ដោយ លោក សូរ្យ ជ័យឧត្ដម | ថ្ងៃអាទិត្យ ទី៥ ខែមីនា ឆ្នាំ២០១៧
http://vodhotnews.com
លោកនាយករដ្ឋមន្រ្តី ហ៊ុន សែន និងលោក កឹម សុខា កាលពីកន្លងទៅ
សារសន្ទនារវាងលោកនាយករដ្ឋមន្ត្រី ហ៊ុន សែន និងមេដឹកនាំបក្សប្រឆាំង លោក កឹម សុខា ត្រូវបានទំព័រហ្វេសប៊ុកឈ្មោះ “សីហា” បញ្ចេញជាសាធារណៈកាលពីល្ងាចថ្ងៃម្សិលមិញនេះ។
បើតាមទំព័រហ្វេសប៊ុកដដែលនេះ បានឲ្យដឹងថា សារសន្ទនានោះ បានកើតឡើងកាលពីថ្ងៃទី២៥ ខែកញ្ញា ឆ្នាំ២០១៦ ពោលគឺចំពេលដែលលោក កឹម សុខា បានស្នាក់នៅក្នុងទីស្នាក់ការកណ្ដាលគណបក្សសង្គ្រោះជាតិ ខណៈដែលលោកប្រឈមនឹងបណ្ដឹងពាក់ព័ន្ធនឹងការចោទថា បានបដិសេធបង្ហាញខ្លួននៅតុលាការ។
សារសន្ទនានោះ បានបង្ហាញថា លោកនាយករដ្ឋមន្ត្រី ហ៊ុន សែន បានជំរុញទៅលោក កឹម សុខា ឲ្យថ្លែងវាយប្រហារទៅលើលោក សម រង្ស៊ី អតីតប្រធានគណបក្សសង្គ្រោះជាតិដែលទើបលាលែងពីតំណែងកាលពីប៉ុន្មានសប្ដាហ៍មុននេះ។
ក្នុងសារសន្ទនានោះ លោក ហ៊ុន សែន ប្រាប់ទៅលោក កឹម សុខាថា៖ “ផែនការហ្នឹងណ៎ា! ខាឯងត្រូវយល់ ហេតុអីបានជាសុខៗ គេធើអីចឹង បានសេចក្ដីថា គោលដៅរបស់គេ គេចង់ឲ្យខ្ញុំចាប់ខាទាល់តែបានហ្នឹង។ ខាមើលទៅ! ឥឡូវខាឯងគួរតែទះវាមួយកំផ្លៀងទៅ! គួរតែទះវាមួយកំផ្លៀងទៅ! កុំចាំបាច់ទៅថ្លែងការណ៍ជាសាធារណៈអី លេងតាមហ្វេសប៊ុករបស់ខ្លួនវិញ”។
លោក ហ៊ុន សែន បានព្រមានថា ប្រសិនបើលោក កឹម សុខា នៅតែភ្ជាប់ខ្លួនជាមួយលោក សម រង្ស៊ី លោក កឹម សុខា នឹងប្រឈមមុខនឹងគ្រោះថ្នាក់ផងដែរ។
លោក ហ៊ុន សែន ប្រាប់ថា៖ “ខ្ញុំប្រាប់ខាឯងឲ្យច្បាស់ ខ្ញុំអាចធ្វើការជាមួយខាឯងបាន តែរឿង រង្ស៊ី ខ្ញុំមិនលើកលែងទេ។ បើសិនថា ខាឯងនៅតែភ្ជាប់ខ្លួន ខាឯងក៏គ្រោះថ្នាក់ដែរ។ កុំថាមួយ កុំថាពីរ ប្រាំក៏ខ្ញុំលេងដែរ ប៉ុន្តែ សូមកុំភ្លេចថា ហើយខ្ញុំអត់ខ្លាចទេ ទោះបីថា អាមេរិកលើកទ័ពចូលស្រុកខ្មែរ សាកល្បងលមើលទៅ ខ្ញុំអត់ខ្លាចទេ”។
លោក ហ៊ុន សែន បន្ថែមថា៖ “អាហ្នឹងបានដឹងថា…ប៉ុន្តែ ខ្ញុំអស់និស្ស័យជាមួយអារង្ស៊ីហើយ! ខ្ញុំប្រាប់ឲ្យច្បាស់អញ្ចឹងហ្មង។ ហើយខ្ញុំអត់លើកលែងបានទេ! ប៉ុន្តែ រឿងបញ្ហាហ្នឹង គឺថា និយាយរួម ខាឯងក្ដាប់យកកម្លាំងតែម្ដងទៅ! ពេលហ្នឹង ខាឯងយកទៅ! យកបាន! ខា ឯងយកបក្សហ្នឹងបាន!”។
ទោះជាយ៉ាងណា លោក ហ៊ុន សែន បាននិយាយការពារខ្លួនប្រាប់ទៅលោក កឹម សុខា ថា រូបលោកនិយាយបែបនោះ មិនមែនចង់ញុះញង់បំបែកបំបាក់គណបក្សប្រឆាំងនោះឡើយ។
លោក ហ៊ុន សែន បញ្ជាក់ប្រាប់ទៅលោក កឹម សុខា ថា៖ “[…] អញ្ចឹង ខ្ញុំមិនអាចឲ្យប្រើ កុំយកសម្ដីរបស់ខ្ញុំទៅថា ខ្ញុំជាអ្នកបំបែក! ប៉ុន្តែ ខ្ញុំ អាហ្នឹងអ្នកឯង បើនិយាយពីខាងណោះវិញ ប៉ុន្មានថ្ងៃនេះ គេសង្ឃឹមរឿងខ្ញុំបែបទៅវិញ!”។
លោកនាយករដ្ឋមន្ត្រី ហ៊ុន សែន បានជំរុញបែបនេះ ដោយលើកហេតុផលថា លោកទទួលយកមិនបានទេ ចំពោះការចោទប្រកាន់ថា ភរិយា និងកូនប្រុសច្បងរបស់លោក គឺលោក ហ៊ុន ម៉ាណែត ជាអតីតភរិយា និងកូនប្រុសមេដឹកនាំវៀតណាម ឡេ ដឹកថូ។
ការបញ្ចេញសារសន្ទនានេះ បានកើតឡើងតែប៉ុន្មានថ្ងៃប៉ុណ្ណោះ ក្រោយពីលោក កឹម សុខា ត្រូវបានសមាជគណបក្សសង្គ្រោះជាតិ ជ្រើសតាំងឲ្យធ្វើជាប្រធានថ្មី បន្ទាប់ពីលោក សម រង្ស៊ី លាលែងកាលពីថ្ងៃទី១១ ខែកុម្ភៈកន្លងមកនេះ៕
បើតាមការពិចារណារបស់ខ្ញុំឃើញថា(សីហា)កំពុងវាយក្បាល ហ៊ុន សែន និងកន្ថោព្រោះយើងដឹងទាំងអស់គ្នាហើយថាលោក កឹម សុខា បានទាក់ទងទៅលោក សម រង្សី នៅពេលនោះដើម្បីបកស្រាយរឿងរាវទាំងអស់ជូនលោក សម រង្សី!ហើយក្រោយមកលោក សម រង្សី បានលាឈប់ក៏ដោយសាររឿងការកែប្រែច្បាប់មិនមែនដោយសារកម្រោង ហ៊ុន សែន ឯណា។សំនួរសួរថាតើ(សីហា)នេះជារបស់អ្នកណាគេជួយលោក កឹម សុខា រួចហើយខោកក្បាល ហ៊ុន សែន និងកន្ថោ ឬក៏ដោយសារភាពមិនឆ្លាតវៃរបស់(សីហា)ខាងផ្លូវនយោបាយ ?? ការបញ្ចេញសារមួយនេះខាតខ្លាំងណាស់ដល់លោក ហ៊ុន សែន។
ហ៊ុនសែនប្រឹងច្របាច់កសមរង្ស៊ីកឹមសុខាតែភ្លេចថាអ្នកដែលលានអណ្ដាតគឺខ្លួនឯង