ពិធីសូត្រមន្ដនៅសណ្ឋាគារសូហ្វីតែល ត្រូវបានចោមរោមផ្ដិតយករូបភាពដោយអ្នកកាន់កាមេរ៉ាគ្រប់ជ្រុងតែម្ដង។ ហេង ជីវ័ន
Tue, 15 March 2016
ស៊ូ វុទ្ធី
ភ្នំពេញប៉ុស្តិ៍
ភ្នំពេញ: អធិកអធមលើសគូស្នេហ៍អ្នកសិល្បៈ នានា ដល់ថ្នាក់ជ្រើសរើសសណ្ឋាគារលំដាប់ផ្កាយ សូហ្វីតែល ធ្វើជាផ្ទះលោកភោគសេដ្ឋី និងជាល្វែងជ័យរៀបទុកដាក់ផ្កាស្លា សំពះផ្ទឹម ទទួលភ្ញៀវពិសាភោជនាហារនោះ គូស្នេហ៍សិល្បៈស្រីស្អាត និងប្រុសស្អាត កូនក្រមុំនាង គង់ ច័ន្ទស្រីមុំ និងកូនកំលោះ លោក គឹម សីហា ក៏ទទួលបានកាដូពិសេស បំពេញបំណងទៅក្រេបទឹកឃ្មុំនៅកោះម៉ាល់ឌីវ បីយប់បួនថ្ងៃ ពីអ្នកនាង យ៉ាន លីនដា អតីតភរិយាលោក យ៉ែម សំអូន ចងដៃពីដែនកោះអូស្រ្តាលី ឲ្យភ្ញាក់ផ្អើលអស់អ្នកសិល្បៈបន្ថែមផងដែរ។
កូនកំលោះ កូនក្រមុំ និងអ្នកម្ដាយទាំងសងខាង។ ហេង ជីវ័ន
ចំណងស្នេហ៍ស្គាល់ចិត្តស្គាល់ថ្លើមគ្នា ជិត ១០ ឆ្នាំ របស់តារាសម្ដែង នាង គង់ ច័ន្ទស្រីមុំ និងលោក គឹម សីហា ក៏ស្រោចនូវព័ត៌មាននិន្ទាសង្គម រួមខ្នើយរំលងប្រពៃណីនោះ នៅថ្ងៃទី ១៤ ខែមីនា នេះត្រូវបានលាងជម្រះហើយ ដែលរំលេចចេញពីពិធីដឹកដៃគ្នាក្រាបផ្ទឹម អមដោយសំឡេងភ្លេងការផ្អើលទាំងជាតិសាសន៍បរទេស បន្លឺឡើងឯសណ្ឋាគារសូហ្វីតែល ជាមួយពរជ័យពីមេបាទាំងសងខាង និងការអបអរពីមិត្តភក្ដិយ៉ាងកុះករ។
ពិធីអាពាហ៍ពិពាហ៍ដ៏មានអត្ថន័យជីវិត តែរំលងពិធីហែជំនូននោះ កូនកំលោះរូបសង្ហាជាប្រុសស្អាតឆ្នាំ ២០០៧ លោក គឹម សីហា ក៏សារភាពថា៖ «មុនជីវិតស្នេហាមានដល់ថ្ងៃនេះ (រៀបការ) ពួកយើងក៏ជួបរឿងថ្នាំងថ្នាក់គ្នាជាច្រើនដែរ។ ប៉ុន្តែច្រើនកើតឡើងពីការស្រឡាញ់គ្នា មិនចង់ឲ្យឃ្លាតគ្នា»។
លោក សីហា សារភាពទៀតថា៖ «ពួកយើងស្រឡាញ់គ្នា ក៏មិនដែលចង់បែកគ្នាមួយជំហានដែរ ទៅណាក៏ទៅជាមួយគ្នា ហើយក៏មិនដែលគិតឡើយថា ពួកយើងបែកគ្នាព្រោះថាពួកយើងស្រឡាញ់គ្នា យល់ចិត្តគ្នា សូម្បីធ្វើជំនួញក៏ទុកចិត្តគ្នាខ្លាំងដែរ»។
លោក គឹម សីហា លើកឡើងឲ្យដឹងថា៖ «វាគ្មានអ្វីប្លែកទេ ដែលអាពាហ៍ពិពាហ៍រៀបនៅសណ្ឋាគារនេះ។ តែវាក៏ភ្ញាក់ផ្អើលដែរ ព្រោះពិធីនេះក៏ធំដែរ អញ្ជើញភ្ញៀវ ៧០ តុ ជាមួយការចំណាយក៏ច្រើនម៉ឺនដែរ»។
ភ្ញាក់ផ្អើលលើសពីពិធីរៀបមង្គលការធ្វើនៅសណ្ឋាគារលំដាប់ផ្កាយ ចំណាយលុយជិត ១០ ម៉ឺនដុល្លារ និងចិញ្ចៀនពេជ្រ ថ្លៃជាងពាក់កណ្តាលសែនដុល្លារ លោកគឹម សីហា បំពាក់ឲ្យនាង គង់ ច័ន្ទស្រីមុំ នោះ នៅលើបណ្តាញសង្គមហ្វេសប៊ុក ពីអ្នកនាង យ៉ាន លីនដា អតីតភរិយា លោក យ៉ែម សំអូន ដែលប្រើសំឡេងថា៖ «សុំទោសប្អូន ស្រីមុំ និង ប្អូនប្រុស សីហា បងរវល់ការ មិនបានទៅចូលរួមក្នុងកម្មវិធីអាពាហ៍ពិពាហ៍នោះ»។
អ្នកនាង យ៉ាន លីនដា ក៏បញ្ជាក់ថា៖ «បងឮថាប្អូនប្រាថ្នាចង់ទៅលេង កោះម៉ាល់ឌីវ ដូច្នេះបងជូនកាដូប្អូន គូស្វាមី ភរិយាថ្មីមួយគូនេះធ្វើដំណើរកម្សាន្តក្រេបទឹកឃ្មុំ នៅកោះម៉ាល់ឌីវនេះ រយៈពេល ៣ យប់ ៤ ថ្ងៃ សម្រាប់ជាចំណងដៃ នឹងអនុស្សាវរីយ៍ ដល់កញ្ញា គង់ ច័ន្ទស្រីមុំ នឹងលោក គឹម សីហាផងដែរ»៕