លោក អ៊ុំ សំអាន តំណាងរាស្ត្រគណបក្សប្រឆាំងត្រូវបញ្ជូនមកសាលាឧទ្ធរណ៍កន្លងមក។ ហេង ជីវ័ន
Fri, 7 April 2017
Cristina Maza and មាស សុខជា
ភ្នំពេញប៉ុស្តិ៍
ភ្នំពេញៈ សមាជិកសភាទូទាំងពិភពលោកបានសម្លឹងមើលលទ្ធិប្រជាធិបតេយ្យរបស់កម្ពុជា ដោយសមាជិកសភាអឺរ៉ុប និងសហភាពអន្តរសភា (IPU) បានធ្វើការថ្កោលទោសចំពោះការបង្ក្រាប និងការធ្វើទុក្ខបុកម្នេញទៅលើគណបក្សសង្គ្រោះជាតិដែលជាគណបក្សប្រឆាំង។
នៅរដ្ឋធានីនៃប្រទេសបង់ក្លាដែសកាលពីថ្ងៃពុធសន្និបាតសហភាពអន្តរសភា (IPU) ដែលតំណាងឲ្យប្រទេសចំនួន ១៧១ បានអនុម័តលើសេចក្តីសម្រេចមួយដោយអំពាវនាវឲ្យមានការយកចិត្តទុកដាក់ចំពោះការចាប់ខ្លួនការធ្វើទុក្ខបុកម្នេញ និងការព្យួរអភ័យឯកសិទ្ធិសមាជិកសភារបស់អ្នកតំណាងរាស្ត្រគណបក្សប្រឆាំងពីរដ្ឋសភា។
សេចក្តីថ្លែងការណ៍របស់សហភាពអន្តរសភា (IPU) បានថ្លែងថា៖ «សហភាពអន្តរសភា (IPU) មានការភ្ញាក់ផ្អើល ចំពោះការយាយីកាន់តែខ្លាំងឡើងទៅលើសមាជិកគណបក្សប្រឆាំងក្នុងប្រទេសកម្ពុជា»។ «IPU ក៏មានក្តីបារម្ភផងដែរអំពីគណបក្សប្រឆាំងមួយគឺគណបក្សសង្គ្រោះជាតិដែលអាចត្រូវរំលាយ និងមិនអនុញ្ញាតឲ្យចូលរួមក្នុងការបោះឆ្នោតនាពេលខាងមុខ»។
ច្បាប់ស្តីពីគណបក្សនយោបាយដែលទើបត្រូវបានអនុម័តកាលពីពេលថ្មីៗនេះបានផ្តល់អំណាចដល់អាជ្ញាធរក្នុងការរំលាយគណបក្សនយោបាយណាមួយដែលបំពានច្បាប់ ឬគំរាមកំហែងដល់ឯកភាពជាតិ ឬសន្តិសុខជាតិ។ ច្បាប់នេះត្រូវបានចាត់ទុកយ៉ាងទូលំទូលាយថាជាការផ្តល់ឲ្យគណបក្សប្រជាជនកម្ពុជានូវឧបករណ៍ច្បាប់ដើម្បីរំលាយគណបក្សនយោបាយណាមួយដែលជាគូប្រជែងនយោបាយរបស់ខ្លួន។
នៅក្នុងការបង្ហោះលើហ្វេសប៊ុកកាលពីថ្ងៃពុធលោក សម រង្ស៊ី អតីតប្រធានគណបក្សប្រឆាំងបានថ្លែងថាសេចក្តីថ្លែងការណ៍របស់សហភាពអន្តរសភា (IPU) បង្ហាញថាសហភាពអន្តរសភានេះជឿថាអាជ្ញាធរប្រទេសកម្ពុជាមិនមានឆន្ទៈនយោបាយ ដោះស្រាយករណីរំលោភសិទ្ធិមនុស្សទេ។ លោក សម រង្ស៊ី ថ្លែងបន្តថា៖ «សហភាពអន្តរសភាយល់ថាការចូលរួមរបស់គណបក្សសង្គ្រោះជាតិក្នុងការបោះឆ្នោតខាងមុខមានសារៈសំខាន់យ៉ាងខ្លាំងជាទីបំផុត»។
ប៉ុន្មានថ្ងៃមុននោះសមាជិកសភាអឺរ៉ុបបានបង្កើតក្រុមការងារថ្មីមួយឈ្មោះថាក្រុមការងារគាំទ្រលទ្ធិប្រជាធិបតេយ្យក្នុងប្រទេសកម្ពុជា។ ក្រុមនេះមានគោលបំណងដាក់សម្ពាធទៅសហភាពអឺរ៉ុបឲ្យប្រើប្រាស់ឥទ្ធិពលសេដ្ឋកិច្ច ដែលជាដៃគូពាណិជ្ជកម្មសំខាន់មួយជាមួយកម្ពុជាជំរុញឲ្យកម្ពុជាកែលម្អស្ថានភាពសិទិ្ធមនុស្ស។
Umberto Gambini ដែលជាសមាជិកបុគ្គលិកសភាអឺរ៉ុបបានថ្លែងថា៖ «ខ្ញុំគិតថាការពិចារណាលើពាណិជ្ជកម្មកំពុងតែមានសារៈសំខាន់ខ្លាំងពេកដែលធ្វើឲ្យយើងភ្លេចលទ្ធិប្រជាធិបតេយ្យ នីតិរដ្ឋ និងសិទ្ធិមនុស្ស»។ «សហភាពអឺរ៉ុបមានឧបករណ៍ដើម្បីដើរតួ និងព្យួរកិច្ចព្រមព្រៀងពាក់ព័ន្ធជាមួយកម្ពុជា»។
សមាជិកសភាអឺរ៉ុប Neena Gill ដែលជាសមាជិកម្នាក់ទៀតនៃក្រុមការងារនេះបានថ្លែងថាការវាយប្រហារទៅលើគណបក្សប្រឆាំងព្រមទាំងការវាយប្រហារទៅលើសកម្មជនសិទ្ធិមនុស្ស សិទ្ធិការងារ និងសិទ្ធិដីធ្លី គឺជាក្តីបារម្ភដ៏ធំមួយ។ Gill ថ្លែងតាមអ៊ីមែលថា៖ «ដើម្បីឲ្យប្រជាធិបតេយ្យក្នុងប្រទេសកម្ពុជាទទួលបានភាពរីកចម្រើន វាសំខាន់ដែលការបោះឆ្នោតឃុំ សង្កាត់ឆ្នាំនេះ និងការបោះឆ្នោតជាតិក្នុងឆ្នាំ ២០១៨ ត្រូវធ្វើឡើងក្នុងលក្ខណៈសេរី និងយុត្តិធម៌»។ «នេះទីមួយតម្រូវឲ្យមានការចូលរួមពីគណបក្សប្រឆាំងប្រកបដោយអត្ថន័យ»។
កិច្ចប្រជុំបន្ទាប់របស់ក្រុមនេះនឹងធ្វើឡើងនៅថ្ងៃទី ២៦ ខែមេសា ហើយនឹងរួមមានបញ្ជីឧបករណ៍ឡប់ប៊ីដូចជាការចេញសំណួរអាទិភាពដែលជាបញ្ហាដែលត្រូវពិនិត្យ និងឆ្លើយតបដោយស្នងការសហភាពអឺរ៉ុប និងការសរសេរលិខិត។
ក្រុមនេះបច្ចុប្បន្នមានសំណួរអាទិភាពមួយដែលនៅរង់ចាំការឆ្លើយតបហើយកំពុងពិចារណាចេញសេចក្តីសម្រេចរបស់សភាស្តីពីកម្ពុជានាឆ្នាំនេះ។
Gambini ថ្លែងថា៖ «យើងកំពុងប្រើប្រាស់ឧបករណ៍ទាំងអស់របស់យើងដែលមាន»។
ក្រុមនេះក៏នឹងអញ្ជើញឯកអគ្គរដ្ឋទូតសហភាពអឺរ៉ុបប្រចាំកម្ពុជាឲ្យចូលរួមការពិភាក្សារបស់ខ្លួនផងដែរ។
ឯកអគ្គរដ្ឋទូតសហភាពអឺរ៉ុបប្រចាំកម្ពុជា George Edgar បានបញ្ជាក់អំពីក្រុមនេះ និងគ្រោងពិភាក្សាជាមួយពួកគេ។
ប៉ុន្តែអ្នកនាំពាក្យរបស់គណបក្សកាន់អំណាចលោក សុខ ឥសាន ថ្លែងថាក្តីបារម្ភនោះវាធំធេងលើសពីការពិត។ លោកបានចោទសួរថា៖ «តើគណបក្សសង្គ្រោះជាតិត្រូវបានរំលាយហើយឬនៅ? គណបក្សសង្គ្រោះជាតិមានបេក្ខជនមេឃុំ ចៅសង្កាត់នៅក្នុងគ្រប់ឃុំ សង្កាត់ ១៦៤៦»៕ PS
Contact authors: Cristina Maza and មាស សុខជា