កម្ពុជា
15/12/2024 – 09:31
ដោយ៖ អ៊ឹង ប៊ុនថន
RFI
អ្នកនាំពាក្យក្រសួងសេដ្ឋកិច្ច នៅថ្ងៃទី១៤ ខែធ្នូ ឆ្នាំ ២០២៤ បានចេញមកច្រានចោលព័ត៌មានដែលថា «ចិនឈប់ផ្តល់កម្ចីឲ្យកម្ពុជា» ។ ចំពោះក្រសួងសេដ្ឋកិច្ច នេះជាការលើកឡើងដែលបង្កឲ្យមានការយល់ច្រឡំ។ ការច្រានចោលរបស់មន្ត្រីរដ្ឋាភិបាល ធ្វើឡើងក្រោយពី លោក សម រង្ស៊ី បានចំអកឲ្យ លោក ហ៊ុន សែន ថា «បរាជ័យនយោបាយសេដ្ឋកិច្ច» និងថា ចិនលែងឲ្យកម្ពុជាខ្ចីលុយទៀតហើយ។
កម្ពុជាច្រានចោលការលើកឡើងដែលថា «ចិនឈប់ផ្តល់កម្ចីឲ្យកម្ពុជា»
ក្នុងវីដេអូឃ្លីបរយៈពេល២នាទីផ្សព្វផ្សាយ តាមហ្វេសប៊ុករបស់អ្នកនាំពាក្យក្រសួងសេដ្ឋកិច្ច លោក មាស សុខសេនសាន បានចាត់ទុកការផ្សព្វផ្សាយព័ត៌មានដែលថា ចិនឈប់ផ្តល់កម្ចីឲ្យកម្ពុជា ថាជាការបង្កើតឲ្យមានការយល់ច្រឡំ ព្រោះថា បច្ចុប្បន្ននេះ ភាគីទាំងពីរ ចិន-កម្ពុជា កំពុងបន្តមានទំនាក់ទំនងគ្នាស្អិតរមួត និងគ្រោងចុះកិច្ចព្រមព្រៀងហិរញ្ញប្បទានឥតសំណង និងហិរញ្ញប្បទានសម្បទានផ្សេងទៀត។
បើតាមអ្នកនាំពាក្យក្រសួងសេដ្ឋកិច្ច ភាគីកម្ពុជា និងចិន កំពុងសិក្សាពីផលប៉ះពាល់នៃគម្រោងទាំងនោះយ៉ាងលំអិតដើម្បីឈានទៅចុះកិច្ចព្រមព្រៀងជាក់លាក់នៅពេលខាងមុខ។
កាលពីថ្ងៃទី១៣ ខែធ្នូ ឆ្នាំ ២០២៤ លោក សម រង្ស៊ី បានសរសេរលើហ្វេសប៊ុករបស់លោកថា «ទន្សាយក៏រួច ត្រីរ៉ស់ក៏រួច សុខចិត្តចោល EBA ព្រោះអាងខ្ចីលុយពីចិន តែឥឡូវអត់ទាំងពីរ ចិនលែងឲ្យខ្ចី»។
មេដឹកនាំបក្សប្រឆាំងរូបនេះ ថែមទាំងបានចូលទៅបញ្ចេញមតិនៅខាងក្រោមសារដែលលោកបានបង្ហោះនោះទៀតថា «នយោបាយសេដ្ឋកិច្ចរបស់ លោក ហ៊ុន សែន ទៅអែបស្និទ្ធចិន បានទាល់ច្រក និងបរាជ័យ ហើយវាជាកំហុសដ៏ធំបំផុតរបស់ លោក ហ៊ុន សែន ដែលកំពុងបរាជ័យនយោបាយសេដ្ឋកិច្ច»។
នៅក្នុងដំណើរទស្សនកិច្ចទៅកាន់ប្រទេសចិន ពីថ្ងៃទី២ដល់ថ្ងៃទី៤ ខែធ្នូ ឆ្នាំ២០២៤ ប្រធានព្រឹទ្ធសភាកម្ពុជា លោក ហ៊ុន សែន បានស្នើឲ្យ ប្រធានាធិបតីចិន លោក ស៊ី ជីនពីងបន្តផ្តល់ជំនួយឥតសំណង កម្ចីឥណទាន ជំរុញការវិនិយោគមកម្ពុជាបន្ថែមទៀត។ បើតាម លោក ហ៊ុន សែន ជំនួយរបស់ចិនមិនត្រឹមតែចូលរួមដល់ការអភិវឌ្ឍសេដកិច្ច-សង្គមប៉ុណ្ណោះទេ ប៉ុន្តែថែមទាំងបានជួយពង្រឹងឯករាជ្យភាពនយោបាយរបស់កម្ពុជាផងដែរ។ ចិនមិនបានឆ្លើយតបចំៗទៅនឹងរឿងផ្តល់ជំនួយទេ តែចិនបញ្ជាក់ថា ខ្លួននឹងបន្តគាំទ្រកម្ពុជា ដើម្បីកសាងសហគមន៍ជោគវាសនារួមចិន និងកម្ពុជា។
យោងតាមទិន្នន័យស្តីពីព្រឹត្តិបត្របំណុលសាធារណៈកម្ពុជា ដែលចេញផ្សាយនៅថ្ងៃទី១០ ខែធ្នូ ឆ្នាំ២០២៤ បំណុលដែលកម្ពុជាជំពាក់ចិនបានថយចុះចំនួន ២% គិតត្រឹមត្រីមាសទី៣ ឆ្នាំ២០២៤។ ការថយចុះនៃបំណុលចិនពេលនេះត្រូវបានទីភ្នាក់ងារព័ត៌មាន Reuters និងអ្នកនយោបាយប្រឆាំងរបស់កម្ពុជា ដាក់សេចក្តីសន្និដ្ឋានថា ចិនបានផ្អាកផ្តល់កម្ចីឱ្យកម្ពុជាដោយសារតែចិនបរាជ័យក្នុងគម្រោងហេដ្ឋារចនាសម្ព័ន្ធរបស់ខ្លួននៅតាមបណ្តាប្រទេសក្នុងតំបន់អាស៊ីអាគ្នេយ៍ជាបន្តបន្ទាប់ និងថា ចិនហាក់មិនគាំទ្ររបបដឹកនាំកម្ពុជាសព្វថ្ងៃ៕