លោក កឹម សុខា ប្រធានគណបក្សសង្គ្រោះជាតិ។ ហេង ជីវ័ន
Tue, 25 April 2017
មាស សុខជា
ភ្នំពេញប៉ុស្តិ៍
ភ្នំពេញៈ មេដឹកនាំគណបក្សប្រឆាំងបានសន្យាថា នឹងអញ្ជើញកម្លាំងប្រដាប់អាវុធទាំងអស់ឲ្យចូលរួមធ្វើការជាមួយរដ្ឋាភិបាលថ្មីដឹកនាំ ដោយគណបក្សសង្គ្រោះជាតិ ខណៈបច្ចុប្បន្នកំពុងសម្ដែងសុទិដ្ឋិនិយមចំពោះការឈ្នះការបោះឆ្នោត ឃុំ-សង្កាត់ នៅឆ្នាំនេះ និងបោះឆ្នោតថ្នាក់ជាតិ នៅឆ្នាំក្រោយ ដោយបានលើកពីចំណុចវិជ្ជមានជាច្រើនសម្រាប់ការបោះឆ្នោតនាពេលខាងមុខ។
ថ្លែងទៅកាន់អ្នកគាំទ្រ និងសកម្មជននៅស្រុក ត្រាំកក់ ខេត្ត តាកែវ កាលពីថ្ងៃអាទិត្យ ប្រធានគណបក្សសង្គ្រោះជាតិ លោក កឹម សុខា បានថ្លែងថា ការបោះឆ្នោតនាខែ មិថុនា ឆ្នាំ ២០១៧ និងការបោះឆ្នោតឆ្នាំ ២០១៨ គឺសំខាន់ណាស់ដែលជាក្តីសង្ឃឹមរបស់ពលរដ្ឋ និងពិភពលោកហើយការបោះឆ្នោតមានចំណុចវិជ្ជមានជាច្រើន ដោយសារគណៈកម្មាធិការជាតិរៀបចំការបោះឆ្នោត (គ.ជ.ប) មានចំណុចល្អជាងមុន ដោយសារមានសមាសភាពចម្រុះ កម្ពុជាមានបញ្ជីឈ្មោះអ្នកបោះឆ្នោតថ្មីដែលធ្វើឡើងតាមបច្ចេកទេសប្រសើរជាងមុន ហើយពលរដ្ឋភាគច្រើនបំផុតបានសម្រេចចិត្តរួចហើយថា នឹងទៅបោះឆ្នោត ខណៈសហគមន៍អន្តរជាតិក៏បានយកចិត្តទុកដាក់ផងដែរលើការបោះឆ្នោត គណបក្សសង្គ្រោះជាតិ មានបញ្ជីបេក្ខជនមួយរយភាគរយទូទាំងប្រទេស គណបក្សសង្គ្រោះជាតិមានកម្មវិធីនយោបាយច្បាស់លាស់ ដើម្បីដោះស្រាយបញ្ហាចាំបាច់របស់ពលរដ្ឋហើយគណបក្សសង្គ្រោះជាតិក៏មានអ្នកសង្កេតការណ៍នៅតាមការិយាល័យបោះឆ្នោត ដើម្បីការពារសន្លឹកឆ្នោតផងដែរ។
លោក សុខា បានបន្តថា៖ «ខ្ញុំមិននិយាយថា ល្អឥតខ្ចោះទេ។ ប៉ុន្តែវាប្រសើរជាងអាណត្តិមុន។ គ.ជ.ប បើទោះបីជាល្អឬមិនល្អ គ្រប់គ្រាន់ឬមិនគ្រប់គ្រាន់ យើងក៏ដឹងផងដែរថា វាមានតុល្យភាព។ វាមិនមែនមកពីការជ្រើសរើសតែមួយពីគណបក្សកាន់អំណាចទេ។ [គណបក្សសង្គ្រោះជាតិ] របស់យើងក៏បានជ្រើសរើសតំណាងផងដែរនៅក្នុង [គ.ជ.ប] នោះ ហើយសង្គមស៊ីវិលក៏ត្រូវបានជ្រើសរើសតំណាងនៅក្នុង គ.ជ.ប ផងដែរ»។
ដោយប្រៀបធៀបបញ្ជីឈ្មោះអ្នកបោះឆ្នោតថ្មី និងបញ្ជីចាស់ លោក កឹម សុខា បានប្រាប់អ្នកគាំទ្រថា បញ្ជីថ្មីមិនអាចផ្លាស់ប្តូរឬបន្លំបានទេគឺខុសពីបញ្ជីមុនដែលងាយស្រួលផ្លាស់ប្តូរ។
ទន្ទឹមនឹងនេះ អតីតប្រធានគណបក្សសង្គ្រោះជាតិ លោក សម រង្ស៊ី បានប្រាប់អ្នកគាំទ្រនៅបរទេសថា កម្លាំងប្រដាប់អាវុធជាច្រើនដែលជាអង្គរក្សលោកនាយករដ្ឋមន្រ្តី ហ៊ុន សែន ក៏បានបោះឆ្នោតឲ្យសង្គ្រោះជាតិផងដែរហើយថា ការបោះឆ្នោតនាពេលខាងមុខ អ្នកទាំងនោះនឹងបោះឆ្នោតឲ្យគណបក្សសង្គ្រោះជាតិច្រើនជាងមុន និងថា បន្ទាប់ពីគណបក្សសង្គ្រោះជាតិឈ្នះការបោះឆ្នោត ហើយរៀបចំរដ្ឋាភិបាលថ្មី រដ្ឋាភិបាលថ្មីរបស់គណបក្សសង្គ្រោះជាតិនឹងអញ្ជើញកម្លាំងប្រដាប់អាវុធនិងមន្រ្តីជាន់ខ្ពស់មួយចំនួនដែលនៅជុំវិញលោកនាយករដ្ឋមន្រ្តី ហ៊ុន សែន ឲ្យធ្វើការនៅក្នុងរដ្ឋាភិបាលថ្មីជាមួយគ្នា។
លោក រង្ស៊ី ថា៖ «ពួកគេនៅស្ងៀមក្នុងចិត្តរបស់ពួកគេ ពួកគេបោះឆ្នោតឲ្យ [គណបក្សសង្គ្រោះជាតិ] រួចទៅហើយ។ ដូច្នេះពេល [គណបក្សសង្គ្រោះជាតិ] ឈ្នះនិងដឹកនាំប្រទេស យើងនឹងអញ្ជើញគាត់ចូល កុំខ្លាច ដើម្បីបម្រើជាតិទាំងអស់គ្នា»។
ដោយចំអកចំពោះការបាត់បង់អាសនៈ ២២ ក្នុងចំណោមអាសនៈ ៩០ ក្នុងរដ្ឋសភារបស់គណបក្សកាន់អំណាច បន្ទាប់ពីការបោះឆ្នោត ២០១៣ លោក សម រង្ស៊ី បន្តថា លោកនាយករដ្ឋមន្រ្តី ហ៊ុន សែន កំពុងភ័យខ្លាចចាញ់ឆ្នោតដោយសារយោធាភាគច្រើននៅជុំវិញគាត់បោះឆ្នោតឲ្យសង្គ្រោះជាតិ។
លោក សម រង្ស៊ី បានបន្តថា៖ «[យើង] មិនចាត់ទុកខ្មែរណាមួយជាសត្រូវទេ។ វាដល់ពេលយើងរួបរួមគ្នាសង្គ្រោះជាតិរបស់យើងហើយ យើងបើកចិត្តទទួលយកបងប្អូនដោយដៃពីរ»។
អ្នកនាំពាក្យគណបក្សប្រជាជនកម្ពុជា លោក សុខ ឥសាន បានថ្លែងថា គណបក្សប្រជាជនក៏ចង់ឲ្យមាន គ.ជ.ប ថ្មីដែលអាចទទួលយកបានពីមជ្ឈដ្ឋានទាំងអស់ ដើម្បីឲ្យលទ្ធផលបោះឆ្នោតដែលអាចទទួលយកបានផងដែរទាំងក្នុង និងក្រៅប្រទេស នោះហើយជាហេតុដែល គ.ជ.ប. ត្រូវបានកែតម្រូវ។
លោក សុខ ឥសាន បានបន្តថា៖ «[យើង] កែតម្រូវដើម្បីឲ្យវាប្រសើរឡើង។ គណបក្សប្រជាជនកម្ពុជា ចង់ឲ្យមាន [ការកែតម្រូវ] ច្រើនជាងគាត់ ដើម្បីកុំឲ្យមានការរិះគន់ឬការវាយប្រហារពីអ្នកខាងក្រៅ»។
អ្នកនាំពាក្យ ក្រសួងការពារជាតិ លោកឈុំ សុជាតិ បានចាត់ទុកការលើកឡើងរបស់លោក សម រង្ស៊ី ថា ជាការកូរឲ្យមានភាពវឹកវរក្នុងជួរយោធា ដោយថ្លែងថា ការបោះឆ្នោតគឺសម្ងាត់ មិនមាននរណាម្នាក់អាចដឹងថា នរណាបោះឆ្នោតឲ្យគណបក្សណាទេ ដូច្នេះអ្វីដែលលោក សម រង្ស៊ី បាននិយាយនោះ វាគ្រាន់តែជាចេតនាបំបែកបំបាក់កម្លាំងប្រដាប់អាវុធប៉ុណ្ណោះ។
លោក សុជាតិ បានដាក់ចម្ងល់ថា៖ «ហេតុអ្វី [លោក សម រង្ស៊ី] ដឹងមុន? ខ្ញុំហាក់បីដូចជាមិនយល់។ គាត់និយាយនោះ មិនមានមូលដ្ឋាន…»៕ PS