ដោយ វ៉ែន សុមេធ
2019-11-01
RFA
យន្តហោះ Air France A340 របស់ក្រុមហ៊ុនអាកាសចរណ៍បារាំង ចុះចតនៅអាកាសយានដ្ឋានអន្តរជាតិភ្នំពេញ ពេលចាប់ផ្ដើមហោះហើយផ្ទាល់មកកម្ពុជា កាលពីថ្ងៃទី៣១ ខែមីនា ឆ្នាំ២០១១។ RFA
ដ្ឋលេខាធិការដ្ឋានអាកាសចរស៊ីវិលកម្ពុជា ហាមក្រុមហ៊ុនយន្តហោះ ដឹកលោក សម រង្ស៊ី និងបក្ខពួក ចូលកម្ពុជា នៅថ្ងៃទី៩ វិច្ឆិកា និងព្រមានចោទក្រុមហ៊ុនយន្តហោះថា ចូលរួមគំនិតក្បត់ជាតិ បើហ៊ានល្មើសនឹងបម្រាមនេះ។ មេដឹកនាំបក្សប្រឆាំងហៅវិធានការនេះថា ជាការបង្ហាញឲ្យឃើញថា របបក្រុងភ្នំពេញខ្លាចវត្តមាន លោក សម រង្ស៊ី។ អ្នកវិភាគថា វិធានការនេះ ជាការបំភ័យ ដើម្បីរារាំងដំណើរមាតុភូមិនិវត្តន៍របស់គណបក្សសង្គ្រោះជាតិ។
មន្ត្រីរបបក្រុងភ្នំពេញ អះអាងការហាមយន្តហោះដឹកលោក សម រង្ស៊ី និងបក្ខពួក មានសាលដីកាសម្រេចទោសពីតុលាការ ដោយសារជាកាតព្វកិច្ចត្រូវការពារអ្នកដំណើរ និងស្ថិរភាព សន្តិសុខនៅប្រទេសកម្ពុជា។
បម្រាមថ្មីនេះ ធ្វើផ្ទុយទៅនឹងការសម្រេចរបស់លោក ហ៊ុន សែន កាលពីឆ្នាំ ២០១៧ ដែលបញ្ជាឱ្យលុបចោលបម្រាមហាមមិនឲ្យយន្តហោះដឹកលោក សម រង្ស៊ី មកកម្ពុជាវិញ។ មេដឹកនាំគណបក្សប្រឆាំង ហៅការព្រមានក្រុមហ៊ុនយន្តហោះនេះថា ជាការបង្ហាញភាពភ័យខ្លាចវត្តមានលោក សម រង្ស៊ី វិលចូលកម្ពុជា នៅថ្ងៃទី៩ វិច្ឆិកា។
អ្នកស្រី មូរ សុខហួរ អនុប្រធានគណបក្សសង្គ្រោះជាតិ ចំអកថា កន្លងមក ក្រុមមេដឹកនាំរបបក្រុងភ្នំពេញ បានស្រែកស្វាគមន៍លោក សម រង្ស៊ី ចូលគ្រប់ផ្លូវ និងត្រៀមចាប់ខ្លួនជានិច្ច។ តែការពិតមែនទែនទៅអ្នកស្រី មូរ សុខហួរ យល់ថា របបក្រុងភ្នំពេញ ខ្លាចវត្តមានលោក សម រង្ស៊ី មិនហ៊ានឲ្យវិលចូលប្រទេសកម្ពុជាឡើយ។ អ្នកស្រី មូរ សុខហួរ ប្រាប់ថា លទ្ធភាពចូលកម្ពុជា នៅថ្ងៃទី៩ វិច្ឆិកា គឺមេដឹកនាំ និងសកម្មជនបក្សប្រឆាំង និងចូលទៅគ្រប់ផ្លូវទាំងអស់ ទាំងផ្លូវគោក ផ្លូវទឹក និងផ្លូវអាកាស។ មេដឹកនាំបក្សប្រឆាំងរូបនេះ បង្ហើបថា បើទោះលទ្ធភាព ចូលតាមផ្លូវគោកច្រើន តែអ្នកស្រី នឹងនៅតែទិញទាំងសំបុត្រយន្តហោះ។ អ្នកស្រីជំរុញឲ្យរបបលោក ហ៊ុន សែន ហ៊ានធ្វើតាមការលើកឡើងកន្លងមក គឺបើកគ្រប់ផ្លូវ ឲ្យក្រុមមេដឹកនាំបក្សប្រឆាំង បានចូលដល់ប្រទេសកម្ពុជា នៅថ្ងៃទី៩ វិច្ឆិកា ហើយធ្វើការចាប់ខ្លួន៖ «សួរទៅលោក ហ៊ុន សែន ហេតុអ្វីមិនចាប់លោកប្រធានទៅ? ក្រែងថា មានដីកា ដីកាលោកប្រធានឲ្យចូល! យើងទាំងអស់គ្នាចូលហ្នឹង គឺដើម្បីអ្វី?បើថា មានដីកាចាប់ទៅ ខ្លាចអ្វីក៏ខ្លាចម្ល៉េះ? លោក ហ៊ុន សែន ខ្លាចឥទ្ធិពលនៃលោកប្រធានស្ដីទីសម រង្ស៊ី ខ្លាចនូវសំឡេងពលរដ្ឋ ដែលលោកប្រធាន សម រង្ស៊ី មានប្រសាសន៍ហើយ គឺយកអំណាចប្រជាពលរដ្ឋ ឈានទៅរកការផ្លាស់ប្ដូរដោយវិជ្ជមាន ដោយអហិង្សា នៅក្នុងប្រទេសយើង»។
មេដឹកនាំបក្សប្រឆាំង ៩នាក់ ដែលតុលាការរបបក្រុងភ្នំពេញ បង្គាប់ឲ្យចាប់ខ្លួន និងបានស្នើសុំឲ្យប្រទេសអាស៊ានជួយចាប់ គឺលោក សម រង្ស៊ី លោក អេង ឆៃអ៊ាង អ្នកស្រី មូរ សុខហួរ លោក អ៊ូ ច័ន្ទឫទ្ធិ លោក ហ៊ូ វ៉ាន់ លោក ម៉ែន សុថាវរិន្ទ្រ លោក នុត រំដួល លោក ឡុង រី និងអ្នកស្រី ជូឡុង សូមូរ៉ា។ អ្នកនាំពាក្យរដ្ឋលេខាធិការដ្ឋានអាកាសចរស៊ីវិល លោក ជា អូន បញ្ជាក់ថា ឲ្យតែជាអ្នកទោស គឺយន្តហោះ មិនអាចដឹកចូលកម្ពុជាបានឡើយ។
គិតត្រឹមរាត្រីថ្ងៃទី១ វិច្ឆិកា គណបក្សប្រឆាំងអះអាងថា សល់ ៨ថ្ងៃទៀត ដល់ថ្ងៃកំណត់លោក សម រង្ស៊ី វិលចូលកម្ពុជាវិញ។ ក្រៅពីការទប់ស្កាត់លោក សម រង្ស៊ី ចូលតាមផ្លូវអាកាស របបក្រុងភ្នំពេញ ក៏បានពង្រាយកងទ័ព និងសព្វាវុធគ្រប់ធុន តាមព្រំដែនគោកដែរ។
សមាជិកក្រុមអ្នកវិភាគវ័យក្មេង លោក ហេង ច័ន្ទរស្មី យល់ថា បើទោះរដ្ឋាភិបាលក្រុងភ្នំពេញ បង្ហាញពីការក្ដោបក្ដាប់កងទ័ពពេញដៃមែន តែរដ្ឋាភិបាលនៅតែខ្លាចវត្តមានលោក សម រង្ស៊ី និងគណបក្សប្រឆាំងមានសិទ្ធិធ្វើនយោបាយឡើងវិញ។ លោកថា ការហាមយន្តហោះ និងការដាក់ពង្រាយកងទ័ពតាមព្រំដែន ជាយុទ្ធសាស្ត្រគំរាម ផ្នែកចិត្តសាស្ត្រលើគណបក្សប្រឆាំង។ ទោះយ៉ាងណាក្ដី លោកថ្លែងថាយុទ្ធសាស្ត្រទាំងនេះ ពិបាកក្នុងការទប់ទល់ដំណើរមាតុភូមិនិវត្តន៍របស់ក្រុមមេដឹកនាំ និងអ្នកគាំទ្រគណបក្សប្រឆាំងណាស់។ លោកបន្តថា ប្រសិនបើពលករ និងពលរដ្ឋ ទៅអមដំណើរមេបក្សប្រឆាំងចូលកម្ពុជា ថ្ងៃទី៩ វិច្ឆិកាមែន កងកម្លាំងប្រដាប់អាវុធ ពិបាកនឹងលើកដៃបង្ក្រាបណាស់ ព្រោះនេះ មិនមែនជាការធ្វើសង្គ្រាម តែជាការប្រឈមមុខជាមួយជាតិសាសន៍ឯង។ អ្នកវិភាគរូបនេះយល់ថា មានតែជម្រើសចរចានយោបាយមួយគត់ ជាជម្រើសល្អសម្រាប់កម្ពុជា៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។
អត្ថបទដែលទាក់ទង
- មេដឹកនាំបាតុករនៅហុងកុងគាំទ្រដំណើរវិលចូលកម្ពុជារបស់មេបក្សប្រឆាំង ដើម្បីស្ដារប្រជាធិបតេយ្យឲ្យរស់ឡើងវិញ
- អាជ្ញាធរខេត្តបន្ទាយមានជ័យ និងបាត់ដំបង បង្ហាញកម្លាំងកងទ័ពរាប់រយនាក់ ហែតាមផ្លូវពេលកៀកថ្ងៃលោក សម រង្ស៊ី វិលចូលស្រុក
- មេដឹកនាំពលករនៅក្រៅប្រទេសអំពាវនាវកងកម្លាំងល្បាតតាមព្រំដែនកម្ពុជាថៃ កុំបង្ក្រាបពលករអមដំណើរលោក សម រង្ស៊ី វិលចូលកម្ពុជា
- របបក្រុងភ្នំពេញ ចាប់ខ្លួនសកម្មជនបក្សប្រឆាំងម្នាក់ទៀត
- តុលាការខេត្តសៀមរាបកាត់ទោសជនពិការម្នាក់ឲ្យជាប់ពន្ធនាគារ ១៨ខែ រឿងរិះគន់របបក្រុងភ្នំពេញ
- ក្រសួងមហាផ្ទៃរឹតបន្តឹងសន្តិសុខនៅអំឡុងពិធីបុណ្យឯករាជ្យជាតិ និងបុណ្យអុំទូក
- ពលរដ្ឋនៅព្រំដែនភាគពាយ័ព្យរិះគន់របបក្រុងភ្នំពេញថា ពង្រាយកងកម្លាំងប្រដាប់អាវុធច្រើន ជារឿងឥតប្រយោជន៍
- មន្រ្តីជាន់ខ្ពស់គណបក្សសង្គ្រោះជាតិមានសង្ឃឹមថា អាជ្ញាធរថៃនឹងអនុញ្ញាតឲ្យអ្នកគាំទ្រ ចូលកម្ពុជាតាមប្រទេសថៃ
- តុលាការខេត្តកំពង់ស្ពឺ ចោទប្រកាន់សកម្មជនបក្សប្រឆាំង ១១នាក់
- មន្ត្រីសន្តិសុខថៃឲ្យដឹងថា អាជ្ញាធរថៃនឹងមិនចាប់ខ្លួនមន្រ្តីបក្សប្រឆាំង តាមការស្នើសុំរបស់ភាគីកម្ពុជាទេ
I guest every one can remembers what our favorite evil leader used to say last month.>> come I’m urgent waiting for you to come by air, land , water .whatever you can my KANCARU court is waiting for you. ..HAS….HAS…HA……….. why right now no one can come at any way to KAMPOUCHEA. the singe is so bad the evil man is going to have his day soon . wait Cambodian you will have every thing back from those evil but please keep his those 3milion $ watch put it museum for young Cambodian to see. GOD bless Cambodia