ដោយ សុជីវី
2022-03-06
RFA
អ្នកស្លាប់ដោយសារជំងឺកូវីដ-១៩ បានកើនឡើងដល់ ៣ពាន់ ៤១នាក់ (៣.០៤១) ហើយ ក្រោយពីអ្នកជំងឺម្នាក់ទៀតបានស្លាប់។ ចំណែកករណីឆ្លងថ្មីវិញ ក្រសួងសុខាភិបាល ប្រកាសថា មានចំនួនជាង ៣រយនាក់ (៣៣០) ដែលសុទ្ធតែជាមេរោគបំប្លែងខ្លួនថ្មី អូមីក្រុង (Omicron) ក្នុងនោះ ១៣នាក់ជាករណីនាំចូល និង ៣១៧នាក់ទៀតជាករណីឆ្លងក្នុងសហគមន៍។
គិតត្រឹមព្រឹកថ្ងៃទី៦ ខែមីនានេះ កម្ពុជាមានអ្នកកើតជំងឺកូវីដ-១៩ ជាង ១សែន ៣ម៉ឺននាក់ (១៣២.៤០២) ក្នុងនោះអ្នកជាសះស្បើយមានជាង ១ សែន ២ម៉ឺននាក់ (១២៦.៤៣៩)។
ក្រសួងសុខាភិបាល ប្រកាសថា គិតត្រឹមថ្ងៃទី៥ ខែមីនា ម្សិលមិញ រដ្ឋាភិបាលចាក់វ៉ាក់សាំងគ្រប់ដូសជូនពលរដ្ឋបានជាង ១៣ លាន ៨សែននាក់ ក្នុងចំណោមពលរដ្ឋដែលត្រូវចាក់ប្រមាណ ១៤ លាននាក់ រាប់ពីកុមារអាយុ៥ឆ្នាំរហូតដល់មនុស្សពេញវ័យ។ រីឯដូសជំរុញទី ៣ និងទី ៤វិញ រដ្ឋាភិបាលចាក់ជូនពលរដ្ឋបានជាង ៨លាននាក់ ស្របពេលកុមារអាយុពី ៣ ឆ្នាំដល់ក្រោម ៥ ឆ្នាំ រដ្ឋាភិបាលចាក់ដូសទី ១ បានជាង ២សែននាក់៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។