លោក មាជ សុវណ្ណារ៉ា ក្នុងពេលដែលសមត្ថកិច្ចនាំមកសាលាដំបូងរាជធានីភ្នំពេញកាលពីពេលកន្លងមក។ ផា លីណា
Thu, 25 February 2016
មាស សុខជា
ភ្នំពេញប៉ុស្តិ៍
ភ្នំពេញៈ ក្រសួងមហាផ្ទៃបានសម្រេចអនុញ្ញាតឲ្យលោក ពេជ្រ ស្រស់ ប្រធានគណបក្សយុវជនកម្ពុជា និងសហការីទៅជួបសកម្មជនគណបក្សប្រឆាំងដែលជាប់ពន្ធនាគារព្រៃសប៉ុន្តែហាមថតរូប ថតសំឡេង និងសម្ភាសសកម្មជនទាំងនោះ។
ក្នុងលិខិតឆ្លើយតបមួយទៅកាន់លោក ពេជ្រ ស្រស់ កាលពីម្សិលមិញលោក គឹមសារិន ប្រធានពន្ធនាគារព្រៃសនៃក្រសួងមហាផ្ទៃបានអនុញ្ញាតឲ្យមេដឹកនាំគណបក្សយុវជនកម្ពុជាដែលដឹកនាំដោយលោក ពេជ្រ ស្រស់ ជួបសកម្មជនទាំង ១៥ នៃគណបក្សសង្គ្រោះជាតិក្នុងនោះរួមមាន លោក មាជ សុវណ្ណារ៉ា ប្រធានផ្នែកព័ត៌មានគណបក្សសង្គ្រោះជាតិលោក ហុង សុខហួរ សមាជិកព្រឹទ្ធសភា លោក ឃឹម ចំរើន ប្រធានយុវជន, លោក ទេព ណារិន, លោក អ៊ុក ពេជ្រ សំណាង, លោក អាន ប៉ាក់ថម, លោក ពូ ពូទិក, លោក នាង សុឃុន, លោក សាន សីហាក់, លោក សាន គឹម ហេង លោក អឿ ណារិទ្ធ, លោក យៀ ថុង, លោក រឿន ចិត្រា, លោក យុន គឹមហួរ និងលោក កែ ឃីម។
លិខិតបានបន្តថា៖ «គ្មានការថតរូប ថតសំឡេង និងសម្ភាសដោយសម្ងាត់ជាមួយនឹងអ្នកជាប់ពន្ធនាគារឡើយ»។
លោក ពេជ្រ ស្រស់ កាលពីម្សិលមិញបានអះអាងថាលោកនឹងដឹកនាំសមាជិកគណបក្សយុវជនកម្ពុជាទៅជួបសកម្មជនគណបក្សសង្គ្រោះជាតិនៅថ្ងៃនេះហើយថាលោកនឹងអនុវត្តតាមសេចក្តីជូនដំណឹងហាមឃាត់របស់ក្រសួងមហាផ្ទៃរហូតទាល់តែលោកចេញមកពីពន្ធនាគារវិញទើបលោកនឹងថ្លែងទៅកាន់អ្នកសារព័ត៌មាន។
ឆ្លើយតបទៅនឹងការបដិសេធមិនជួបមេដឹកនាំគណបក្សយុវជនកម្ពុជារបស់សកម្មជនគណបក្សសង្គ្រោះជាតិលោក ពេជ្រ ស្រស់ បានថ្លែងថាប្រសិនបើសកម្មជនទាំងនោះបានបដិសេធមិនជួបលោកជាសិទ្ធិរបស់ពួកគេហើយលោកនឹងមិនខកចិត្តនោះទេ។
លោក ពេជ្រ ស្រស់ បានបន្ថែមថា៖ «បើពួកគេ [សកម្មជន] មិនអនុញ្ញាតឲ្យ [យើង] ជួបទុកឲ្យពលរដ្ឋវាយតម្លៃទៅ។ យើងនៅតែបើកចំហបេះដូង»។
កាលពីសប្តាហ៍មុនលោក មាជ សុវណ្ណារ៉ា បានសរសេរលើហ្វេសប៊ុករបស់លោកដោយបដិសេធមិនជួបជាមួយនឹងលោក ពេជ្រ ស្រស់ ដោយលើកឡើងថាសកម្មជនគណបក្សសង្គ្រោះជាតិនឹងមិនជួបមេដឹកនាំគណបក្សយុវជនកម្ពុជាករណីគេយកព័ត៌មានពីសកម្មជនគណបក្សសង្គ្រោះជាតិហើយយកទៅបកស្រាយផ្ទុយពីការពិតដើម្បីចំណេញនយោបាយ។
កាលពីម្សិលមិញលោក ពេជ្រ ស្រស់ បានចេញលិខិតបញ្ជាក់អំពីគោលបំណងរបស់គណបក្សយុវជនកម្ពុជាក្នុងការទៅជួបសកម្មជនគណបក្សសង្គ្រោះជាតិដោយបង្ហាញពីគោលបំណង ៧ ចំណុចគឺគេចង់ដឹងពីសុខភាពរបស់ពួកគេហេតុអ្វីពួកគេត្រូវបានចាប់ខ្លួនតើពួកគេគិតយ៉ាងម៉េចពីការអនុវត្តច្បាប់ក្នុងប្រទេសកម្ពុជាលើអ្នកនយោបាយ …។
លោក ពេជ្រ ស្រស់ បានសរសេរថា៖ «ខ្ញុំ ពេជ្រ ស្រស់ និងមន្ត្រីជាន់ខ្ពស់ទាំងអស់នៃ [គណបក្សយុវជនកម្ពុជា] គ្រាន់តែចង់ដឹងថាចំណុចមួយចំនួនដូចដែលបានរៀបរាប់ខាងលើ… ពីព្រោះយើងជាអ្នកនយោបាយជំនាន់ថ្មីដែលទើបតែទទួលបានសុពលភាពជាអ្នកនយោបាយស្របច្បាប់ និងចង់ [ទៅជួប] អ្នកនយោបាយដូចគ្នា»៕TK