កម្ពុជា-សេដ្ឋកិច្ច
18/04/2020 – 05:28
ដោយ៖ អ៊ឹម រចនា | សឿង ភារៈ
RFI
ផលិតផលក្នុងស្រុកសរុបរបស់កម្ពុជានៅឆ្នាំ២០២០នេះ នឹងធ្លាក់ចុះដល់កម្រិត -១,៥ភាគរយ ដោយសារតែវិបត្តិកូវីដ១៩។ នេះគឺជាការព្យាករណ៍របស់មូលនិធិរូបិយវត្ថុអន្ដរជាតិ IMF តាមរយៈរបាយការណ៍ចេញផ្សាយនៅក្នុងសប្ដាហ៍នេះ។
លោក ឆាងយ៉ុង រី ប្រធាននាយកដ្ឋានអាស៊ីប៉ាស៊ីហ្វិកនៃ IMF លើកឡើងថា មែនទែនទៅ កម្ពុជា កំពុងស្ថិតនៅដំណាក់កាលដំបូងនៃការរាតត្បាតនៃជំងឺកូវីដ១៩ ប៉ុន្តែសេដ្ឋកិច្ចកម្ពុជាបានទទួលរងផលប៉ះពាល់ខ្លាំងរួចទៅហើយ ដោយសារតែការធ្លាក់ចុះយ៉ាងគំហុកនៃភ្ញៀវទេសចរបរទេស និងបញ្ហាលុបចោលការបញ្ជាទិញនៅក្នុងវិស័យឧស្សាហកម្មកាត់ដេរ។ សូមស្ដាប់ប្រសាសន៍ លោក ឆាងយ៉ុង រី ប្រែសម្រួលដោយ សឿង ភារៈ៖
«យើងបានទម្លាក់ផលិតផលក្នុងស្រុកសរុបរបស់កម្ពុជាមកត្រឹមកម្រិត ដក១,៥ភាគរយ។ ដក១,៥ភាគរយ អាចមើលទៅតិចតួច ប៉ុន្តែសូមកុំភ្លេចថា មុនពេលមានវិបត្តិកូវីដ១៩ យើងព្យាករណ៍ថា ផលិតផលក្នុងស្រុកសរុបរបស់កម្ពុជាអាចមានអត្រាប្រមាណ៧ភាគរយ។ ដូច្នេះ មែនទែនទៅ ផលិតផលក្នុងស្រុកសរុបរបស់កម្ពុជាធ្លាក់ចុះដល់ទៅ៨,៥ភាគរយឯណោះ។ នេះមានន័យថា សេដ្ឋកិច្ចកម្ពុជាជួបការលំបាកខ្លាំងណាស់។»
សំឡេងលោក Changyong Rhee ប្រែសម្រួលដោយ សឿង ភារៈ