Mon, 11 January 2016
ស៊ូ វុទ្ធី
ភ្នំពេញប៉ុស្តិ៍
ភ្នំពេញ: មជ្ឈដ្ឋានគ្រប់ច្រកល្ហក ដែលធ្លាប់ពោលសរសើរមិនដាច់ពីមាត់ពីគ្រួសារសិល្បៈត្រកូល «ខាត់» ថា ពួកគេមានសាមគ្គីភាពគ្នាល្អនោះ បានផ្ទុះការភ្ញាក់ផ្អើលហើយស្រឡាំងកាំង ដោយឃើញមាតាទី ២ ត្រកូល «ខាត់» អ្នកនាង ខាត់ សុឃីម បង្ហោះសារក្នុងហ្វេសប៊ុកថ្លែងត្អូញត្អែរនឹកស្តាយអតីតកាលដែលបានចំណាយលើប្អូនៗ។
វាចាលើបណ្ដាញសង្គមនេះនាំឲ្យមានការយល់ឃើញថា ពេលនេះក្រុមគ្រួសារសិល្បៈ ត្រកូល «ខាត់» ទំនងជាបែកបាក់សាមគ្គីគ្នា។បន្ថែមពីការយល់ឃើញនោះ ក៏មានមតិជាច្រើនបានលើកមកបង្ហាញពីអតីតតារាចម្រៀងពហុជំនាញរបស់អ្នកនាង ខាត់ សុឃីម បានសោយលាភលើទ្រនំសិល្បៈស្ទើរតែក្លាយជាសេដ្ឋិនី នៅពេលនេះមកសង្ខេបខ្លីថា៖ «ដំបូងឡើយ គ្រួសារសិល្បៈត្រកូល ខាត់ គ្រាន់តែជាក្រុមភ្លេងប្រពៃណីមួយធម្មតាតែប៉ុណ្ណោះនៅតាមរោងការស្រុកស្រែឯម្តុំភ្នំប្រសិទ្ធិ៍ បានលុយមួយម៉ឺនពីរម៉ឺនរៀលសម្រាប់ដូរ អង្ករជាច្រើនឆ្នាំហើយ ក្រោមការដឹកនាំរបស់ឪពុកពួកគេ។ ប៉ុន្តែដោយភាពឈ្លាសវៃពី កូនស្រីច្បង អ្នកនាង ខាត់ សុឃីម បានពង្រីកកិត្ដិសព្ទត្រកូលខ្លួនលើវិថីសិល្បៈរកលុយបានវាល់សែនដុល្លារចិញ្ចឹមប្អូនៗ និងគ្រួសារ មានផ្ទះពីរបីនៅក្រុងភ្នំពេញ»។
សំណេរចាររៀបរាប់របស់អ្នកនាង ខាត់ សុឃីម បន្ដថា៖ «ស្រណោះណាស់ រៀនមិនបានចប់ ព្រោះតែជីវភាព។កើតមកបងគេ ត្រូវទទួលមើលថែប្អូនៗ ត្រូវធ្វើជាមនុស្សធំមុនអាយុ រកហូបសឹងតែមិនគ្រប់។ តែសប្បាយចិត្តក្រុមគ្រួសារចេះយល់ចិត្តគ្នា មិនដែលមើលបំណាំគ្នាទេ និងមិនដែលស្អប់គ្នា មិនដែលធ្វើឲ្យបងពិបាកចិត្ត ដល់ឥឡូវចង់ឲ្យក្លាយជាក្មេងវិញមិនកើត»។
សារបរិយាយនេះបង្ហាញអត្ថន័យស្តែងពីគុណធម៌ជាកូនច្បង កើតក្នុងត្រកូលគ្រួសារ ដែលមានជីវភាពទីទាល់ ហើយត្រូវរ៉ាប់រងមើលថែប្អូនៗជួសអ្នកមានគុណដែលគ្មានលទ្ធភាព។ ប៉ុន្តែដែលនាំឲ្យមហាជនភ្ញាក់ផ្ញើល និងគិតថា គុណសម្បត្តិរបស់តារាចម្រៀងរៀមច្បងត្រកូល ខាត់ ចំពោះប្អូនៗនោះ ទំនងក្លាយជាការរមិលគុណពីប្អូនណាម្នាក់ហើយបានជាអ្នកនាងដាច់ចិត្តបង្ហោះជាសាធារណៈបែបនេះ។
អ្នកនាង ខាត់ សុឃីម និងស្វាមី ព្រមទាំងកូនទាំងពីរនាក់។ ហ្វេសប៊ុក
ឃ្លាដែលស្តែងឲ្យមានការយល់គិតបែបនេះ អ្នកនាង ខាត់ សុឃីម បានលើកឡើងថា៖ «សរសេរពាក្យខ្លះផ្ញើដល់បងប្អូនរួមពូជ ហាមធ្វើបាបចិត្តបង។ បងក៏ជាអ្នកមើលថែប្អូនជំនួសពុកម៉ែ។ បងគឺអណ្តូងទឹកដែលប្អូនអាចដួសហូបបានម្ដងមួយកូនផ្តិល។ សម្រាប់គ្រួសារយើង ភារកិច្ចនេះបងនឹងបញ្ចប់នៅពេលបងស្លាប់»។
យ៉ាងណាមិញ អ្នកនាង ខាត់ សុឃីម នៅតែអះអាងច្បាស់ថា សាមគ្គីភាពនៃគ្រួសារសិល្បៈត្រកូលខាត់ របស់នាង គ្មានអ្វីប្រែប្រួលនោះទេ នៅតែមានភាពល្អូកល្អិននឹងគ្នា និងនៅតែមូលគ្នាជាក្រុមសិល្បៈពហុជំនាញដដែល។
សិល្បការិនីពហុជំនាញ រៀមច្បងត្រកូល ខាត់ ដែលកំពុងទទួលភាពកក់ក្តៅនៃស្នេហាពីដើមទ្រូងស្វាមីវ័យក្មេង ក៏ប្រាប់ពីមូលហេតុដែលនាំឲ្យនាងដាច់ចិត្តបញ្ចេញសារត្អូញត្អែរពីប្អូនបង្ហោះថា៖ «វាមិនមែនជារឿងអីធំដុំដល់ថ្នាក់បរិយាយហែក.ទ្រូងនោះទេ។ តែអ្វីដែលខ្ញុំសរសេរនោះ ខ្ញុំគ្រាន់តែមានការអាក់អន់ស្រពន់ចិត្តនឹងប្អូនៗបន្តិចបន្ដួច ហើយមិនមានពេលវេលាទៅអប់រំប្អូនៗដោយផ្ទាល់ ក៏សរសេររំឭកដល់ប្អូនៗឲ្យបានឃើញនៅក្នុងបណ្តាញសង្គមហ្វេសប៊ុកទាំងអស់គ្នាហ្នឹងទៅ»។
អ្នកនាង ខាត់ សុឃីម អះអាងក្នុងន័យធៀបទៀតថា នាងមានគ្រាប់ក្នុងដៃច្រើនណាស់ តែនាងមិនបាញ់ក្នុងរង្វង់ក្រុមគ្រួសារដាច់ខាត។ អ្នកនាងបញ្ជាក់ថា គ្រាប់ទាំងនោះសម្រាប់តែទុកបាញ់អ្នកដទៃ។
អ្នកនាងលើកឡើងថា៖ «រឿងគ្រួសារខុសឆ្គងម្ដងរំលងមួយគ្រា វានឹងរលាយកំហឹងហើយ ហើយមូលហេតុដែលខ្ញុំសរសេរនេះ វាមិនមែនជាចេតនាចង់ឲ្យប្អូនខ្ញុំភ្ញាក់ខ្លួនដឹងពីអ្វីដែលខ្ញុំជា បងស្រី បានធ្វើចំពោះពួកគេមុននោះទេ។ ម្យ៉ាងទៀត សារនេះក៏ជារំឭកអស់ប្អូនៗ ដែលមានបងខំតស៊ូគ្រប់បែបយ៉ាងកន្លងមកដើម្បីប្អូននោះកុំឲ្យគេចេះតែភ្លេចខ្លួន»៕