កម្ពុជា-សង្គម
07/03/2022 – 07:03
ដោយ៖ អ៊ឹង ប៊ុនថន
RFI
ទីតាំងកន្លែងកម្សាន្តមួយនៅក្រុងសីហនុ © Internet
ក្រុមការងារហិរញ្ញវត្ថុ ហៅកាត់ថា (FATF) ដែលមានមូលដ្ឋាននៅទីក្រុងប៉ារីស កាលពីថ្ងៃទី៤ ខែមីនា បានសម្រេចបន្តដាក់កម្ពុជាឲ្យស្ថិតក្នុង «បញ្ជីប្រផេះ» នៃក្រុមប្រទេសដែលមានហានិភ័យខាងលាងលុយកខ្វក់ ដែលពិភពលោកត្រូវបង្កើនការតាមដានក្នុងឆ្នាំនេះ។ ការរក្សាចំណាត់ថ្នាក់ដដែលនេះ គឺមិនមានន័យថា កម្ពុជាមានការប្រសើរឡើងទេ ទោះបីជាកម្ពុជាបានខិតខំប្រឹងប្រែង ធ្វើសេចក្ដីព្រាងច្បាប់ស្ដីពីការប្រឆាំងការសម្អាតប្រាក់ និងហិរញ្ញប្បទានភេរវកម្ម ឬការលាងលុយកខ្វក់ តាំងពីឆ្នាំពី២០២០ក៏ដោយ។
ដូចកាលពីឆ្នាំ២០២១ដែរ គឺកម្ពុជានៅតែបន្តស្ថិតក្នុងក្រសែភ្នែកនៃការតាមដានអំពើលាងលុយកខ្វល់ជាដដែល ខណៈឆ្នាំ២០២២នេះក្រុមការងារហិរញ្ញវត្ថុ ហៅកាត់ថា (FATF) សម្រេចរក្សាកម្ពុជានៅក្នុង «បញ្ជីប្រផេះ»។ បញ្ជីប្រផេះដែលមានន័យថា កម្ពុជានៅតែស្ថិតក្នុងចំណោមប្រទេសដែលមានហានិភ័យលើការលាងលុយកខ្វក់។
ក្រុមការងារនេះ បានសម្តែងកង្វល់ជាខ្លាំងដែលកម្ពុជាខកខានមិនអាចបំពេញបានតាមផែនការសកម្មភាពដូចដែលបានដាក់ចេញកាលពីខែមករា ឆ្នាំ២០២១ ។ អង្គការដដែលនេះបានជំរុញជាថ្មីទៀតឲ្យកម្ពុជាត្រូវបង្ហាញការប្តេជ្ញាចិត្តកាន់តែខ្លាំងក្លាទៅកាន់សហគមន៍អន្តរជាតិឲ្យបានឃើញពីការវិវឌ្ឍន៍ឆាប់រហ័សក្នុងការបំពេញតាមផែនការសកម្មភាពដែលខ្លួនបានដាក់ចេញនៅត្រឹមខែមិថុនា ឆ្នាំ២០២២នេះ។
បើពុំដូច្នោះទេ អង្គការក្រុមការងារហិរញ្ញវត្ថុ ព្រមានថា ខ្លួននឹងពិចារណានូវជំហ៊ានបន្ទាប់មកលើកម្ពុជាពាក់ព័ន្ធនឹងការលាងលុយកខ្វក់នេះ។ ជំហ៊ានបន្ទាប់ គឺសំដៅដល់ការអំពាវនាវដល់ប្រទេសសមាជិក និងយុត្តាធិការទាំងអស់នៅទូទាំងពិភពលោក ឲ្យបង្កើនការតាមដានត្រួតពិនិត្យលើរាល់ទំនាក់ទំនង និងប្រតិបត្តិការអាជីវកម្មទាំងអស់ជាមួយកម្ពុជា។
ជាការកត់សំគាល់ កម្ពុជាត្រូវបានអង្គការនេះ ដាក់ក្នុង «បញ្ជីប្រផេះ» អស់រយៈពេលជាង៣ឆ្នាំជាប់ៗគ្នាតាំងពីឆ្នាំ២០១៩មក។ ប៉ុន្តែកាលពីឆ្នាំ២០២០ សេចក្ដីព្រាងច្បាប់ស្ដីពីការប្រឆាំងការសម្អាតប្រាក់និងហិរញ្ញប្បទានភេរវកម្ម ឬការលាងលុយកខ្វក់ ត្រូវបានអនុម័តដោយគណៈរដ្ឋមន្ត្រីកម្ពុជា។ ការអនុម័តសេចក្តីព្រាងច្បាប់នេះ គឺស្របពេលដែលគណៈកម្មការអឺរ៉ុប បានស្នើដាក់ប្រទេសកម្ពុជា និងប្រទេសចំនួន១១ទៀតទៅក្នុង«បញ្ជីខ្មៅ»ដែលសហភាពអឺរ៉ុបបង្កើនការតាមដានខ្លាំងជាងមុន បន្ទាប់ពីកម្ពុជាស្ថិតក្នុងបញ្ជីពណ៌ «ប្រផេះ» នៃការលាងលុយកខ្វក់ និងហិរញ្ញប្បទានភេរវកម្មនៅឆ្នាំ២០១៩។ វិស័យដែលរងហានិភ័យខ្ពស់ខាងអំពើលាងលុយកខ្វក់នៅកម្ពុជា រួមមាន វិស័យធនាគារ ហិរញ្ញវត្ថុ វិស័យសំណង់ អចលនទ្រព្យ និងវិស័យកាស៊ីណូ៕