លោក សម រង្ស៊ី ប្រធានសមាគមដើម្បីប្រជាធិបតេយ្យក្នុងសន្និសីទនៅប៉ារីសពីម្សិលមិញ។ រូបថត ហ្វេសប៊ុក
Tue, 24 October 2017
ម៉ិច ដារ៉ា and Ananth Baliga
ភ្នំពេញប៉ុស្តិ៍
ភ្នំពេញៈ លោកនាយករដ្ឋមន្ត្រី ហ៊ុន សែន កាលពីម្សិលមិញបានចំអកដាក់អតីតមេដឹកនាំគណបក្សប្រឆាំង លោក សម រង្ស៊ី និងបានគំរាមឲ្យ«រៀបចំក្តារមឈូស»ចំពោះការប៉ុនប៉ងផ្ដួលលោកតាមរយៈយោធាដោយហៅការអំពាវនាវរបស់លោក សម រង្ស៊ី ឲ្យយោធាប្រឆាំងនឹងរដ្ឋាភិបាលថាគ្មានប្រយោជន៍និងជាផ្នែកនៃការប៉ុនប៉ងបដិវត្តន៍ពណ៌បរាជ័យនៅកម្ពុជា។
ការថ្លែងរបស់លោកនាយករដ្ឋមន្ត្រីធ្វើឡើងនៅចំថ្ងៃដែលភ្នំពេញប៉ុស្តិ៍បានឃើញឯកសារបណ្តុះបណ្តាលនគរបាលជាតិដែលបង្ហាញថា អាមេរិក និងសហភាពអឺរ៉ុបកំពុងដឹកនាំបដិវត្តន៍ពណ៌ដោយជួលអង្គការក្រៅរដ្ឋាភិបាលក្នុងស្រុកនិងក្រៅស្រុក គណបក្សសង្គ្រោះជាតិនិងអង្គការប្រព័ន្ធផ្សព្វផ្សាយដើម្បីធ្វើការងារនេះ។
ការគំរាមកំហែងរបស់លោកហ៊ុន សែន ទៅលើលោក សម រង្ស៊ី បានធ្វើឡើងបន្ទាប់ពីមានការចេញវីដេអូមួយនៅលើគេហទំព័រសារព័ត៌មានគាំទ្ររដ្ឋាភិបាលដែលមេដឹកនាំនិរទេសដោយខ្លួនឯងបានថ្លែងក្នុងឆ្នាំ២០១១ ដោយមានការលើកឡើងពីការឲ្យយោធាបែរកាំភ្លើងទៅរករដ្ឋាភិបាល ជាពាក្យដែលលោកនាយករដ្ឋមន្ត្រីថ្លែងថា ក្បត់ជាតិនិងត្រូវបានវាយប្រហារពីស្ថាប័នរដ្ឋាភិបាលនិងយោធាផ្សេងៗក្នុងរយៈកាលប៉ុន្មានថ្ងៃចុងក្រោយនេះ។
លោកកឹម សុខាប្រធានគណបក្សសង្គ្រោះជាតិក៏កំពុងប្រឈមមុខនឹងបទ«ក្បត់ជាតិ»ដោយសារវីដេអូមួយដែលលោកបានថ្លែងថាលោកបានទទួលជំនួយពីសហរដ្ឋអាមេរិកសម្រាប់មុខអាជីពនយោបាយរបស់លោក ខណៈការចោទប្រកាន់នេះត្រូវបានមជ្ឈដ្ឋានជាច្រើនរិះគន់ និងថា ជារឿងនយោបាយ។
លោកនាយករដ្ឋមន្ត្រី បានថ្លែងក្នុងពិធីមួយនៅភ្នំពេញថា៖«សូមកុំភ្លេចថា អ្នកគ្មានសមត្ថភាពផ្តួលរំលំ ហ៊ុន សែន តាមរយៈយោធាទេ។ ប្រសិនបើអ្នកហ៊ានលោត អ្នកហ៊ានស្លាប់ដែរ ដូច្នេះសូមរៀបចំមឈូសជាមុន»។
ដោយសំដៅទៅលោក សម រង្ស៊ីនិងលោក កឹម សុខា លោក ហ៊ុន សែន បានថ្លែងថា លោក ចង់អនុវត្តច្បាប់ជាជាងញុះញង់កងទ័ពឲ្យប្រើហិង្សា។
លោកបានបន្តថា៖«នៅពេលកងទ័ពចេញមកចាប់ពស់ ពួកគេនឹងវាយក្បាលពស់ មិនមែនកន្ទុយពស់ទេ។ប្រសិនបើយើងវាយកន្ទុយ វានឹងចឹក។ មេដឹកនាំទាំងនោះនឹងត្រូវវាយ»។
ចំពោះលោក សម រង្ស៊ី វិញបានថ្លែងថា ពាក្យរបស់លោកត្រូវបានបកស្រាយក្រៅបរិបទ ហើយលោកថា លោកកំពុងនិយាយអំពីនិន្នាការប្រវត្តិសាស្ត្រដែលបង្ហាញថា កងទ័ពអាចមិនស្តាប់បញ្ជារបស់រដ្ឋាភិបាលនៅពេលបញ្ជាឲ្យធ្វើអ្វីប្រឆាំងនឹងឆន្ទៈរបស់ប្រជាជន។
លោកថា៖«ក្នុងឆ្នាំ២០១១ ខ្ញុំគ្រាន់តែបង្ហាញពីការពិតប្រវត្តិសាស្ត្រ ខ្ញុំមិនបានអំពាវនាវជាក់លាក់ទៅនរណាម្នាក់ទេ ហើយក៏អាចក្លាយជាការពិតផងដែរក្នុងថ្ងៃណាមួយនៅកម្ពុជា»។
ជាងនេះទៀតអតីតមេដឹកនាំគណបក្សប្រឆាំងរូបនេះបាន្ធធ្វើសន្និសីទកាសែតមួយនៅទីក្រុងប៉ារីស ប្រទេសបារាំង ក្រោមស្លាកសមាគមថ្មីរបស់លោកគឺសមាគមដើម្បីប្រជាធិបតេយ្យក្នុងប្រទេសកម្ពុជាដើម្បីរំឭកខួបទី២៦ឆ្នាំនៃកិច្ចព្រមព្រៀងសន្តិភាពទីក្រុងប៉ារីស។
លោក សម រង្ស៊ី បានថ្លែងពីម្សិលមិញថា៖«នៅពេលពលរដ្ឋហ៊ាននិយាយការពិតនិងត្អូញត្អែរអំពីអ្វីដែលគាត់ធ្វើខុសឬបង្ហាញឧក្រិដ្ឋកម្មរបស់គាត់ គាត់ខឹងនិងភ័យខ្លាច»។
ខណៈលោកសម រង្ស៊ី ឈប់ជាផ្នែកនៃគណបក្សសង្គ្រោះជាតិកាលពីខែកុម្ភៈក្រោយពេលវិសោធនកម្មដ៏ចម្រូងចម្រាសទៅលើច្បាប់ស្តីពីគណបក្សនយោបាយនោះ កាលពីពេលថ្មីៗនេះលោកត្រូវបានទាញចូលទៅក្នុងការចោទប្រកាន់របស់រដ្ឋាភិបាលថាអាមេរិកនិងគណបក្សសង្គ្រោះជាតិកំពុងឃុបឃិតគ្នាផ្តួលរំលំរដ្ឋាភិបាល។
វាហាក់កាន់តែច្បាស់ទៀតតាមរយៈការលេចធ្លាយឯកសារនគរបាលជាតិដែលបង្ហាញអំពីរចនាសម្ព័ន្ធអនុវត្តយុទ្ធសាស្ត្របដិវត្តន៍ពណ៌នៅកម្ពុជាដែលបង្ហាញថា ស្ថានទូតអាមេរិកនិងសហភាពអឺរ៉ុបជាទីបញ្ជាការ ហើយនៅផ្នែកប្រភពហិរញ្ញវត្ថុគឺអង្គការ USAID អង្គការ DCA/CA និងក្រុមហ៊ុនពាណិជ្ជកម្មធំចំនួន៤ និងធនាគារនិងគ្រឹះស្ថានមីក្រូហិរញ្ញវត្ថុចំនួន៣ ព្រមទាំងអង្គការបរទេសមួយចំនួនរួមមានIRI,NDI, Peace Corps,ACILS,CANVAS និងអង្គការក្រៅរដ្ឋាភិបាលសរុប៤៩។
ចំណែកខាងអង្គការក្នុងស្រុករួមមាន អង្គការសមធម៌កម្ពុជា សហគមន៍ធាងត្នោត ក្រុមការងារពិសេសសិទ្ធិលំនៅឋានដែលកាលពីសបា្តហ៍មុនត្រូវបានចោទប្រកាន់ដោយក្រសួងការពារជាតិថាប្រើប្រាស់ថវិកាអាមេរិកដើម្បីធ្វើបាតុកម្ម រួមទាំងសហគមន៍ដីធ្លី លំនៅឋាន ព្រៃឈើ នេសាទនិងសហគមន៍ផ្សេងៗសរុប២៥០រួមទាំងសហព័ន្ធសហជីពប្រឆាំងចំនួន១១ ដែលធ្វើការឲ្យអាមេរិកនិងសហភាពអឺរ៉ុប។ចំណែកប្រព័ន្ធផ្សព្វផ្សាយរួមមានVOD,VOA,RFA,វិទ្យុសារិកា វិទ្យុសំបុកឃ្មុំ ប្រព័ន្ធផ្សព្វផ្សាយអេឡិចត្រូនិកបណ្តាញទំនាក់ទំនងសង្គម ចំណែកយុទ្ធការអនុវត្តបណ្តាញចាត់តាំងគឺCNRP ។
អភិបាលខេត្តកំពង់ស្ពឺ លោក វ៉ី សំណាង បានបញ្ជាក់ថា ឯកសារនេះត្រូវបានចែកចាយហើយមន្ត្រីខេត្តត្រូវបានជម្រាបអំពីខ្លឹមសារ។
អ្នកនាំពាក្យក្រសួងមហាផ្ទៃ លោក ខៀវ សុភ័គ មានការភ្ញាក់ផ្អើលនៅពេលសួរអំពីឯកសារនេះ ដោយហាក់បីដូចជាព្យាយាមនិយាយសម្រាលអំពីខ្លឹមសារនៃឯកសារនេះ។
លោកបានថ្លែងថា៖ «នេះគ្រាន់តែជាអ្វីដែលយើងបានកត់សម្គាល់ ប៉ុន្តែនៅពេលពួកគេបង្ហាញសកម្មភាពនោះយើងនឹងចាត់វិធានការ ហើយយើងដឹងថា នរណាជានរណា»។
ឯកសារនេះក៏បានបង្ហាញផងដែរថា អង្គការឃ្លាំមើលការបោះឆ្នោតខុម ហ្វ្រែលជួយនិងឃុបឃិតជាមួយគណបក្សសង្គ្រោះជាតិ ប៉ុន្តែការចោទប្រកាន់នេះត្រូវបានអង្គការខុមហ្វ្រែលបដិសេធកាលពីម្សិលមិញ ដោយថ្លែងថា អង្គការផ្តល់លើការធានានូវការបោះឆ្នោតដោយសេរីនិងយុត្តិធម៌ ព្រមទាំងតាមដានក្រោយការបោះឆ្នោតទៅលើគោលនយោបាយនិងមន្ត្រីបោះឆ្នោត។
អង្គការខុម ហ្វ្រែលថា៖«យើងបដិសេធយ៉ាងខ្លាំងចំពោះការចោទប្រកាន់នេះ។អ្វីដែលយើងបានធ្វើនិងអ្វីដែលយើងកំពុងព្យាយាមធ្វើគឺដើម្បីចែករំលែកការរួមចំណែករបស់យើងទៅរដ្ឋាភិបាលក្នុងការជួយសង្គមកម្ពុជា»៕ PS
Contact authors: ម៉ិច ដារ៉ា and Ananth Baliga
Cambodian people all support and love Sam Rainsy
កើតជាមនុស្ស គ្មាននរណា កគេចរួចពី “ក្តារមញ្ឈួស”ទេ ថ្ងៃនេះ”គេ” ថ្ងៃក្រោយ ច្បាស់មកដល់ខ្នួនហើយ។មិនចាំអោយគេត្រៀមទេ គួរត្រៀមសំរាប់ខ្លួនឯងវាប្រសើរជាង។