កម្ពុជា
03/08/2024 – 13:17
ដោយ៖ ម៉ុន ចាន់
RFI

ធនាគារជាតិនៃកម្ពុជា បានចេញនូវវិធានការ២ចំណុ​ច ដើម្បីជួយសម្រួលក្នុងការចាយវាយក្រដាសប្រាក់ដុល្លារចាស់ៗ ឬទក់ ដល់ប្រជាពលរដ្ឋ និងភ្ញៀវទេចរណ៍បរទេសនៅក្នុងប្រទេសកម្ពុជា ។ នៅក្នុង​សេចក្តី​ប្រកាសនៅថ្ងៃទី២​ខែសីហា​ឆ្នាំ​២០២៤ ធនាគារជាតិ បានតម្រូវឱ្យគ្រ​ប់គ្រឹះស្ថានធនាគារនិងហិរញ្ញវត្ថុ ​រួមទាំងអាជីវករដូប្រាក់នៅទូទាំងប្រទេស មិនត្រូវគិតថ្លៃកម្រៃសេវាបន្ថែម លើក្រដាសប្រាក់ដុល្លារដែល រហែក ទក់ ឬចាស់ពីអតិថិជនឡើយ។ការចេញសេចក្តីសម្រេចយ៉ាងដូច្នេះ គឺបន្ទាប់ពីនាយករដ្ឋមន្ត្រី លោក ហ៊ុន ម៉ាណែត ប្រកាសអនុញ្ញាតឱ្យការដូរប្រាក់ដុល្លារចាស់ ឬទក់ មិនត្រូវកាត់ទឹក ត្រូវអនុវត្តន៍នៅទូទាំងប្រទេស។

ធនាគារជាតិ អនុញ្ញាតឱ្យប្រើប្រាស់ប្រាក់ដុល្លារចាស់ឬប្រឡាក់នៅទូទាំងប្រទេស

យ៉ាងណាក៏ដោយ ធនាគារជាតិបានបញ្ជាក់ថា ធនាគារជាតិនៃកម្ពុជា ពុំមែនជាអាជ្ញាធរបោះពុម្ភក្រដាសប្រាក់ដុល្លារទេ និងពុំមានសិទ្ធក្នុងការកាត់​ ដុត ក្រដាសប្រាក់ដុល្លារចាស់ៗ ​​ដើម្បីជំនួសក្រដាសប្រាក់ថ្មី ដូចប្រាក់រៀលនោះទេ។ ពោលគឺធនាគារជាតិ ត្រូវចំណាយថវិកាផ្ទាល់​ ទាំងការផ្ទេរលុយដុល្លារចាស់ទៅធនាគារអាមេរិក និងការបញ្ជួនលុយដុល្លារថ្មីមកកម្ពុជាវិញ ។ ​ត្រង់ន័យនេះ​ធនាគារជាតិ​ លើកទឹកចិត្តដល់ប្រជាពលរដ្ឋទាំងអស់​ឱ្យចូលរួមប្រើប្រាស់ប្រាក់រៀលខ្មែរឱ្យកាន់តែច្រើន ដើម្បីជាការរួមអភិវឌ្ឃដល់សេដ្ឋកិច្ចជាតិ។

លោក ឧកញ៉ា លឹម ហេង អនុប្រធានសភាពាណិជកម្មកម្ពុជាបានសារទរ​ចំពោះវិធានការរបស់ធនាគារជាតិ ប៉ុន្តែទន្ទឹមគ្នានេះ លោកស្នើរាជរដ្ឋាភិបាលគួរមានវិធានការរឹតត្បិតបន្ថែម លើការនាំចូលប្រាក់ដុល្លារពីប្រទេសជិតខាង។ លោកលើកឡើងបែបនេះ ដោយលោកបារម្ភថា តាមរយៈការដូរប្រាក់ដុល្លារ ដែល ទក់ ឬរហែក មិនកាត់ទឹកនេះ អាចជាឱកាសហូរចូលសាច់ប្រាក់មិនស្របច្បាប់ពីប្រទេសជិតខាងមកកម្ពុជា​ ហើយនឹងប៉ះពាល់ដល់ប្រាក់រៀលជាមិនខាន។

គួរបញ្ជាក់ថា ធនាគារជាតិ កាលពីថ្ងៃទី ២១​ខែកក្កដា ឆ្នាំ២០២៤ បានចេញសេចក្តីសម្រេចម្តងហើយ ដោយតម្រូវឱ្យគ្រប់ធនាគារតែនៅខេត្តសៀមរាម​មួយប៉ុណ្ណោះ អាចទទួលយកប្រាក់ដុល្លារអាមេរិកចាស់ ប្រឡាក់ ឬរហែក ដោយមិនត្រូវយកកម្រៃសេវាបន្ថែមពីអតិថិជន។ ចំណែក ក្រដាសប្រាក់ដុល្លារ ចាស់ខ្លាំង ដែលមិនអាចធ្វើចរាចរនៅលើទីផ្សារ ត្រូវបានធនាគារជាតិតម្រូវឱ្យធនាគារពាណិជ្ជក្នុងខេត្តសៀមរាបទាំងអស់ បញ្ចូនទៅដូរយកក្រដាសប្រាក់ថ្មីនៅសាខាធនាគារជាតិក្នុងខេត្តសៀមរាប៕