ពិធីបើកការដ្ឋានសាងសង់កាលពីម្សិលមិញ។ ហុង មិនា
Wed, 10 May 2017
ម៉ិច ដារ៉ា
ភ្នំពេញប៉ុស្តិ៍
ភ្នំពេញៈ ក្រសួងមហាផ្ទៃកាលពីម្សិលមិញ បានបើកឲ្យដំណើរការសាងសង់អគារពន្ធនាគារថ្មីទំនើប សម្រាប់ជួលឲ្យអ្នកជាប់ឃុំដែលមានលទ្ធភាពបង់ប្រាក់ស្នាក់នៅដែលគម្រោងនេះអាចនឹងដាក់ឲ្យប្រើប្រាស់នៅពាក់កណ្តាលឆ្នាំ២០១៨ ដោយមានការវិនិយោគជាមួយក្រុមហ៊ុនចិនមានទឹកប្រាក់ប្រមាណ ៤លានដុល្លារនៅលើផ្ទៃដីមួយហិកតាកន្លះ។
នៅក្នុងពិធីបើកការដ្ឋានសាងសង់កាលពីម្សិលមិញ លោកប៉ាវ ហមផាន រដ្ឋលេខាធិការក្រសួងមហាផ្ទៃ បានថ្លែងថារដ្ឋាភិបាលបាននិងកំពុងបន្តជំរុញធ្វើកំណែទម្រង់ស៊ីជម្រៅ លើគ្រប់វិស័យ ដែលក្នុងនោះក៏រួមមានការកែលម្អពន្ធនាគារដើម្បីបង្កើនគុណភាព សុវត្ថិភាព និងធ្វើឲ្យកាន់តែមានប្រសិទ្ធភាព ក្នុងការគ្រប់គ្រងវិជ្ជាជីវៈពន្ធនាគារ។
លោកបន្តថា ជាមួយនឹងការយកចិត្តទុកដាក់របស់មេដឹកនាំក្រសួងមហាផ្ទៃ ជាពិសេសលោកឧបនាយករដ្ឋមន្ត្រី ស ខេង រដ្ឋមន្ត្រីក្រសួងមហាផ្ទៃឃើញថា ពន្ធនាគារបានអភិវឌ្ឍនៅក្នុងផ្នែកហេដ្ឋារចនាសម្ព័ន្ធ និងការផ្តល់សេវាកម្មផ្សេងៗកាន់តែមានភាពល្អប្រសើរ។
លោកបានថ្លែងថា៖«រដ្ឋាភិបាលបានអនុញ្ញាតឲ្យមានការវិនិយោគរួមគ្នាក្នុងភាពជាដៃគូ ពីវិស័យឯកជន ក្នុងការអភិវឌ្ឍហេដ្ឋារចនាសម្ព័ន្ធនិងដំណើរការគ្រប់គ្រងសេវាកម្មនៅក្នុងពន្ធនាគារ»។
លោកឲ្យដឹងថា ក្រុមហ៊ុន Kunn Rekon Holding ត្រូវបានផ្តល់សិទ្ធិឲ្យដោយក្រសួងមហាផ្ទៃ ដើម្បីវិនិយោគលើការសាងសង់អគារពន្ធនាគារថ្មីនេះ ដែលមានដូចជាអគារមណ្ឌលសេវាសុខភាព សេវាបញ្ឈប់ការប្រើប្រាស់គ្រឿងញៀន របបអាហារនិងអគារសម្រាប់អ្នកទោសដែលបង់ថ្លៃសេវាដោយស្ម័គ្រចិត្តនៅក្រោមគម្រោង BOT។
លោក ហម ផាន បន្តថា ស្តង់ដាអគារត្រូវតែស្របទៅតាមស្ដង់ដារ និងនីតិវិធីនៃការគ្រប់គ្រងពន្ធនាគារ«ហើយវាជាមោទនភាពមួយ ដែលយើងកំពុងអភិវឌ្ឍអគារដ៏ទំនើបនេះ សម្រាប់ផ្តល់សេវាកម្មសម្រាប់អ្នកទោស …»។
អ្នកនាំពាក្យអគ្គនាយកដ្ឋានពន្ធនាគារក្រសួងមហាផ្ទៃលោក នុត សាវ៉ាន ឱ្យដឹងថា ដំណើរការសាងសង់នេះគឺនឹងត្រូវបញ្ចប់នៅពាក់កណ្តាលឆ្នាំ ២០១៨ ដែលអគារនេះ អាចដាក់អ្នកទោសបានប្រហែល៤០០នាក់ ហើយមជ្ឈមណ្ឌលស្តារនីតិសម្បទាសម្រាប់អ្នកញៀនថ្នាំ ដាក់បានប្រហែល ១២០ នាក់ និងអគារមួយទៀតសម្រាប់អ្នកដែលមានលទ្ធភាពបង់ប្រាក់ ដើម្បីស្នាក់នៅទីនោះ។
លោកថ្លែងថា៖ «សេវាកម្មគឺមិនមានលក្ខណៈខុសគ្នាទេទីមួយគឺបន្ទប់មានទំហំធំជាងមុន,មានកន្លែងហាត់ប្រាណ,កន្លែងសម្រាប់ផ្នែកកម្មវិធីសាសនា,ស្តារនីតិសម្បទា…ហើយវាគឺជាការវិនិយោគ ប៉ុន្តែអ្វីៗគ្រប់យ៉ាង គឺអនុវត្តតាមគោលនយោបាយរបស់រដ្ឋាភិបាល ហើយសូមកុំច្រឡំថា មានសេវាកម្មម៉ាស្សាឬអ្វីផ្សេងទៀត»។
លោកបន្ថែមថា នៅពេលដែលមានទីតាំងថ្មីអ្នកដែលអាចមានលទ្ធភាព គឺត្រូវផ្លាស់ទៅកាន់ទីនោះហើយអ្នកដែលមិនមានលទ្ធភាព ពួកគេអាចទទួលបានទីធ្លាទូលាយជាងមុន ហើយសេវាកម្មក៏មានលក្ខណៈល្អប្រសើរជាងមុនដែរ។
លោកបានឲ្យដឹងថា នាពេលបច្ចុប្បន្ននេះ ពន្ធនាគារ កំពុងតែប្រឈមជាមួយនឹងបញ្ហាជាច្រើនជាពិសេសគឺអ្នកទោសមានចំនួនកាន់តែច្រើនឡើងៗ នៅកកកុញ។
លោកចាន់ ពុទ្ធិស័ក្ដិ សកម្មជនដីធ្លីនៅតំបន់បឹងកក់ ដែលធ្លាប់ជាប់់ឃុំ ក្នុងពន្ធនាគារព្រៃស និងពន្ធនាគារត្រពាំងថ្លុង អស់រយៈពេល ៥ ខែ ដោយសារតែធ្វើការតវ៉ាប្រឆាំងនឹងការរំលោភបំពានដីធ្លី បានឲ្យដឹងថា ការជាប់ឃុំក្នុងពន្ធនាគារទាំងពីរ គឺមានភាពខុសគ្នា។
លោកថា នៅពន្ធនាគារត្រពាំងថ្លុង មិនមានការបែងចែកអ្នកទោសមានឬក្រទេ អ្នកមាននិងអ្នកក្រ គឺស្មើភាពគ្នា។ ប៉ុន្តែនៅក្នុងពន្ធនាគារព្រៃស មានការបែងចែកអ្នកទោសអ្នកមាននិងអ្នកក្រ។
លោកបញ្ជាក់ថា៖«នៅព្រៃស អ្នកមាន ឬឧកញ៉ា នៅបន្ទប់ដាច់ដោយឡែកពីអ្នកក្រីក្រ។ ចំពោះអ្នកក្រីក្រនៅក្នុងពន្ធនាគារ ជីវិតគឺលំបាកខ្លាំងណាស់ ខណៈអ្នកមានរស់នៅទីនោះ ដូចនៅក្នុងរង្គសាល ពួកគេមានម្ហូបអាហារល្អៗមានស្រាល្អផឹក មានរបស់ទំនើបៗដូចជាទូរស័ព្ទទំនើប មានរបស់ហូបចុក គ្រប់គ្រាន់ បន្ទប់មានសាឡុងមានពូក និងទូរទស្សន៍ កង្ហារ ម៉ាស៊ីនត្រជាក់។ តែសម្រាប់យើងក្រីក្រគេឲ្យយើងដេកនៅលើឥដ្ឋ»។
ចំពោះការសង់អគារពន្ធនាគារទំនើបថ្មី សម្រាប់ជួលឲ្យអ្នកមានប្រាក់ដែលជាប់ឃុំស្នាក់នៅ លោកពុទ្ធិស័ក្តិ យល់ថា អាចនឹងមិនធ្វើឲ្យជនល្មើសរាងចាលឡើយ ដោយសារតែនៅពេលដែលពួកគេជាប់ឃុំ ពួកគេអាចរស់នៅក្នុងបន្ទប់ទំនើបមានម៉ាស៊ីនត្រជាក់ និងមានអាហារហូបចុកគ្រប់គ្រាន់សុខស្រួល គ្មានការលំបាកដែលមិនមែនជាការដាក់ទណ្ឌកម្មនោះឡើយ៕ NS
Contact author: ម៉ិច ដារ៉ា
Encourage to bad person to did more bad thing because in prison has a comfortable hotel.
Stupid government, what anything else crazy to this Wonderful Kingdom? ……….??????