កម្ពុជា
កម្ពុជា-ថៃ
14/06/2025 – 11:13
ដោយ៖ អ៊ឹង ប៊ុនថន
RFI
ដូចការគ្រោងទុក កិច្ចប្រជុំគណៈកម្មការចម្រុះខណ្ឌសីមា និងបោះបង្គោលព្រំដែនគោក (JBC) ដែលធ្វើឡើងនៅរាជធានីភ្នំពេញគឺធ្វើឡើងនៅថ្ងៃសៅរ៍ទី១៤ខែមិថុនានេះ។ ភាគីកម្ពុជា ដឹកនាំដោយ លោក ឡាំ ជា រដ្ឋមន្រ្តីទទួលបន្ទុករដ្ឋលេខាធិការដ្ឋានកិច្ចការព្រំដែន និងភាគីថៃ ដឹកនាំដោយ លោក Prasas Prasasvinitchai ប្រធានគណៈកម្មការព្រំដែនថៃ។ តែអ្នកសង្កេតការណ៍ កត់សំគាល់ថា ថៃហាក់ដូចជាមិនឲ្យតម្លៃកិច្ចប្រជុំ JBC ដែលកម្ពុជាធ្វើជាម្ចាស់ផ្ទះនៅពេលនេះ។
អ្នកសង្កេតការណ៍៖ ថៃហាក់មិនឲ្យតម្លៃកិច្ចប្រជុំ JBC ដែលកម្ពុជាធ្វើជាម្ចាស់ផ្ទះ
នៅមុនកិច្ចប្រជុំផ្លូវការចាប់ផ្តើមនៅម៉ោងជិត១២ថ្ងៃត្រង់ ភាគីទាំងពីរបានបើកកិច្ចប្រជុំចង្អៀតមួយ នៅសណ្ឋាគារ សូហ្វីតែល ភ្នំពេញ។ យោងតាមពេលវេលាដែលបានគ្រោងទុក គឺកិច្ចប្រជុំត្រូវបានចាប់ផ្តើមនៅម៉ោង១០ព្រឹក តែវាបានអូសបន្លាយពេលវេលា នោះក៏ព្រោះតែ គណៈប្រតិភូថៃមួយចំនួនមានការយឺតយ៉ាវក្នុងការធ្វើដំណើរមកចូលរួមប្រជុំ។នេះបើតាមក្រុមអ្នកសង្កេតការណ៍។
លោកបណ្ឌិត គិន ភា ប្រធានវិទ្យាស្ថានទំនាក់ទំនងអន្តរជាតិនៃរាជបណ្ឌិតសភាកម្ពុជា បានគូសបញ្ជាក់លើហ្វេសប៊ុកថា «គេ[ថៃ]មានបំណងបំផ្លាញការចរចាផង និងធ្វើឱ្យយើង[កម្ពុជា]សាំចិត្តផង ហើយគេចោទកម្ពុជាថា គ្មានឆន្ទៈចរចា។ លោកកត់សំគាល់ផងដែរ«ឥរិយាបទការទូត[របស់ថៃ]ខ្វះការគោរពចំពោះដៃគូ [គឺ]បញ្ជូនមនុស្សថ្នាក់ទាបឲ្យមកចរចា [ហើយ]អ្នកមកចរចាមិនគោរពម៉ោងណាត់»។ បើតាម លោកបណ្ឌិត គិន ភា កិច្ចប្រជុំ JBC នេះនឹងមិនមានលទ្ធផលអ្វីជាដុំកំភួននោះទេ។
សូមបញ្ជាក់ថា កិច្ចប្រជុំគណៈកម្មការចម្រុះខណ្ឌសីមា និងបោះបង្គោលព្រំដែនគោក (JBC)នៅថ្ងៃទី១៤ ខែមិថុនានេះ គឺធ្វើឡើងចំខួបទី២៥ឆ្នាំ នៃការចុះអនុស្សរណៈយោគយល់គ្នារវាងកម្ពុជា-ថៃ ឆ្នាំ២០០០ (MoU2000)។
ជាការកត់សំគាល់ នៅប៉ុន្មានម៉ោងមុនកិច្ចប្រជុំ JBC នៅថ្ងៃទី១៤ មិថុនានេះ មេបញ្ជាការយោធភូមិភាគទី២របស់ថៃ ឧត្តមសេនីយ៍ Boonsin Padklang បានប្រកាសថា «តំបន់ជម្លោះនៅព្រំដែនគឺជាដីរបស់ថៃ ហើយថាប្រសិនបើកម្ពុជាចង់បានគឺមានតែប្រយុទ្ធគ្នាទៅមិនចាំបាច់ប្តឹងទៅតុលាការយុត្តិធម៌អន្តរជាតិ ICJ នោះទេ។ នេះបើតាមសារព័ត៌មានKhaosod English។
អតីតប្រធានអង្គភាពអ្នកនាំពាក្យរដ្ឋាភិបាលកម្ពុជា លោក ផៃ ស៊ីផាន បានប្រតិកម្មដោយចាត់ទុកសំដីរបស់មេទ័ពថៃម្នាក់នេះថាជាមនុស្សព្រៃផ្សៃដែលគួរត្រូវប្រឈមនឹងតុលាការឧក្រិដ្ឋកម្មអន្តរជាតិ (ICC) ដោយសារតែឧត្តមសេនីយ៍ថៃរូបនេះ ប្រើពាក្យសម្ដីញុះញង់នូវអំពើហិង្សា ព្រៃផ្សៃ ដែលមិនមែនជាភាពចាំបាច់ នៃកិច្ចការយោធា ហើយថានេះគឺជាធាតុផ្សំ នៃការប្រឆាំង នឹងច្បាប់ព្រហ្មទណ្ឌអន្តរជាតិ៕