ទំនាក់ទំនងអន្តរជាតិ ព័ត៌មានជាតិ
កញ្ញា ប៉ា សុខេង | ១៤ តុលា ២០២២ | ម៉ោង ១១:៤២
VOD

លោក ស ខេង ឧបនាយករដ្ឋមន្រ្តី រដ្ឋមន្រ្តីក្រសួងមហាផ្ទៃ ទទួលជួបលោក Pablo Kang ឯកអគ្គរដ្ឋទូតអូស្ត្រាលីប្រចាំនៅកម្ពុជា នៅវិមានរដ្ឋសភា ថ្ងៃទី១៣ ខែតុលា ឆ្នាំ២០២២។ (ហ្វេសប៊ុកលោក ស ខេង)

ឯកអគ្គរាជទូតអូស្ត្រាលីប្រចាំនៅកម្ពុជា អះអាងថា លោកបានលើកយកបញ្ហាមួយចំនួននៅកម្ពុជា ដូចជា បញ្ហាជួញដូរមនុស្ស គ្រឿង​ញៀន ការ​លាងលុយកខ្វក់ វិវាទការងារ​នៅក្រុមហ៊ុន​ណាហ្គាវើលដ៍ ការបោះ​ឆ្នោតឆ្នាំ២០២៣ រួមទាំងសំណុំរឿងលោក​ កឹម សុខា និងលោក សុន ឆ័យ ជាដើម ទៅ​​ជជែក​ជាមួយ​រដ្ឋមន្ត្រីក្រសួង​​មហា​ផ្ទៃ លោក ស ខេង។

ការអះអាងនេះធ្វើឡើងតាមរយៈការបង្ហោះសារ​នៅលើបណ្ដាញទំនាក់ទំនងសង្គម​ធ្វីតទ័រ (Twitter) ផ្លូវ​ការ​របស់​ឯកអគ្គរាជទូតអូស្ត្រាលីប្រចាំនៅកម្ពុជា លោក Pablo Kang កាលពីថ្ងៃទី១៣ ខែតុលា ម្សិល​មិញ។

តាមរយៈសារនោះ លោក Pablo Kang​ លើកឡើងថា លោកបានជួបជាមួយឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃកម្ពុជា លោក​ ស ខេង នៅថ្ងៃទី១៣ ខែតុលា ម្សិលមិញ ដោយក្នុងនោះ លោក​បានលើកនូវចំណុចមួយចំនួន ដូចជា បញ្ហា​ជួញដូរ​មនុស្ស​តាមអ៊ីនធឺណិត បញ្ហាគ្រឿងញៀន អន្តោប្រវេសន៍ និងការលាងលុយកខ្វក់ ជាដើម។

លោក Pablo Kang បន្ត​ថា៖ «យើងក៏បានលើកឡើងពីវិវាទការងារណាហ្គាវើលដ៍ ព្រមទាំងការទាមទារចង់ឃើញការបោះឆ្នោតតំណាងរាស្ត្រនៅឆ្នាំ២០២៣ ប្រព្រឹត្តឡើងដោយសេរី និងយុត្តិធម៌ រួមទាំងសំណុំ​​រឿងលោក​ កឹម សុខា ហើយនឹងលោក សុន ឆ័យ ផងដែរ»។

ចំណែកនៅលើទំព័រហ្វេស​ប៊ុករបស់​លោក ស ខេង វិញ ​ក៏បាន​លើកឡើងពីលទ្ធផលនៃជំនួបពិភាក្សាការងារ​ជាមួយឯកអគ្គរាជទូតអូស្ត្រាលី កាលពីថ្ងៃម្សិលមិញនេះ​ផង​ដែរ ដោយថា ភាគីទាំងពីរបាន​ពិភាក្សា​លើ​កិច្ចការសំខាន់ៗមួយចំនួន ដូចជា ការប្រយុទ្ធប្រឆាំងការជួញដូរមនុស្ស បញ្ហាគ្រឿងញៀន និង​ឧក្រិដ្ឋកម្ម​ឆ្លងដែន ជាដើម។

ប្រភពដដែល​បន្តថា ក្នុងជំនួបនោះ លោក ស ខេង បានថ្លែងអំណរគុណដល់អូស្ត្រាលី ដែលបានជួយគាំទ្រដល់ការបណ្ដុះបណ្ដាលលើកកម្ពស់សមត្ថភាពរបស់កងកម្លាំងអនុវត្តច្បាប់របស់កម្ពុជា ក្នុង​នោះ លោក​ឯកភាពថា ការងារប្រយុទ្ធប្រឆាំងអំពើជួញដូរមនុស្ស គឺពិតជាកិច្ចការដែលទាមទារឱ្យមានការសហការជិតស្និទ្ធជាមួយបណ្ដាប្រទេសពាក់ព័ន្ធ ទាំងក្នុងតំបន់ និងសកលលោក។

លោក ស ខេង បន្តថា៖ «ផ្អែកលើបទពិសោធកន្លងមក ប្រទេសសាម៉ីដែលមានពលរដ្ឋរងគ្រោះ ក៏មាន​កាតព្វកិច្ចក្នុងការប្រយុទ្ធប្រឆាំង និងបង្ក្រាបក្រុមឧក្រិដ្ឋជនក្នុងប្រទេសខ្លួនដែរ ធ្វើយ៉ាងណាទប់ស្កាត់​ប្រភព​នាំឬជួញដូរ​មនុស្ស​ឆ្លង​ដែន​នេះ ខណៈកម្ពុជានឹងបន្តខិតខំស្រាវជ្រាវ បង្ការទប់ស្កាត់ និងបង្ក្រាប​ឧក្រិដ្ឋជនដែលប្រព្រឹត្តអំពើនេះនៅកម្ពុជា»។

លោកបញ្ជាក់ទៀត​ថា៖ «ក្រៅពីការងារនេះ បញ្ហាគ្រឿងញៀនក៏ជាបញ្ហាមួយស្មុគស្មាញ ដែលរាជរដ្ឋាភិបាលកម្ពុជាកំពុងយកចិត្តទុកដាក់ដែរ។ ជាក់ស្ដែង ចុងក្រោយនេះ មានកំណើននៃការបង្ក្រាប និងរឹបអូសបាននូវសារធាតុផ្សំជាគ្រឿងញៀន និងគ្រឿងញៀនច្រើន»។

រដ្ឋមន្ត្រីក្រសួងមហាផ្ទៃរូបនេះ ចង់ឃើញភាគីអូស្ត្រាលីបន្តជួយគាំទ្រគ្នាទៅវិញទៅមក ក្នុងការផ្ដល់កិច្ចសហការប្រយុទ្ធប្រឆាំងនឹងបទល្មើសគ្រឿងញៀនដែលមាននិន្នាការកើនឡើងនេះ។

តែយ៉ាងណា ក្នុង​ទំព័រហ្វេសប៊ុកផ្លូវការរបស់លោក ស ខេង មិនបានបញ្ជាក់ពីការជជែករវាងភាគីទាំងពីរលើបញ្ហា​វិវាទ​ការ​ងារ​នៅក្រុមហ៊ុន​​ណាហ្គាវើលដ៍ ការបោះឆ្នោតជាតិ​ឆ្នាំ២០២៣ រួមទាំងសំណុំរឿងលោក​ កឹម សុខា និងលោក សុន ឆ័យ នោះទេ៕

• កឹម សុខា, ក្រសួងមហាផ្ទៃ, គ្រឿងញៀន, ឆបោកអនឡាញ, ជួញដូរមនុស្ស, ណាហ្គាវើលដ៍, បទឧក្រិដ្ឋជួញដូរមនុស្ស, បោះឆ្នោតថ្នាក់ជាតិ, ស ខេង, សារធាតុញៀន, ស្ថានទូតអូស្ត្រាលីប្រចាំកម្ពុជា, អូស្ត្រាលី

សូមបញ្ជាក់ថា គ្មានផ្នែកណាមួយនៃអត្ថបទ រូបភាព សំឡេង និងវីដេអូទាំងនេះ អាចត្រូវបានផលិតឡើងវិញក្នុងការបោះពុម្ពផ្សាយ ផ្សព្វផ្សាយ ការសរសេរឡើងវិញ ឬ ការចែកចាយឡើងវិញ ដោយគ្មានការអនុញ្ញាតជាលាយលក្ខណ៍អក្សរឡើយ។
ស៊ីស៊ីអាយអឹម មិនទទួលខុសត្រូវចំពោះការលួចចម្លងនិងចុះផ្សាយបន្តណាមួយ ដែលខុស នាំឲ្យយល់ខុស បន្លំ ក្លែងបន្លំ តាមគ្រប់ទម្រង់និងគ្រប់មធ្យោបាយ។ ជនប្រព្រឹត្តិ និងអ្នកផ្សំគំនិត ត្រូវទទួលខុសត្រូវចំពោះមុខច្បាប់កម្ពុជា និងច្បាប់នានាដែលពាក់ព័ន្ធ។