Fri, 26 February 2016
មាស សុខជា
ភ្នំពេញប៉ុស្តិ៍
ភ្នំពេញៈ កញ្ចប់ថវិកាចំនួន ៧២០ លានរៀលត្រូវបានរៀបចំរួចហើយសម្រាប់តំណាងរាស្រ្តសំឡេងភាគច្រើន និងតំណាងរាស្រ្តសំឡេងភាគតិចប្រើប្រាស់ក្នុងរយៈពេលមួយឆ្នាំដើម្បីបំពេញការងាររបស់ខ្លួន។
អ្នកនាំពាក្យរបស់រដ្ឋសភាលោក ឡេង ប៉េងឡុង បានប្រាប់ភ្នំពេញ ប៉ុស្តិ៍កាលពីម្សិលមិញថាគណៈកម្មាធិការអចិន្រៃ្តយ៍របស់រដ្ឋសភានឹងពិភាក្សាសម្រេចជាផ្លូវការនៅខែក្រោយលើកញ្ចប់ថវិកាចំនួន ៧២០ លានរៀល និងរថយន្តទំនើបចំនួនពីរគ្រឿងដើម្បីអនុញ្ញាតឲ្យតំណាងរាស្រ្តគណបក្សប្រជាជនកម្ពុជា និងតំណាងរាស្រ្តគណបក្សសង្គ្រោះជាតិប្រើប្រាស់ចាប់ពីខែក្រោយ។
លោក ប៉េងឡុង បានបញ្ជាក់ថាកញ្ចប់ថវិកាចំនួន ៧២០ លានរៀលនឹងបែងចែកសម្រាប់តំណាងរាស្រ្តគណបក្សទាំងពីរប្រើប្រាស់សម្រាប់រយៈពេលមួយឆ្នាំទៅតាមចំនួនសមាមាត្រនៃចំនួនតំណាងរាស្រ្តមានន័យថាគណបក្សប្រជាជនឈ្នះ ៦៨ អាសនៈត្រូវទទួលបានកញ្ចប់ថវិកាច្រើនជាងគណបក្សសង្គ្រោះជាតិដែលទទួលបានអាសនៈចំនួន ៥៥ នៅក្នុងរដ្ឋសភា។
លោកបន្តថា៖ «លុយយើងមាននៅក្នុងកញ្ចប់រួចហើយ។ គណៈកម្មាធិការអចិន្រៃ្តយ៍សម្រេចជាគោលការណ៍សិនបន្ទាប់មកយើងអាចចំណាយបាន»។
ចំពោះរថយន្តទំនើប ២ គ្រឿងដែលទិញសម្រាប់តំណាងរាស្រ្តសំឡេងភាគច្រើន និងតំណាងរាស្រ្តសំឡេងភាគតិចលោក ប៉េងឡុង បានបញ្ជាក់ថារថយន្តមួយគ្រឿងគឺសម្រាប់មេដឹកនាំតំណាងរាស្រ្តគណបក្សប្រជាជនលោក ស ខេង និងមួយទៀតសម្រាប់មេដឹកនាំតំណាងរាស្រ្តសំឡេងភាគតិចដែលអាចសម្រាប់ប្រធានស្តីទីនៃគណបក្សសង្គ្រោះជាតិលោក កឹម សុខា។
អ្នកនាំពាក្យតំណាងរាស្រ្តគណបក្សសង្គ្រោះជាតិលោក យ៉ែម បុញ្ញឫទ្ធិ បានថ្លែងថាចំនួនកញ្ចប់ថវិកានេះគឺតិចតួចណាស់សម្រាប់ការចំណាយប្រចាំខែក្នុងការបំពេញការងារ។
លោកបន្តថា៖ «យើងគិតថាវាផ្អែកទៅលើគម្រោងដែលសភាស្នើហើយដោយសារមានការអនុម័តរួចហើយដូច្នេះយើងគិតថាយើងនឹងជជែកពិភាក្សាលើគម្រោងពេលក្រោយ»។
ប៉ុន្តែអ្នកនាំពាក្យតំណាងរាស្រ្តគណបក្សប្រជាជនលោក ឈាង វុន ថ្លែងថាចំនួនកញ្ចប់ថវិកានេះគឺគ្រប់គ្រាន់ពីព្រោះមានរថយន្ត និងសាំងសម្រាប់ពួកគេធ្វើការហើយតំណាងរាស្រ្តទាំងនោះក៏មានប្រាក់ខែរបស់ខ្លួនជាតំណាងរាស្រ្តផងដែរ។ «ប្រសិនបើដំណើរការទៅខ្វះសម្រាប់ឆ្នាំនេះឆ្នាំក្រោយយើងនឹងដំឡើងបន្តិចទៀត»៕ PS