ដោយ កញ្ញា ខាន់ លក្ខិណា | ថ្ងៃសុក្រ ទី៧ ខែមេសា ឆ្នាំ២០១៧
http://vodhotnews.com
សមាជិកព្រឹទ្ធសភាមកពីគណបក្ស សម រង្ស៊ី លោក ហុង សុខហួរ
សាលាឧទ្ធរណ៍នៅព្រឹកថ្ងៃសុក្រទី៧ខែមេសានេះ សម្រេចលើកពេលសវនាការលើសំណុំរឿងមន្ត្រីបក្សប្រឆំាងមួយរូប ពាក់ព័ន្ធនឹងរឿងដែលរដ្ឋាភិបាលចោទថា បានក្លែងបន្លំឯកសារសន្ធិសញ្ញាព្រំដែនកម្ពុជា-វៀតណាមឆ្នាំ១៩៧៩។
កាលពីថ្ងៃទី៧ខែវិច្ឆិកាឆ្នាំ២០១៦ សាលាដំបូងរាជធានីភ្នំពេញបានកាត់ទោសសមាជិកព្រឹទ្ធសភាមកពីគណបក្ស សម រង្ស៊ី គឺលោក ហុង សុខហួរ ឲ្យជាប់ពន្ធនាគារចំនួន៧ឆ្នាំ ពីបទក្លែងបន្លំឯកសារសាធារណៈ ការប្រើប្រាស់ឯកសារសាធារណៈក្លែង និងញុះញង់បង្កឲ្យមានភាពវឹកវរធ្ងន់ធ្ងរដល់សន្តិសុខសង្គម។
តែមេធាវីការពារក្តីឲ្យលោក ហុង សុខហួរ បានប្តឹងជំទាស់ ចំពោះសេចក្ដីសម្រេចនោះ មកសាលាឧទ្ធរណ៍ ហើយនៅថ្ងៃសុក្រនេះដែរ សាលាឧទ្ធរណ៍ បានលើកពេលវនាការទៅពេលក្រោយវិញ ដោយអវត្តមានមេធាវី។ នេះបើតាមភរិយារបស់លោក ហុង សុខហួរ។
ភរិយាលោក ហុង សុខហួរ គឺអ្នកស្រី គន្ធ លំអង ប្រាប់ក្រុមអ្នកសារព័ត៌មានថា តុលាការលើកពេលសវនាការនេះ ដោយសារមេធាវីការពារក្ដីឲ្យស្វាមីអ្នកស្រីមានបញ្ហាសុខភាព។
អ្នកស្រីចាត់ទុកសេចក្ដីសម្រេចរបស់សាលាដំបូងកាពីពេលកន្លងទៅ ដែលកាត់ទោសឲ្យស្វាមីអ្នកស្រីជាប់ពន្ធនាគារចំនួន៧ឆ្នាំ នោះថា ជារឿងអយុត្តិធម៌។
មន្រ្តីបក្សប្រឆាំង លោក ហុង សុខហួរ ត្រូវបានសមត្ថកិច្ចចាប់ខ្លួនកាលពីពាក់កណ្តាលខែសីហាឆ្នាំ២០១៥ តាមបញ្ជាលោកនាយករដ្ឋមន្រ្តី ហ៊ុន សែន ដោយចោទថា បានក្លែងឯកសារសន្ធិសញ្ញាកម្ពុជា-វៀតណាមឆ្នាំ១៩៧៩ ក្រោយ លោក ហុង សុខហួរ បានផ្សព្វផ្សាយឯកសារនេះ នៅតាមបណ្តាញអ៊ិនធឺណិត។
ពាក់ព័ន្ធបញ្ហាព្រំដែននេះដែរ អតីតប្រធានគណបក្សសង្គ្រោះជាតិ លោក សម រង្ស៊ី រួមទាំងលោក អ៊ុំ សំអាន តំណាងរាស្ត្របក្សប្រឆាំង ក៏ត្រូវបានសាលាដំបូងរាជធានីភ្នំពេញកាត់ទោសឲ្យជាប់ពន្ធនាគារដូចគ្នាដែរពាក់ព័ន្ធនឹងរឿង ដែលរដ្ឋាភិបាលចោទថា បានក្លែងបន្លំឯកសារសន្ធិសញ្ញាព្រំដែនកម្ពុជា-វៀតណាមឆ្នាំ១៩៧៩៕