទូរស័ព្ទគ្នាប្រើទៅវិញទៅមកបើទោះបីផ្ដាច់​ពាក្យ​ពីគ្នាក្ដី។ អ្នកស្រីអំពាវនាវឲ្យលោកនាយករដ្ឋមន្ដ្រីលោក ហ៊ុន សែន អន្ដរាគមន៍ដោះ​លែង​​​កូនប្រុស​របស់គាត់ឲ្យ​មាន​សេ​រីភាពវិញ។អ្នកស្រីបន្ថែមថា៖កូនខ្ញុំអាមួយហ្នឹងខ្ញុំថាវាមិនធ្វើចឹងទេ ព្រោះ​ឲ្យតែបោះឆ្នោតម្ដងៗ បោះឆ្នោតស្ដាប់លទ្ធផលហើយជួយគាំទ្រសម្ដេច ដល់សួរវារឿងរាវហ្នឹងវាថា មានតែ​គួរ​ដណ្ដឹងហ្នឹងឯងមានទូរស័ព្ទដូរចុះឡើងជាមួយគ្នាណាលោកគ្រូ។

VODមិនអាចទាក់ទងនាយនិង​នាយរងខុទ្ធកាល័យនាយករដ្ឋមន្ដ្រី​លោក ហ៊ុន សែន គឺលោក ហ៊ូ សិទ្ធី និងលោក លឹម លៀងសែ បាន​នៅ​ឡើយ​ទេដោយទូរស័ព្ទមិនអាចទាក់ទងបាន។

អ្នកឃ្លាំមើលការរំលោភសិទ្ធិមនុស្សអង្គការលីកាដូ​ខេត្ដកំពង់ធំលោក ឈូម រុណ ដែលបានស៊ើប​អង្គេត​លើករណីនេះមានប្រសាសន៍ថាការ​និយាយ​គម្រាមសម្លាប់ជាបទល្មើស ប៉ុន្ដែលោកថាការចាប់ខ្លួន​យុវ​ជនរូបនោះ​​ធ្វើឡើងដោយតក់ក្រហល់និងគ្មានភស្ដុតាងច្បាស់លាស់បើទោះបី​យុវជនរូបនោះ​សារ​ភាព​ថាខ្លួន​មិនបានប្រព្រឹត្ដដូចការ​ចោទ​ប្រ​កាន់​ក៏ដោយ។ លោកជំរុញឲ្យតុលាការផ្ដល់ភាពយុត្ដិធម៌​ដល់​ជន​រង​គ្រោះ​រូបនោះ ព្រោះការបង្ហោះសារនោះគ្រាន់​ជា​រូបភាព​មួយតូចប៉ុណ្ណោះ​៕

សូម​សរសេរ​មក​កាន់​លោក បូ សាវី តាមរយៈ savy@vodhotnews.com