កម្ពុជា
18/08/2024 – 09:58
ដោយ៖ ឡាក់ ច័ន្ទតារា
RFI
នៅថ្ងៃទី១៨ ខែសីហា ឆ្នាំ២០២៤នេះ ក្នុងទីក្រុងភ្នំពេញ មិនមានបាតុកម្មណាមួយកើតឡើងដូចការគ្រោងទុក ដើម្បីទាមទារឲ្យរដ្ឋាភិបាលកម្ពុជាដកខ្លួនចេញពីគម្រោងអភិវឌ្ឍន៍តំបន់ត្រីកោណកម្ពុជា ឡាវ និងវៀតណាមនោះទេ។ តែទោះជាយ៉ាងណា បាតុកម្មនៅក្រៅប្រទេស ពិសេសនៅសហរដ្ឋអាមេរិកនៅតែកើតមានដូចការគ្រោងទុកដដែល ដោយមានការចូលរួមពី លោក សម រង្ស៊ី ដោយផ្ទាល់។
ទោះគ្មានបាតុកម្មនៅទីក្រុងភ្នំពេញ តែនៅសហរដ្ឋអាមេរិកមានបាតុកម្មប្រឆាំងគម្រោង CLV-DTA
បើទោះបីជានៅទីក្រុងភ្នំពេញ នាថ្ងៃទី១៨ ខែ សីហានេះ មិនមានបាតុកម្មណាមួយកើតឡើងក៏ដោយ តែគេសង្កេតឃើញថា កងកម្លាំងប្រដាប់អាវុធបានចេញដើរល្បាតត្រួតពិនិត្យនៅតាមទីតាំងសំខាន់ៗនៃច្រកចេញចូលរាជធានីភ្នំពេញតាំងពីព្រឹកព្រលឹម ខណៈដែលស្ថានភាពធ្វើដំណើររបស់ពលរដ្ឋ មានសភាពស្ងប់ស្ងាត់ជាងធម្មតា។
មួយថ្ងៃមុនគម្រោងបាតុកម្មប្រឆាំង CLV-DTA មកដល់ លោក ហៃ វណ្ណា ដែលជាតំណាងបាតុករខ្មែរប្រចាំប្រទេសជប៉ុន បានចេញសារសំឡេងមួយដោយប្រកាសរំសាយ និងលើកពេលនៃការធ្វើបាតុកម្ម។ មូលហេតុដែលធ្វើឱ្យតំណាងបាតុករខ្មែរនៅជប៉ុនរូបនេះ ប្រកាសរំសាយ ត្រូវបាន លោក ហៃ វណ្ណា បញ្ជាក់ថា ដោយសារតែ ប្អូនប្រុសបង្កើតរបស់ លោក គឺ លោក ហៃ វណ្ណនិត បានក្បត់លោក និងលាតត្រដាងពីផែនការនៃការធ្វើបាតុកម្មនេះ។
ទោះជាបែបនេះក្ដី លោក ហៃ វណ្ណា បានចេញសេចក្តីថ្លែងការណ៍មួយនៅថ្ងៃ១៧ សីហា ថា លោកគាំទ្រឱ្យពលរដ្ឋខ្មែរក្រោកឈរធ្វើបាតុកម្មដោយអហិង្សា ដើម្បីឱ្យរដ្ឋាភិបាលដោះស្រាយនូវអ្វីដែលលោកចាត់ទុកថា ជាការចង់បានរបស់មហាជននោះគឺការដកកម្ពុជាចេញពីតំបន់អភិវឌ្ឍន៍ត្រីកោណ CLV។ បន្ថែមពីនេះ លោក ហៃ វណ្ណា បានបដិសេធចំពោះការចោទប្រកាន់ពីសំណាក់រដ្ឋាភិបាលកម្ពុជាដែលថាលោកជាមេក្លោងក្នុងការបញ្ជាឱ្យមានបាតុកម្មហិង្សានៅប្រទេសកម្ពុជា។
ទោះជានៅទីក្រុងភ្នំពេញមិនមានបាតុកម្មប្រឆាំងដូចការគ្រោងទុក តែនៅសហរដ្ឋអាមេរិក នាថ្ងៃទី១៧ សីហានៅទីក្រុង Lowell រដ្ឋ Massachudetts មានពលរដ្ឋខ្មែរខ្លះរស់នៅក្នុងតំបន់នោះ និងខ្លះមកពីប្រទេសកាណាដាផង បានប្រមូលផ្ដុំគ្នាធ្វើបាតុកម្មប្រឆាំងនឹងគម្រោង CLV-DTA នេះ។ ជាបាតុកម្មដែលមានការចូលរួមផ្ទាល់ពី លោក សម រង្ស៊ី ប្រធានស្ដីទី អតីតគណបក្សសង្គ្រោះជាតិ។
លោក សម រង្ស៊ី បានថ្លែងលើកទឹកចិត្តឲ្យអ្នកតវ៉ាទាំងនោះ បន្តការទាមទារឱ្យរដ្ឋាភិបាលកម្ពុជាដកខ្លួនចេញពីគម្រោងអភិវឌ្ឍន៍ ជាមួយឡាវ និង វៀតណាម នៅក្រោមហេតុផល បារម្ភពីការបាត់ខេត្តទាំង៤របស់កម្ពុជានៅក្នុងការគ្រប់គ្រងរបស់វៀតណាមនាពេលខាងមុខ។
ក្នុងការបារម្ភដូចគ្នានេះ កាលពីថ្ងៃអាទិត្យសប្តាហ៍មុន ពលរដ្ឋខ្មែរនៅប្រទេសជប៉ុន អូស្ត្រាលី កាណាដា បារាំង និងកូរ៉េខាងត្បូង រាប់ពាន់នាក់ ក៏បានបាតុកម្មនៅពេលដំណាលគ្នា ដោយទាមទារឲ្យរដ្ឋាភិបាលកម្ពុជាដកខ្លួនចេញពីគម្រោងអភិវឌ្ឍន៍ CLV នេះ៕