កម្ពុជា សង្គម
19/04/2020 – 08:50
ដោយ៖ វ៉ា សំណព្វ
RFI
អាជ្ញាធរខណ្ឌឫស្សីកែវ ក្នុងរាជធានីភ្នំពេញ នៅព្រឹកថ្ងៃទី ១៩ មេសានេះ បានចុះទៅបាញ់ថ្នាំសម្លាប់មេរោគ និងរៀបចំ សាលារៀនមួយស្ថិតនៅក្នុងរាជធានីភ្នំពេញ ដើម្បីត្រៀមទទួលឲ្យកម្មករ-កម្មការិនី ដែលវិលត្រឡប់មកពីស្រុកកំណើត ធ្វើចត្តាឡីស័កក្នុងរយៈពេល១៤ថ្ងៃ។ ការអនុវត្តប្រមូលផ្តុំកម្មករនឹងចាប់ផ្តើមពីថ្ងៃច័ន្ទ ទី២០ មេសានេះតទៅ។ គួរជំរាបជូនថា អាជ្ញាធររាជធានីភ្នំពេញ បាននិងកំពុងត្រៀមសាលារៀនចំនួន៣៧ និង៦៩៩បន្ទប់ ដើម្បីដាក់កម្មករ-កម្មការិនីឲ្យនៅដាច់ដោយឡែកក្នុងរយៈពេល១៤ថ្ងៃ ដើម្បីការពារការចម្លងជំងឺកូវីដ-១៩។
ប្រតិបត្តិការខាងលើនេះ មានការចូលរួមពីអភិបាលខណ្ឌឫស្សីកែវ លោក ជា ពិសី ព្រមទាំងក្រុមគ្រូពេទ្យស្ម័គ្រចិត្តរបស់លោកនាយករដ្ឋមន្ត្រី ហ៊ុន សែន និងមន្ត្រីរបស់ក្រសួងសុខាភិបាលផងដែរ ដើម្បីធ្វើអនាម័យ និងបាញ់សម្លាប់មេរោគនៅក្នុងបរិវេណសាលាវិទ្យាល័យឬស្សីកែវ រាជធានីភ្នំពេញ។ ពួកគេ បានរៀបចំបន្ទប់សាលារៀនចំនួន៨៩បន្ទប់ ដើម្បីត្រៀមទុកទទួលកម្មករ-កម្មការិនី ឲ្យធ្វើចត្តាឡីស័យរយៈពេល១៤ថ្ងៃ បន្ទាប់ពីពួកគេទើបវិលត្រឡប់មកពីចូលរួមពិធីបុណ្យចូលឆ្នាំថ្មីកន្លងទៅនេះ។ បើតាមអាជ្ញាធរ ការអនុវត្តន៍ប្រមូលផ្តុំកម្មករ-កម្មការិនី ឲ្យធ្វើចត្តាឡីស័ក នឹងចាប់ផ្តើមអនុវត្តន៍ ពីថ្ងៃច័ន្ទ ទី២០ មេសា នេះតទៅ។
តាមរបាយការណ៍ ខណ្ឌឬស្សីកែវ មានកម្មករ-កម្មការិនី ប្រមាណជា១៣០០នាក់ ដែលនឹងត្រូវដាក់ឲ្យនៅដាច់ដោយឡែកក្នុងរយៈពេល១៤ថ្ងៃនេះ។
គួរជំរាបជូនថា សាលាវិទ្យាល័យឬស្សីកែវ គឺជាសាលារៀនមួយ ក្នុងចំណោមសាលារៀនចំនួន ៣៧ ដែលអាជ្ញាធររាជធានីភ្នំពេញ បាននិងកំពុងត្រៀមរៀបចំដើម្បីដាក់កម្មករ-កម្មការិនី ប្រមាណជា១៥៧២៦នាក់ នៃរោងចក្រចំនួន ៦៧២ ឲ្យនៅដាច់ដោយឡែកក្នុងរយៈពេល១៤ថ្ងៃ ដើម្បីការពារការចម្លងពីជំងឺកូវីដ-១៩ បន្ទាប់ពីពួកគេទើបវិលត្រលប់មកពីចូលរួមពិធីបុណ្យចូលឆ្នាំថ្មីកន្លងទៅនេះ។ ពិធីបុណ្យចូលឆ្នាំថ្មី ដែលរដ្ឋាភិបាលកម្ពុជា បានសម្រេចមិនឲ្យកម្មករនិយោជិតឈប់សម្រាកឡើយ ដើម្បីការពារការចម្លងមេរោគកូរ៉ូណា ឬ ជំងឺកូវីដ១៩ ទៅក្នុងសហគមន៍។
ដោយឡែកយោងតាមសេចក្តីណែនាំរបស់ក្រសួងការងារ ចុះថ្ងៃទី ១៧ មេសា បានព្រមានថា នឹងបញ្ឈប់ការងាររបស់កម្មករ-កម្មការិនីរូបណា ដែលមិនបានអនុវត្តកាតព្វកិច្ចចត្តាឡីស័ករយៈពេល១៤ថ្ងៃ ក្រោយពីត្រលប់មកពីចូលរួមពិធីបុណ្យចូលឆ្នាំថ្មីវិញនេះ។ ការធ្វើចត្តាឡីស័ករយៈពេល១៤ថ្ងៃ កម្មករនិយោជិតដែលឈប់សម្រាកដោយឯកឯង នឹងមិនទទួលបានប្រាក់ឈ្នួលនៅក្នុងកំឡុងពេលធ្វើចត្តាឡីស័កនេះឡើយ។ ចំណែកឯកម្មករនិយោជិត ដែលឈប់សម្រាកដោយមានការអនុញ្ញាតត្រឹមត្រូវ និងទទួលបានប្រាក់ឈ្នួលចំនួន០៧ថ្ងៃ នៅក្នុងកំឡុងពេលនៃការធ្វើចត្តាឡីស័ករយៈពេល១៤ថ្ងៃនេះ៕