នយោបាយ ព័ត៌មានជាតិ
កញ្ញា ខាន់ លក្ខិណា | ១១ តុលា ២០២២ | ម៉ោង ១៦:២៥
VOD
(រូបឆ្វេង) លោកនាយករដ្ឋមន្រ្តី ហ៊ុន សែន និងលោក សម រង្ស៊ី មេដឹកនាំអតីតបក្សប្រឆាំងនៅកម្ពុជា (រូបស្តាំ)
លោកនាយករដ្ឋមន្ត្រី ហ៊ុន សែន និងលោក សម រង្ស៊ី បកស្រាយពីភាពជោគជ័យរៀងខ្លួន ជុំវិញសាលក្រមតុលាការប្រទេសបារាំង ដែលបានប្រកាសកាលពីថ្ងៃទី១០ ខែតុលា ពាក់ព័ន្ធសំណុំរឿង «បរិហារកេរ្តិ៍» ដែលលោក ហ៊ុន សែន ប្ដឹងលោក សម រង្ស៊ី ចំពោះការចោទថា លោកជាអ្នកសម្លាប់អតីតអគ្គស្នងការនគរបាលជាតិ លោក ហុង ឡង់ឌី ដែលត្រូវជាដន្លងរបស់ខ្លួន។
ក្នុង ពិធីប្រគល់សញ្ញាបត្រជូននិស្សិតសាកលវិទ្យាល័យភ្នំពេញអន្តរជាតិ (PPIU) នៅថ្ងៃទី១១ ខែតុលា លោក ហ៊ុន សែន ថ្លែងថា លោក សម រង្ស៊ី បានចោទប្រកាន់លើរូបលោក ពាក់ព័ន្ធនឹងការស្លាប់ដន្លងរបស់លោក គឺលោក ហុក ឡង់ឌី ប៉ុន្តែបែរជាគ្មានភស្តុតាងសម្អាងដាក់ទៅតុលាការនោះឡើយ។
តែយ៉ាងណា លោក ហ៊ុន សែន ចាត់ទុកសេចក្ដីសម្រេចរបស់តុលាការបារាំង ដែលបានប្រកាសកាលពីថ្ងៃទី១០ ខែតុលានេះថា បានផ្ដល់យុត្តិធម៌និង បញ្ជាក់ពីភាពស្អាតស្អំដល់រូបលោក ដោយមិនបានពាក់ព័ន្ធនឹងការស្លាប់របស់លោក ហុក ឡង់ឌី ឡើយ។
លោកមានប្រសាសន៍ថា៖ «ដូច្នេះ ការចោទប្រកាន់នេះត្រូវចាត់ទុកថាជាការបរិហារកេរ្តិ៍លោក ហ៊ុន សែន ដែលភាគីជនជាប់ចោទ សម រង្ស៊ី មិនបានបដិសេធនោះទេ មានន័យថា នេះជាការប្រើពាក្យបរិហារកេរ្តិ៍លោក ហ៊ុន សែន។ ចំណុចនេះ គេបានបញ្ជាក់នៅក្នុងកន្លែងហ្នឹង។ លោកឯងថាឈ្នះម៉េច? នៅពេលដែលគេបានបញ្ជាក់ លោកឯងអត់បានបដិសេធ។ ដូច្នេះ ការនិយាយចោទប្រកាន់នេះត្រូវបានចាត់ទុកបរិហារកេរ្តិ៍លោក ហ៊ុន សែន ហើយដែលភាគីជនជាប់ចោទមិនបានបដិសេធនោះទេ។ នេះជាចំណុចទី១ នៃជោគជ័យនៃការស្វែងរកយុត្តិធម៌នៃភាពស្អាតស្អំ ដែលខ្ញុំហៅថា ខ្ញុំតាមវាយដល់ផ្ទះ ដើម្បីស្វែងរកយុត្តិធម៌និងភាពស្អាតស្អំ»។
លោក ហ៊ុន សែន បន្តថា ទោះបីជាតុលាការបារាំងសម្រេចឱ្យលោក សម រង្ស៊ី រួចផុតពីបទចោទប្រកាន់ និងបដិសេធចំពោះការទាមទារសំណងរបស់លោកក្ដី ប៉ុន្តែលោកមិនប្ដឹងឧទ្ធរណ៍ទេ ព្រោះអ្វីដែលលោកចង់បាននោះ គឺភាពស្អាតស្អំរបស់លោកតែប៉ុណ្ណោះ។
លោកថា៖ «សម្រេចឱ្យលោក សម រង្ស៊ី រួចផុតពីបទចោទ អាហ្នឹងទី១។ ទី២ ទទួលស្គាល់លោក ហ៊ុន សែន ជាដើមបណ្ដឹងរដ្ឋប្បវេណី។ ទី៣ បដិសេធការទាមទាររបស់លោក ហ៊ុន សែន ជាដើមបណ្ដឹងរដ្ឋប្បវេណី ដោយសារលោក សម រង្ស៊ី ត្រូវបានរួចផុតពីបទចោទប្រកាន់ ព្រោះគេដាក់នៅពីខាងលើ អាខាងក្រោមទារមិនបានអា១អឺរ៉ូហ្នឹងទៀត។ ទី៤ ច្រានចោលការទាមទារសំណងរបស់លោក សម រង្ស៊ី ចំពោះរាល់ការចំណាយទាំងអស់ ព្រោះអាម្សៀរហ្នឹងទាមទារថា បើវាឈ្នះក្ដី វាឱ្យខ្ញុំចេញការចំណាយទាំងអស់ទៅមេធាវីរបស់វា។ ខ្ញុំអរគុណការថ្លឹងថ្លែងរបស់តុលាការបារាំង»។
ចំណែក លោក សម រង្ស៊ី វិញ ក៏បានសរសេរនៅលើហ្វេសប៊ុករបស់លោកកាលពីយប់ថ្ងៃទី១០ ខែតុលានេះ ដោយបកស្រាយថា តុលាការបារាំងបានឱ្យលោកឈ្នះក្ដីលើលោក ហ៊ុន សែន ដោយការសម្រេចលើកលែងការចោទប្រកាន់លើរូបលោក។
លោកបន្តថា តាមរយៈសាលក្រមតុលាការបារាំងប្រកាស បានចាត់ទុកថា លោកគ្មានទោសកំហុសនោះទេ ហើយការលើកឡើងរបស់លោក វាជាការតស៊ូមតិ។ លោក សម រង្ស៊ី ចាត់ទុកការប្រកាសសាលក្រមរបស់តុលាការបារាំងថា មិនមែនគ្រាន់តែជាជ័យជម្នះផ្ទាល់ខ្លួនមួយនោះទេ តែជាការនាំមកនូវសេចក្តីសង្ឃឹមដល់អ្នកការពារសេរីភាពនិងយុត្តិធម៌ នៅប្រទេសកម្ពុជា និងប្រទេសដទៃទៀត។
លោកថា៖ «អតិថិជនរបស់យើងបានទទួលសេចក្ដីសម្រេចលើកលែងការចោទប្រកាន់ពីតុលាការទីក្រុងប៉ារីស ថ្ងៃនេះ ដោយក្ដីរំភើបក្រៃលែង។ តាំងពីជាង២០ឆ្នាំមកហើយ សម រង្ស៊ី លាតត្រដាងនិងថ្កោលទោសបទឧក្រិដ្ឋប្រព្រឹត្តដោយរដ្ឋអំណាចនៅប្រទេសកម្ពុជាសព្វថ្ងៃ ហើយគាត់តស៊ូ ដើម្បីលើកតម្កើងលទ្ធិប្រជាធិបតេយ្យ»។
ស្ថាបនិកគណបក្សសង្រ្គោះជាតិរូបនេះ បន្តសរសេរលើទំព័រហ្វេសប៊ុករបស់ខ្លួននៅថ្ងៃទី១១ ខែតុលា ថាទាក់ទងពាក្យបណ្ដឹងលោក ឌី វិជ្ជា ដែលជាកូនប្រុសរបស់លោក ហុក ឡង់ឌី ដែលបានប្ដឹងលោកពីបទបរិហារកេរ្តិ៍ដែរនោះ តុលាការបារាំងសម្រេចលើកលែងការចោទប្រកាន់មកលើលោក សម រង្ស៊ី។ ការច្រានចោលបណ្តឹងរបស់លោក ឌី វិជ្ជា នេះ លោក សម រង្ស៊ី អះអាងថា ដោយសារតុលាការបារាំងរកឃើញថា អ្វីដែលលោកនិយាយនោះ គ្រាន់តែលើកឡើងពីគំនិតក្នុងចិត្តរបស់លោក ឌី វិជ្ជា តែប៉ុណ្ណោះ មិនមែនពីទង្វើជាក់ស្តែងណាមួយឡើយ។
សាស្ត្រាចារ្យផ្នែកវិទ្យាសាស្ត្រនយោបាយ លោក ឯម សុវណ្ណរ៉ា មានប្រសាសន៍ថា ការប្ដឹងផ្ដល់គ្នាទៅដល់តុលាការបារាំងនេះ វាបានបង្ហាញឱ្យឃើញថា តុលាការនៅកម្ពុជាមិនអាចផ្ដល់យុត្តិធម៌ឱ្យប្រជាពលរដ្ឋខ្លួនបាន ជាពិសេសអ្នកនយោបាយគណបក្សប្រឆាំង។ ជាមួយគ្នានេះ លោកថា ការសម្រេចរបស់តុលាការបារាំងនេះ ក៏បានឆ្លុះបញ្ចាំងពីប្រព័ន្ធយុត្តិធម៌នៅកម្ពុជាផងដែរ។
លោកថា៖ «ប្រព័ន្ធតុលាការនៅកម្ពុជាពិបាកធ្វើឱ្យប្រជាពលរដ្ឋកម្ពុជាទទួលបាន បាននាំគ្នារត់ទៅក្រៅប្រទេស ជាពិសេសលោក សម រង្ស៊ី គាត់មិនអាចចូលប្រទេសបានផង។ អ៊ីចឹងប្រជាពលរដ្ឋកម្ពុជាពុំមានលទ្ធភាពទៅរកយុត្តិធម៌នៅក្រៅប្រទេសបានទេ។ ចំណែកនៅក្នុងប្រទេសជាទិដ្ឋភាពមួយ ហើយនៅប្រទសលោកសេរីមានកម្រិតជីវភាពជឿនលឿន បើសិនជាលោក សម រង្ស៊ី គេពិន័យ១អឺរ៉ូ! អ៊ីចឹងហើយនៅកម្ពុជា ឃើញឧទាហរណ៍ករណីក្ដីលោក សុន ឆ័យ សងសុទ្ធតែ៧៥ម៉ឺនដុល្លារអីហ្នឹង វាច្រើនហួសហេតុនឹងបរិមាណនៃចំណូលជាប្រចាំថ្ងៃទៅទៀត។ អាហ្នឹងជាករណីមួយឆ្លុះបញ្ចាំងឱ្យតុលាការកម្ពុជាគួរមើលពីសិទ្ធិសេរីភាពក្នុងការបញ្ចេញមតិរបស់ពលរដ្ឋកម្ពុជាទៅដល់ណាហើយ»។
សាស្ត្រាចារ្យផ្នែកវិទ្យាសាស្ត្រនយោបាយរូបនេះ យល់ថា សេចក្ដីសម្រេចរបស់តុលាការប្រទេសបារាំងបានផ្ដល់ភាពទុកចិត្តដល់មេដឹកនាំនយោបាយទាំងពីរ ដោយមិនឱ្យភាគីខាងណាឈ្នះឬចាញ់ឡើយ។
លោកថា៖ «កាលណាប្រជាពលរដ្ឋកម្ពុជាគ្នាឯង ឈ្លោះគ្នា ប្ដឹងគ្នា វាពាក់ព័ន្ធនឹងភាពមិនល្អ ភាពស្អុយគគ្រក់របស់កម្ពុជាត្រូវបាននិយាយជាសាធារណៈនៅកញ្ចក់ទូរទស្សន៍ និងបណ្ដាញផ្សព្វផ្សាយនានា។ អ៊ីចឹងវាបង្ហាញថា កម្ពុជាយើងកំពុងប្រឈមការបែកបាក់ផុយស្រួយ។ [អ្នកទទួលបានផលប្រយោជន៍ជាអ្នកណា? ] អ្នកនយោបាយទទួលបានផលប្រយោជន៍ និងប្រទេសជិតខាង»។
កាលពីខែសីហា ឆ្នាំ២០១៩ លោកនាយករដ្ឋមន្រ្តី ហ៊ុន សែន និងកូនប្រសារបស់លោក ដែលត្រូវជាកូនប្រុសបង្កើតរបស់លោក ហុក ឡង់ឌី គឺលោក ឌី វិជ្ជា បានដាក់បណ្ដឹងទៅតុលាការថ្នាក់ទាប ប្រទេសបារាំង ដោយប្ដឹងលោក សម រង្ស៊ី ពីបទ«បរិហារកេរ្តិ៍»។ ការប្តឹងនោះ ក្រោយពីអ្នកនយោបាយបក្សប្រឆាំងចាស់វស្សារូបនេះបានបង្ហោះសារនៅលើបណ្តាញសង្គមហ្វេសប៊ុករបស់លោកកាលពីដើមខែមិថុនា ឆ្នាំ២០១៩ ដោយចោទលោក ហ៊ុន សែន ថាបានដាក់គ្រាប់បែកដៃសម្លាប់លោក ហុក ឡង់ឌី កាលពីឆ្នាំ២០០៨។ ប៉ុន្តែរដ្ឋាភិបាលធ្លាប់អះអាងថា ការស្លាប់របស់អតីតអគ្គស្នងការនគរបាលជាតិពេលនោះ ជាការស្លាប់ដោយរន្ទះបាញ់ បង្កឡើងដោយគ្រោះធម្មជាតិ៕
រក្សាសិទ្វិគ្រប់យ៉ាងដោយ ស៊ីស៊ីអាយអឹម
សូមបញ្ជាក់ថា គ្មានផ្នែកណាមួយនៃអត្ថបទ រូបភាព សំឡេង និងវីដេអូទាំងនេះ អាចត្រូវបានផលិតឡើងវិញក្នុងការបោះពុម្ពផ្សាយ ផ្សព្វផ្សាយ ការសរសេរឡើងវិញ ឬ ការចែកចាយឡើងវិញ ដោយគ្មានការអនុញ្ញាតជាលាយលក្ខណ៍អក្សរឡើយ។
ស៊ីស៊ីអាយអឹម មិនទទួលខុសត្រូវចំពោះការលួចចម្លងនិងចុះផ្សាយបន្តណាមួយ ដែលខុស នាំឲ្យយល់ខុស បន្លំ ក្លែងបន្លំ តាមគ្រប់ទម្រង់និងគ្រប់មធ្យោបាយ។ ជនប្រព្រឹត្តិ និងអ្នកផ្សំគំនិត ត្រូវទទួលខុសត្រូវចំពោះមុខច្បាប់កម្ពុជា និងច្បាប់នានាដែលពាក់ព័ន្ធ។