ដោយ លោក ហ៊ុន សិរីវឌ្ឍន៍ | ថ្ងៃសុក្រ ទី២៦ ខែមករា ឆ្នាំ២០១៨ | ម៉ោង 6:33 PM
http://vodhotnews.com
សកម្មជនមាតាធម្មជាតិ២នាក់ដែលត្រូវបានអាជ្ញាធរឃាត់ខ្លួន (FB: Mot Kimry)
សាលាដំបូងខេត្តកោះកុង នៅរសៀលថ្ងៃសុក្រនេះ សម្រេចផ្តន្ទាទោសសកម្មជនបរិស្ថាន២នាក់ ឲ្យជាប់ពន្ធនាគារម្នាក់ៗ១ឆ្នាំ តែតុលាការកាត់តម្រូវឲ្យអនុវត្តន៍ទោសតែ៥ខែ ពីបទញុះញង់និងប៉ះពាល់សិទ្ធិរូបភាពនៃបុគ្គល ប្តឹងដោយក្រុមហ៊ុន ដែលគេថាជារបស់លោកឧកញ៉ា លី យ៉ុងផាត់។
កាលពីខែកញ្ញាឆ្នាំ២០១៧ សមត្ថកិច្ចខេត្តកោះកុង បានឃាត់ខ្លួនសកម្មជនមាតាធម្មជាតិពីរនាក់ ឈ្មោះ ឌឹម គុណឌី និងឈ្មោះ ហ៊ុន វណ្ណៈ តបតាមបណ្តឹងរបស់ក្រុមហ៊ុនបូមខ្សាច់មួយ ដែលគេថា ជារបស់ឧកញ៉ា លី យ៉ុងផាត់ ក្នុងតំបន់សេដ្ឋកិច្ចពិសេសខេត្តកោះកុង ហើយក្រុមហ៊ុននេះ បានចោទពួកគេថា បានចូលទៅថតសកម្មភាពនានា គ្មានការអនុញ្ញាត្តិ។
មន្ត្រីសម្របសម្រួលអង្គការលីកាដូ ប្រចាំខេត្តកោះកុង លោក អ៊ិន គង់ជិត ប្រាប់វីអូឌីថា សកម្មជនទាំងពីរនាក់ ត្រូវបានតុលាការខេត្តកោះកុង នៅថ្ងៃសុក្រនេះ សម្រេចផ្តន្ទាទោសដាក់ពន្ធនាគារចំនួន១ឆ្នាំ តែត្រូវព្យួរទោស៧ខែ និងពិន័យជាប្រាក់ក្នុងម្នាក់ចំនួន១លានរៀល។
លោកថា៖ «អនុវត្តន៍ទោស៥ខែហ្នឹង ចាប់ពីថ្ងៃឃុំខ្លួនបណ្តោះអាសន្នថ្ងៃទី១៣ កញ្ញា (២០១៧) មក។ មកដល់ពេលនេះ ដូចជា៤ខែនិង១៣ថ្ងៃហើយ»។
លោក គង់ជិត យល់ថា ការសម្រេចផ្តន្ទាទោសនេះ ជារឿង អយុត្តិធម៌មួយសម្រាប់ពួកគេ ដោយសារការពិនិត្យទៅលើផ្លូវច្បាប់ពុំបានឃើញថា អ្នកទាំងពីរបានប្រព្រឹត្តិបទល្មើសអ្វីនោះទេ ដោយលោកថា តុលាការ គួរដោះលែងពួកគេ និងមិនគួរណាចោទប្រកាន់ និងផ្តន្ទាទោសនោះឡើយ។
គួររំលឹកផងដែរថា ការចាប់ខ្លួននិងផ្តន្ទាទោសសកម្មជនមាតាធម្មជាតិនេះ គឺធ្វើឡើងបន្ទាប់ពីពួកគេ បានចេញវីដេអូថ្មីមួយទៀតរបស់ខ្លួន ដែលបានបង្ហាញថា រដ្ឋាភិបាលកម្ពុជា បានធ្វើឲ្យបាត់ចំណូលជាតិរាប់លានដុល្លារបន្ថែមទៀត ទៅលើការបូមខ្សាច់លក់ ទៅកាន់ប្រទេសតៃវ៉ាន់៕