ការងារ | កូរ៉ូណាវីរុស | ព័ត៌មានជាតិ
លោក ឃុត សុគន្ធ | ០១ ឧសភា ២០២០ | ម៉ោង ៤:៥០ ល្ងាច
VOD
សហភាពការងារកម្ពុជា និងតំណាងសហព័ន្ធ សមាគមទាំង ៨វិស័យ បានដាក់ញ្ញត្តិចំនួន ១៨ចំណុច ជូនរាជរដ្ឋាភិបាល តាមរយៈខុទ្ធការល័យសម្តេច ហ៊ុន សែន ក្នុងថ្ងៃទិវាពលកម្មអន្តរជាតិ ១ឧសភា ខួបលើកទី១៣៤ ឆ្នាំ២០២០។ (CLC Cambodia)
ក្រុមសហជីពមកពីវិស័យផ្សេងៗ បានស្នើនៅថ្ងៃទិវាពលកម្មអន្តរជាតិនេះ ឱ្យរដ្ឋាភិបាលបន្តយកចិត្តទុកដាក់ និងដោះស្រាយវិបត្តិរបស់កម្មករអំឡុងពេលពួកគេត្រូវព្យួរការងារ ខណៈកម្មករបាត់បង់ចំណូល ហើយប្រឈមជំពាក់បំណុលកើនឡើងទ្វេ និងរងការរំលោភបំពានសិទ្ធិផ្សេងៗដែលមានចែងក្នុងច្បាប់។
ក្រុមសហជីពមានសហភាពការងារកម្ពុជា សម័ន្ធសហជីពស៊ីខៅឌូ សហព័ន្ធសហជីពកម្មករនិយោជិតវិស័យទេសចរណ៍សេវាកម្មកម្ពុជា សហព័ន្ធសហជីពកម្មករនិយោជិតវិស័យឧស្សាហកម្មកម្ពុជា សហព័ន្ធសហជីពកម្មករសំណង់ និងព្រៃឈើ រួមទាំងសហព័ន្ធសហជីពផ្សេងៗទៀត នៅថ្ងៃនេះ បានដាក់លិខិតរួមគ្នាមួយទៅខុទ្ទកាល័យនាយករដ្ឋមន្ត្រី ដើម្បីស្នើទៅលោក ហ៊ុន សែន បន្តយកចិត្តទុកដាក់ និងដោះស្រាយបញ្ហារបស់កម្មករដែលត្រូវបានព្យួរ និងបញ្ឈប់ពីការងារ។
ក្នុងលិខិតមួយដាក់ទៅខុទ្ទកាល័យនាយករដ្ឋមន្ត្រី នៅថ្ងៃនេះ ក្រុមសហជីពទាំងនោះបានលើកឡើងថា នៅដើមឆ្នាំ២០២០នេះ បញ្ហាអត់ការងារធ្វើ បញ្ហាបាត់បង់ប្រាក់ចំណូលដែលបណ្តាលមកពីជំងឺកូវីដ១៩ កំពុងក្លាយជាបញ្ហាដ៏ធំមួយរបស់កម្មករគ្រប់វិស័យ។
លិខិតដដែលនេះ លើកឡើងទៀតថា ថ្មីៗនេះ មានក្រុមហ៊ុនមួយចំនួនបានបិទទ្វាររោងចក្រដោយបញ្ឈប់ការងារកម្មករ និងសហជីព ដោយមិនបានបើកប្រាក់ឈ្នួល និងទូទាត់អត្ថប្រយោជន៍ផ្សេងៗជូនកម្មករត្រឹមត្រូវតាមផ្លូវច្បាប់នោះទេ ដែលធ្វើឱ្យកម្មករជាច្រើនកំពុងប្រឈមបញ្ហាជីវភាព។
ក្រុមសហជីព បានទាមទារទៅរដ្ឋាភិបាលឱ្យរក្សាការផ្តល់ប្រាក់ឈ្នួលប្រចាំខែយ៉ាងតិច ៦០ភាគរយ ជូនកម្មករ ដោយរដ្ឋាភិបាលចេញ ២០ភាគរយ និងនិយោជក ៤០ភាគរយនៃប្រាក់ឈ្នួលរបស់កម្មករគ្រប់វិស័យនៅអំឡុងពេលនៃការរីករាលដាលជំងឺកូវីដ១៩។
ក្រុមសហជីព ក៏ជំរុញរដ្ឋាភិបាលអន្តរាគមន៍មិនឱ្យថៅកែឆ្លៀតឱកាសនៃការព្យួរកិច្ចសន្យាការងារប្រែទៅជាបិទរោងចក្រ ឬបញ្ឈប់កម្មករ និងតំណាងសហជីពពីការងារនោះទេ និងស្នើទៅរដ្ឋាភិបាលចេញវិធានការឱ្យខាងធនាគារ ឬគ្រឹះស្ថានមីក្រូហិរញ្ញវត្ថុ ផ្អាកការទារប្រាក់បណ្តោះអាសន្ន ទាំងថ្លៃដើម និងការប្រាក់ នៅអំឡុងនៃការរីករាលដាលជំងឺកូវីដ១៩នេះផងដែរ។
មន្ត្រីខុទ្ទកាល័យនាយករដ្ឋមន្ត្រី គឺលោក គង់ ចំរើន បានទទួលញត្តិពីក្រុមសហជីពនៅម៉ោងប្រមាណ ១២ថ្ងៃត្រង់នេះ។
ថ្លែងក្នុងកម្មវិធីផ្សាយផ្ទាល់តាមរយៈហ្វេសប៊ុករបស់សហភាពការងារកម្ពុជា ស្តីពីទិវាពលកម្មអន្តរជាតិ១ឧសភា ប្រធានសម្ព័ន្ធសហជីពស៊ីខៅឌូ លោក គង់ អាទិត្យ មានប្រសាសន៍ថា តាមរបាយការណ៍ដែលស៊ីខៅឌូទទួលបាន គឺមានរោងចក្រចំនួន៣ បានបិទទ្វារ ក្រោមហេតុផលគ្មានអ្នកបញ្ជាទិញ និងបិទខុសនីតិវិធីច្បាប់។
លោក គង់ អាទិត្យ អះអាងថា ថៅកែរោងចក្រទាំងនោះបានគំរាមកំហែង និងបង្ខំឱ្យកម្មកររួមទាំងសហជីពឱ្យលាឈប់ពីការងារ ដោយមិនបានដោះស្រាយសំណងត្រឹមត្រូវនោះទេ។
លោកបន្ថែមថា៖ «មានរោងចក្រខ្លះ បញ្ឈប់ទាំងសកម្មជនសហជីពទៀត។ នេះរបាយការណ័ និងភស្តុតាងបញ្ជាក់ពីការរើសអើង។ អីចឹងចំណុចនេះក៏សំខាន់ដែរ ដែលភាគីរដ្ឋាភិបាល និងសមាគមនិយោជក ត្រូវត្រួតពិនិត្យឱ្យបានច្បាស់លាស់ក្នុងការការពារសិទ្ធិសេរីភាព ទោះស្ថិតក្នុងពេលមានវិបត្តអីចឹងក៏ដោយ។ យើងការពាររោងចក្រឱ្យមានសុវត្ថិភាព យើងក៏ត្រូវការពារសិទ្ធិកម្មករដែរ»។
អនុប្រធានសហភាពការងារកម្ពុជា អ្នកស្រី ហេង ចន្ថា មានប្រសាសន៍ថា ក្នុងរយៈពេលព្យួរការងារ គឺកម្មករទទួលបានប្រាក់តែ ៧០ដុល្លារ មិនគ្រាប់គ្រាន់សម្រាប់ពួកគេផ្តត់ផ្គង់ក្នុងការចំណាយ និងប្រឈមជំពាក់បំណុលទ្វេដង។
អ្នកស្រី ហេង ចន្ថា បន្តថា ចំពោះកម្មករដែលត្រូវបានបញ្ឈប់ពីការងារ គឺពួកគេមិនអាចទៅរកកន្លែងថ្មីធ្វើបានភ្លាមៗទេ ខណៈដែលរោងចក្រមួយចំនួនក៏កំពុងព្យួរការងារកម្មករដែរនោះ។
អ្នកស្រីបន្ថែមថា៖ «អីចឹងហើយ បញ្ហាប្រឈមរបស់ពួកគាត់ គឺគាត់មានបញ្ហាផ្នែកជីវភាព។ យើងដឹងហើយថា បច្ចុប្បន្ន គាត់ជួលផ្ទះ ថ្លៃទឹកភ្លើង ថ្លៃចំណាយក្នុងគ្រួសារ កូនរៀន។ ហើយជាពិសេសមួយទៀតនោះ យើងឃើញថា គាត់ជំពាក់លុយធនាគារច្រើនទៀតផង។ អីចឹងទឹកប្រាក់ចំនួន ៧០ដុល្លារនេះ មិនអាចផ្គត់ផ្គង់ក្នុងជីវភាពរបស់ពួកគាត់បានទេ»។
ចំណែកប្រធានសហព័ន្ធសហជីពកម្មករនិយោជិតវិស័យទេសចរណ៍សេវាកម្មកម្ពុជា លោក ម៉ម រិទ្ធី មានប្រសាសន៍ថា មានកម្មករប្រមាណ ៦០ម៉ឺននាក់ បម្រើការងារក្នុងវិស័យទេសចរណ៍។ លោកថា អំឡុងពេលនៃការរីករាលដាលជំងឺកូវីដ១៩ គឺកម្មករក្នុងវិស័យមួយនេះ ក៏កំពុងប្រឈមអត់ការងារធ្វើដែរ ដោយក្រុមហ៊ុនសណ្ឋាគារមួយចំនួនបានបិទទ្វារ។
លោក ម៉ម រិទ្ធី អះអាថា ថៅកែប្រហែល ៩០ភាគរយ គឺមិនបានអនុវត្តសេចក្តីប្រកាសរបស់រដ្ឋាភិបាល ជាពិសេសនោះផ្នែកកាស៊ីណូ ពេលព្យួរការងារកម្មករគឺមិនបានផ្តល់ប្រាក់ឈ្នួលជូនកម្មករឡើយ។
លោកបន្ថែមថា៖ «សម្រាប់ក្រសួងការងារ ខ្ញុំស្នើឱ្យចុះអធិការកិច្ច ឬសិក្សាទៅក្រុមហ៊ុនទាំងអស់ នៅពេលដែលជំងឺកូវីដ១៩នេះ ត្រូវបានបញ្ចប់ ឬមានថ្នាំព្យាបាល ឬត្រូវហៅកម្មករចូលធ្វើការងារវិញ គឺសុំឱ្យរក្សាអតីតភាពការងារ អត្ថប្រយោជន៍ ហើយហៅកម្មករមកវិញ ដោយពុំមានការរើសអើង ឱ្យពួកគាត់នៅកន្លែងដើមវិញទាំងអស់។ ចំពោះនិយោជកទាំងអស់ទូទាំងប្រទេស ខ្ញុំគិតថា សណ្ឋាគារ ភោជនីយដ្ឋាន កាស៊ីណូ ផ្ទះសំណាក់ គឺរកលុយបានចំនេញច្រើនណាស់តាមរយៈកម្មករបម្រើការងារទៅឱ្យ។ អីចឹង លុយចំនេញពីមុនហ្នឹង គួរតែបញ្ចេញមកជួយកម្មករវិញក្នុងអំឡុងពេលនេះ»៕
ក្នុងសន្និសីទសារព័ត៌មានមួយនៅទីស្តីការគណៈរដ្ឋមន្ត្រីកាលពីថ្ងៃទី២៧ ខែមេសា អ្នកនាំពាក្យក្រសួងការងារ និងបណ្តុះបណ្តាលវិជ្ជាជីវៈ លោក ហេង សួរ ឱ្យដឹងថា មានរោងចក្រជាង ១៣០ បានដាក់ពាក្យព្យួរការងារ និងប៉ះពាល់កម្មករប្រហែល ១០ម៉ឺននាក់។
កាលពីថ្ងៃទី៧ ខែមេសា លោកនាយករដ្ឋមន្ត្រី ហ៊ុន សែន ប្រកាសថា អំឡុងពេលព្យួរការងារ កម្មករនឹងទទួលបានប្រាក់ ៧០ដុល្លារក្នុងមួយខែ ដោយក្នុងនោះ រដ្ឋាភិបាលរួមចំណែក ៤០ដុល្លារ ហើយថៅកែរោងចក្រត្រូវចេញ ៣០ដុល្លារវិញ។ លោកបញ្ជាក់ថា ប្រាក់ ៤០ដុល្លារនេះ កម្មករទទួលបានដោយមិនចាំបាច់ចុះឈ្មោះ និងចូលរៀនវគ្គបណ្តុះបណ្តាលនោះទេ ប៉ុន្តែក្រុមសហជីពថា ប្រាក់ ៧០ដុល្លារនេះ មិនអាចផ្តត់ផ្គង់ជីវភាពគ្រួសារបានគ្រប់គ្រាន់ឡើយ៕
រក្សាសិទ្វិគ្រប់យ៉ាងដោយ ស៊ីស៊ីអាយអឹម
សូមបញ្ជាក់ថា គ្មានផ្នែកណាមួយនៃអត្ថបទ រូបភាព សំឡេង និងវីដេអូទាំងនេះ អាចត្រូវបានផលិតឡើងវិញក្នុងការបោះពុម្ពផ្សាយ ផ្សព្វផ្សាយ ការសរសេរឡើងវិញ ឬ ការចែកចាយឡើងវិញ ដោយគ្មានការអនុញ្ញាតជាលាយលក្ខណ៍អក្សរឡើយ។ ស៊ីស៊ីអាយអឹម មិនទទួលខុសត្រូវចំពោះការលួចចម្លងនិងចុះផ្សាយបន្តណាមួយ ដែលខុស នាំឲ្យយល់ខុស បន្លំ ក្លែងបន្លំ តាមគ្រប់ទម្រង់និងគ្រប់មធ្យោបាយ។ ជនប្រព្រឹត្តិ និងអ្នកផ្សំគំនិត ត្រូវទទួលខុសត្រូវចំពោះមុខច្បាប់កម្ពុជា និងច្បាប់នានាដែលពាក់ព័ន្ធ។