ដោយ បុគ្គលិកអាស៊ីសេរី
2025.03.28
RFA
ទំព័រហ្វេសប៊ុក ផ្លូវការរបស់កងទ័ពជើងគោកនៃកងយោធពលខេមរភូមិន្ទចុះផ្សាយថា កងទ័ពទាំងពីរ ក៏បានពិភាក្សាលើបញ្ហាមួយចំនួនទៀត ដូចជា ទប់ស្កាត់ការលួចឆ្លងដែនខុសច្បាប់ និងបទល្មើសអនឡាញជាដើម ហើយបានបង្ហាញឆន្ទៈបន្តរក្សាទំនាក់ទំនង និងការទុកចិត្តគ្នាឱ្យកាន់តែរឹងមាំ។
ជំនួបនេះបានធ្វើឡើង ដោយសារកាលពីថ្ងៃទី២០ ខែមីនា ទាហានខ្មែរប្រចាំនៅចក្រព្រំដែនបឹងត្រកួន ក្នុងខេត្តបន្ទាយមានជ័យ ជាប់ខេត្តស្រះកែវ ប្រទេសថៃ បានព្រមានពីការផ្ទុះអាវុធ ក្នុងហេតុការណ៍ប៉ះទង្គិចពាក្យសម្ដីគ្នាមួយ ដោយសារទាហានថៃមួយក្រុម ដើរចូលមកខ្សែបន្ទាត់ព្រំដែនឆៅៗ ដោយមិនបានជូនដំណឹងជាមុន។ ប៉ុន្តែទាហានថៃចោទទាហានខ្មែរថា បានចូលមកបោះជំរំក្នុងតំបន់ស រីឯទាហានខ្មែរវិញបកស្រាយថា តំបន់នោះ ស្ថិតក្រោមការគ្រប់គ្រងរបស់ខ្លួនតាំងពីដើម ហើយថា ទាហានថៃ ក៏បានសង់រោងដែកមួយនៅក្បែរនោះដែរ៕