រូបថតពីខួបកំណើតនាងឆ្នាំមុន និងសារនាងទើបបង្ហោះថ្មីៗនេះ។ ហ្វេសប៊ុក
Thu, 9 June 2016
ស៊ូ វុទ្ធី
ភ្នំពេញប៉ុស្តិ៍
ភ្នំពេញ: ដំណើរឈានឡើងទៅភ្ជាប់ខ្លួននឹងឥស្សរជនជាន់ខ្ពស់ ផុតពីប្រជាប្រិយភាពសិល្បៈ ពីឱកាសលើកស្ទួយកំពូលស្នេហ៍ជាអ្នកជំនួញវ័យក្មេងល្បីមានទ្រព្យស្តុក លោក ហេង ឡុង ស្នេហ៍ស្និទ្ធទាំងមិនមានពិធីប្រពៃណី អ្នកនាង ចន ច័ន្ទលក្ខិណា ដែលជោគជ័យលើជំនួញផ្ទាល់ខ្លួនផងដែរនោះ បែរជាប្រកាសធ្វើខ្លួនជាមនុស្សឯកាសម្រាប់ថ្ងៃកំណើត និងមិនទទួលយកកាដូនាំជំពាក់កម្ម។
ភ្លាមៗបន្ទាប់ពីជំនួបស្នេហ៍ជាមួយនឹងបុរសពោះម៉ាយកូនមួយ អ្នកជំនួញវ័យក្មេងឈ្មោះ ហេង ឡុង ទាំងរងពាក្យចំអកឡកឡឺយថា (បងបានកូន អូនបានឱបដុំដុល្លារ) នោះ តារាសម្ដែង និងម៉ូដែលអ្នកនាង ចន ច័ន្ទលក្ខិណា ថ្ងៃធ្វើខួបកំណើត កាលពីថ្ងៃទី ១៨ ខែ មិថុនា ឆ្នាំ ២០១៥ (មុនថ្ងៃកំណើតពិត ២០ ខែមិថុនា) ក៏បានសាងភាពភ្ញាក់ផ្អើល ដែលសូម្បីតែអ្នកសិល្បៈរួមអាជីពក៏ទប់ចិត្តទ្រាំមិនសរសើរមិនបាន ដោយឪពុកម្តាយបង្កើតគូស្នេហ៍ជូនកាដូគ្រឿងពេជ្រមួយឈុតថ្លៃរាប់ម៉ឺនដុល្លារ ប្រគល់ឲ្យម្ចាស់ស្នេហ៍បំពាក់ឲ្យនាងដោយផ្ទាល់ដៃ។
មើលឃើញពីទឹកចិត្តអធ្យាស្រ័យពីអ្នកមានគុណម្ចាស់ស្នេហ៍នៅថ្ងៃខួបកំណើត និងភាពស្និទ្ធស្អិតស្នេហ៍ពីសង្សារជាអ្នកជំនួញ សូម្បីតែអនាគតក៏ត្រៀមបានល្អ ក៏សង់វីឡាសម្រាប់រួមរស់សាងសុភមង្គលដែរនោះ មហាជនដែលធ្លាប់តែថ្លែងពាក្យចំអកឡកឡឺយពីជំនួបស្នេហ៍អ្នកនាង ចន ច័ន្ទលក្ខិណា ក៏លាន់មាត់ដែរថា៖ «អនាគត តារាសម្តែងម្នាក់នេះ នឹងមិនមានអ្វីមករំខានអារម្មណ៍គេបានទៀត បើមានបុរសស្រឡាញ់យល់ចិត្តហើយ ហើយឪពុកម្តាយខាងប្រុសក៏ឲ្យតម្លៃនាងទៀត នេះខួបកំណើតនៅជំនួបឆ្នាំដំបូង នៅឆ្នាំបន្តនឹងធំគគ្រឹកគគ្រេងប៉ុនណា បើអ្នកនាង ចន ច័ន្ទលក្ខិណា ខ្លួនឯងក៏ជោគជ័យលើជំនួញដែរនោះ»។
បែរជាតារាសម្តែងរាសីអណ្តែតខ្ពស់ក្រោយភ្ជាប់ជំនួបស្នេហ៍នឹងលោក ហេង ឡុង រូបនេះ ខណៈខែកំណើតក៏ចូលដល់ រង់ចាំតែថ្ងៃបង្គ្រប់វ័យ ៣៦ ឆ្នាំនោះ ក៏ធ្វើឲ្យមហាជនភ្ញាក់ផ្អើលផ្ទុយពីការរំពឹង ពីសារបង្ហោះក្នុងទំព័រហ្វេសប៊ុករបស់នាង។
បន្ថែមពីរូបថតអង្គុយបត់ជើងដៃកាន់ធូបបន់ស្រន់នៅមុខព្រះនោះ អ្នកនាង ចន ច័ន្ទលក្ខិណា បរិយាយថា៖ «ក្តីប៉ងប្រាថ្នាសម្រាប់ខួបកំណើតឆ្នាំនេះ គឺសុំនៅម្នាក់ឯង មិនចង់ជួបអ្នកណា មិនចង់ឲ្យមានពិធីអ្វីទាំងអស់ ព្រោះរឿងរ៉ាវឆ្នាំមុននៅថ្ងៃខួប គឺជាបណ្តាសាជីវិតខ្ញុំឲ្យអាប់អួ ១ ឆ្នាំពេញ ហើយខ្ញុំក៏លែងចង់ជួបមនុស្សទាំងឡាយ ព្រោះថា ភាពពុតត្បុតរបស់មនុស្សមួយចំនួនគឺធ្វើឲ្យខ្ញុំខ្លាច រាងមួយជីវិត»។
ក្នុងសារដដែលនោះ តារាសម្តែងមេម៉ាយកូនមួយ ដែលកំពុងភ្ជាប់ស្នេហ៍នឹងបុរសអ្នកជំនួញពោះម៉ាយកូនមួយដូចគ្នា និងបណ្តើរគ្នាដោយបើកចំហផ្អើលទាំងមន្ត្រី ទាំងអ្នកសិល្បៈនោះ នាងលើកឡើងដែរថា៖ «មិនចង់ជំពាក់គុណអ្នកណាទៀតឡើយ ព្រោះការរំឭកគុណវាធ្វើឲ្យខ្ញុំឆ្អែត សង្ឃឹមថា ក្តីប៉ងប្រាថ្នារបស់ខ្ញុំនឹងបានដូចបំណង ហើយខ្ញុំក៏មិនចូលចិត្តប្រារព្ធកម្មវិធីខួបកំណើតដែរ ហើយខ្ញុំជឿថា បើគ្មានពិធីគឺនឹងលែងមានការរិះគន់ និងវាយប្រហារឡើយ ព្រោះសូម្បីតែថ្ងៃសិរីសួស្តីរបស់មនុស្សក៏មិនលើកលែង»។
នៅមិនដឹងថាក្នុងដំណើរជីវិត លើជំនួបស្នេហ៍ ជាមួយអ្នកជំនួញទ្រព្យស្តុក ធ្លាប់បានទទួលកាដូគ្រឿងពេជ្រដ៏មានតម្លៃ ធ្វើឲ្យអ្នកនាង ចន ច័ន្ទលក្ខិណា ទទួលបានភាពកក់ក្តៅឬក៏រងនូវស្ថានភាពយ៉ាងណានោះទេ ខណៈថ្ងៃខួបកំណើតក៏ជិតមកដល់ នាងបែរជា សរសេរសារបង្ហោះបែបនេះ ហើយទំនាក់ទំនងទៅនាងក៏មិនមានអ្នកទទួលទូរស័ព្ទ៕