ដោយ លោក សូរ្យ ជ័យឧត្ដម | ថ្ងៃអាទិត្យ ទី១៩ ខែមីនា ឆ្នាំ២០១៧
http://vodhotnews.com
លោក សុខ អាន កាលពីពេលកន្លងទៅ
គណបក្សកាន់អំណាច កាលពីថ្ងៃម្សិលមិញនេះ បានប្រកាសរ៉ាប់រងការចំណាយលើពិធីបុណ្យសពលោក សុខ អាន និងស្នើឲ្យបង្វែរថវិកាចំណាយនោះ ទៅឲ្យរដ្ឋវិញ។
លោក សុខ អាន បានទទួលមរណភាពកាលពីព្រលប់ថ្ងៃទី១៥ ខែមីនានេះ ហើយរដ្ឋាភិបាលបានសម្រេចប្រើប្រាស់ថវិកាជាតិចំនួន ៧៥ម៉ឺនដុល្លារ សម្រាប់ចំណាយលើការរៀបចំពិធីបុណ្យសពនេះ។ ការចំណាយថវិកាជាតិទៅលើពិធីបុណ្យសពលោក សុខ អាន នេះ ជំរុញឲ្យមានការរិះគន់ពីបក្សប្រឆាំង និងសង្គមស៊ីវិល។
ក្នុងលិខិតគណបក្សប្រជាជនកម្ពុជា កាលពីថ្ងៃម្សិលមិញនេះ អនុប្រធានបក្ស លោក សាយ ឈុំ បានស្នើទៅលោកនាយករដ្ឋមន្ត្រី ហ៊ុន សែន ឲ្យបង្វែរថវិកានោះជូនរដ្ឋវិញ ហើយគណបក្សធានារ៉ាប់រងលើការចំណាយនោះ។
នៅក្នុងលិខិតដដែលនោះ លោកនាយករដ្ឋមន្ត្រី ហ៊ុន សែន ដែលជាដន្លងជាមួយសពលោក សុខ អាន ផងនោះ បានចារថា “យល់ព្រម”៕