កូវីដ-១៩ | ព័ត៌មានជាតិ
កញ្ញា ខាន់ លក្ខិណា | ១៨ មករា ២០២១ |ម៉ោង ១៨:២៣
VOD
អាជ្ញាធរនិងមន្ត្រីពាក់ព័ន្ធខេត្តបន្ទាយមានជ័យ ចុះទៅពិនិត្យមើលមណ្ឌលធ្វើចត្តាឡីស័កពលករខ្មែរដែលត្រឡប់មកពីប្រទេសថៃ នៅទីតាំងធ្វើចត្តាឡីស័កមួយកន្លែងនៅក្នុងខេត្តបន្ទាយមានជ័យ ថ្ងៃទី០៥ ខែមករា ឆ្នាំ២០២១។ (ហ្វេសប៊ុក៖ រដ្ឋបាលខេត្តបន្ទាយមានជ័យ)
មន្ត្រីជាន់ខ្ពស់ក្រសួងមហាផ្ទៃ ឱ្យដឹងថា ក្នុងរយៈពេលជិតមួយខែក្រោយពីថៃមានករណីឆ្លងរាលដាលជំងឺកូវីដ១៩ មានពលករខ្មែរដែលធ្វើការនិងរស់នៅទីនោះជិត ៧ ០០០នាក់ បានត្រឡប់មកកម្ពុជាវិញ ក្នុងនោះមាន ៦៩នាក់ ត្រូវបានរកឃើញថាឆ្លងជំងឺកូវីដ១៩។
អ្នកនាំពាក្យអគ្គនាយកដ្ឋានអន្តោប្រវេសន៍នៃក្រសួងមហាផ្ទៃ លោក កែវ វណ្ណថន ប្រាប់វីអូឌីនៅថ្ងៃចន្ទនេះថា គិតចាប់តាំងពីប្រទេសថៃផ្ទុះការឆ្លងរាលដាលជំងឺកូវីដ១៩ នៅខេត្តសាមុតសាខន កាលពីថ្ងៃទី២០ ខែធ្នូ ឆ្នាំ២០២០ មកដល់ថ្ងៃម្សិលមិញនេះ មានពលករខ្មែរសរុបចំនួន ៦ ៨៥៣ នាក់ (ក្នុងនោះស្រ្តី ២ ៨៥៥នាក់) ដែលបានត្រឡប់មកពីប្រទេសថៃ។
កាលពីថ្ងៃទី១៩ ខែធ្នូ ឆ្នាំ២០២០ ក្រសួងសុខភាពសាធារណៈថៃ បានរកឃើញករណីឆ្លងក្នុងសហគមន៍ដែលផ្ទុះឡើងនៅខេត្តសាមុតសាខន ក្នុងចំណោមពលករបរទេសដែលធ្វើការនៅផ្សារចែកចាយបង្គារមួយកន្លែង។
បើតាមសេចក្តីជូនព័ត៌មានរបស់ក្រសួងសុខាភិបាល គិតមកដល់ព្រឹកថ្ងៃចន្ទនេះ មានពលករខ្មែរចំនួន៦៩នាក់ដែលរកឃើញថាបានឆ្លងជំងឺកូវីដ១៩ ក្នុងនោះបានព្យាបាលជាសះស្បើយចំនួន២១នាក់។
ប្រធានរដ្ឋបាលខេត្តបាត់ដំបង លោក សឿម ប៊ុនរិទ្ធ ប្រាប់វីអូឌីថា រាល់ពលករខ្មែរដែលមកពីប្រទេសថៃ ត្រូវបានដាក់ឱ្យធ្វើចត្តាឡីស័កនិងយកសំណាកមកធ្វើតេស្តរកវីរុសកូវីដ១៩។ លោកបន្តថា បច្ចុប្បន្នពលករដែលកំពុងធ្វើចត្តាឡីស័កក្នុងខេត្តនេះមានចំនួន ១ ២១៨នាក់ រួមទាំងបុគ្គលិកកាស៊ីណូនៅជិតព្រំដែនចំនួន ២០០នាក់ផងដែរ។
លោកបញ្ជាក់ថា ក្នុងខេត្តនេះមានពលករខ្មែរចំនួន១៧នាក់បានរកឃើញថាបានឆ្លងកូវីដ១៩ ក្នុងនោះព្យាបាលជាសះស្បើយចំនួន៦នាក់។
លោកថា៖ «ឱ្យគាត់ធ្វើចត្តាឡីស័ក ហើយយើងយកសំណាកគាត់ទាំងអស់ទៅមើលឱ្យប្រាកដថា អ្នកហ្នឹងមានឬអត់មាន ព្រោះកន្លងមក អ្នកខ្លះ១៤ថ្ងៃ ត្រូវចេញ បែរជាមានវិជ្ជមានម្នាក់នៅកំរៀង ដល់អ៊ីចឹងយើងឱ្យអ្នកនៅបន្ទប់ជាមួយត្រូវធ្វើចត្តាឡីស័ក១៤ថ្ងៃទៀត។ កន្លងមក យើងមានករណីអ៊ីចឹង យើងត្រូវមានការប្រយ័ត្នប្រយែងខ្ពស់»។
ចំណែកប្រធានមន្ទីរសុខាភិបាលខេត្តឧត្ដរមានជ័យ លោក ឃ្លោត ហួត ប្រាប់វីអូឌីថា ពលករដែលកំពុងធ្វើចត្តាឡីស័កនិងយកសំណាកទៅពិនិត្យមានចំនួន២ ២៦០នាក់ ក្នុងនោះមាន១៣នាក់ស្ថិតក្នុងហានិភ័យ។
លោកបន្តថា ក្នុងអំឡុងពេលធ្វើចត្តាឡីស័កនេះ អាជ្ញាធរបានជួបបញ្ហាប្រឈមមួយចំនួន ខណៈមានពលរដ្ឋខ្លះបានចោទអាជ្ញាធរថាមិនបានយកចិត្តទុកដាក់ចំពោះពួកគាត់។
ប្រធានមន្ទីររូបនេះថ្លែងថា៖ «គាត់ [ពលករដែលធ្វើចត្តាឡីស័ក] រករឿងថា យើងដំាបាយឆៅឱ្យគាត់ហូប ដាំបាយ [អង្ករ] ប្លាស្ទិកឱ្យគាត់ហូប ហើយនៅឧត្ដរមានជ័យមានអង្ករប្លាស្ទិកមកពីណា បើអ្នកឧត្ដរមានជ័យជាកន្លែងផលិតស្រូវ ហើយអង្ករនៅនេះវាថោក ស្រូវនៅនេះវាថោក។ គាត់រករឿងតាំងពីម្ហូប ថាធ្វើតែប្រហុកឱ្យគាត់ហូប យើងមិនដែលធ្វើឱ្យអ្វីដែលគាត់និយាយផង ជាក់ស្ដែងមុខម្ហូបយើងដូររាល់ពេល ដោយសារគាត់មិនចង់នៅ គាត់មានការចង់ទៅផ្ទះ រករឿងគ្រប់បែបយ៉ាង ខ្លះថាម្ដាយស្លាប់ ខ្លះថាកូនស្លាប់ ដោះស្រាយមិនចេះចប់ទេ»។
អភិបាលរងខេត្តបន្ទាយមានជ័យ លោក លី សារី មានប្រសាសន៍ថា ខេត្តនេះមានពលករខ្មែរជិត៤ ០០០នាក់ដែលមកពីថៃ ដោយសារពួកគេអត់មានការងារធ្វើ និងអ្នកខ្លះទៀតថា គ្រួសារនៅផ្ទះឈឺ ជាដើម។ លោកបន្តថា ពលករទាំងនោះត្រូវបានដាក់ឱ្យធ្វើចត្តាឡីស័កនិងយកសំណាកទៅពិនិត្យ ដើម្បីទប់ស្កាត់ការឆ្លងរាលដាលជំងឺកូវីដ១៩ ខណៈថៃកំពុងផ្ទុះជំងឺនេះ។
ពាក់ព័ន្ធនឹងការធ្វើចត្តាឡីស័កនេះដែរ កាលពីថ្ងៃទី១៦ ខែមករា ឆ្នាំ២០២១ បុរសខ្មែរសញ្ជាតិអាមេរិកាំងម្នាក់បានរត់ចេញពីកន្លែងធ្វើចត្តាឡីស័ក ក្នុងខណ្ឌចំការមន រាជធានីភ្នំពេញ ប៉ុន្តែត្រូវបានសមត្ថកិច្ចរកឃើញវិញនៅថ្ងៃបន្ទាប់។
ប្រធានមន្ទីរសុខាភិបាលរាជធានីភ្នំពេញ លោក ងី មានហេង មានប្រសាសន៍ថា មន្ត្រីសុខាភិបាលនិងអាជ្ញាធរនៅមិនទាន់មានវិធានការផាកពិន័យទៅលើបុរសដែលរត់ចេញពីមណ្ឌលចត្តាឡីស័កនោះនៅឡើយ។
លោកថា៖ «ឥលូវអត់ទាន់និយាយអីទេ ចាំគ្រប់១៤ថ្ងៃសិន រាប់ពីម្សិលមិញមក គឺពីថ្ងៃទី១៧ ខែមករា ដែលយើងចាប់គាត់ចូលវិញ គ្រប់១៤ថ្ងៃ អវិជ្ជមានហើយ យើងសុំគោលការណ៍ថ្នាក់ដឹកនាំតើត្រូវធ្វើម៉េច? បើអត់លុយបង់ តើត្រូវឱ្យទៅនៅណា? ខ្ញុំនឹងធ្វើទៅតាមថ្នាក់ដឹកនាំគាត់សម្រេច»។
មន្ត្រីកម្មវិធីផ្នែកទេសន្តរប្រវេសន៍នៃមជ្ឈមណ្ឌលសម្ព័ន្ធភាពការងារ និងសិទ្ធិមនុស្ស ហៅកាត់ថា សង់ត្រាល់ លោក ឌី ថេហូយ៉ា ជំរុញឱ្យរដ្ឋាភិបាលយកចិត្តទុកចំពោះពលករដែលកំពុងធ្វើចត្តាឡីស័ក ពាក់ព័ន្ធការស្នាក់នៅនិងអាហារបន្ថែមទៀត។
លោកបាននិយាយថា៖ «ការស្នាក់នៅ១៤ថ្ងៃ ជាបញ្ហាមួយ។ បញ្ហាមួយទៀត បន្ទាប់ពីគាត់ចេញទៅ គាត់ប្រកបមុខរបរអី គាត់រកចំណូលអី គាត់អាចចិញ្ចឹមជីវភាពរស់នៅបាន ក៏ដូចជាដោះបំណុលបាន។ យើងដឹងស្រាប់ហើយថា ប្រសិនអត់មានកិច្ចគាំពារសង្គមពីរដ្ឋាភិបាល បន្ទាប់ពីគាត់ស្នាក់នៅមណ្ឌលចត្តាឡីស័ក គាត់បានអីទទួលទាន ហើយកាលដែលគាត់មិនមានមុខរបរ បញ្ហាជំពាក់បំណុល តើគួររៀបចំបែបម៉េចបន្តទៀត។ អាហ្នឹងត្រូវគិតគូររយៈពេលវែងចំពោះការគាំពារផ្នែកសង្គមដល់ពួកគាត់»។
បើតាមក្រសួងសុខាភិបាល គិតត្រឹមថ្ងៃទី១៨ ខែមករា ឆ្នាំ២០២១ កម្ពុជាបានរកឃើញអ្នកឆ្លងជំងឺកូវីដ១៩ សរុបចំនួន៤៣៩នាក់ ក្នុងនោះអ្នកព្យាបាលជាសះស្បើយចំនួន៣៨៦នាក់ និងអ្នកកំពុងសម្រាកនៅមន្ទីរពេទ្យចំនួន៥៣នាក់៕
រក្សាសិទ្វិគ្រប់យ៉ាងដោយ ស៊ីស៊ីអាយអឹម
សូមបញ្ជាក់ថា គ្មានផ្នែកណាមួយនៃអត្ថបទ រូបភាព សំឡេង និងវីដេអូទាំងនេះ អាចត្រូវបានផលិតឡើងវិញក្នុងការបោះពុម្ពផ្សាយ ផ្សព្វផ្សាយ ការសរសេរឡើងវិញ ឬ ការចែកចាយឡើងវិញ ដោយគ្មានការអនុញ្ញាតជាលាយលក្ខណ៍អក្សរឡើយ។ ស៊ីស៊ីអាយអឹម មិនទទួលខុសត្រូវចំពោះការលួចចម្លងនិងចុះផ្សាយបន្តណាមួយ ដែលខុស នាំឲ្យយល់ខុស បន្លំ ក្លែងបន្លំ តាមគ្រប់ទម្រង់និងគ្រប់មធ្យោបាយ។ ជនប្រព្រឹត្តិ និងអ្នកផ្សំគំនិត ត្រូវទទួលខុសត្រូវចំពោះមុខច្បាប់កម្ពុជា និងច្បាប់នានាដែលពាក់ព័ន្ធ។