ថ្ងៃ ព្រហស្បតិ៍ 03 ឧសភា 2012
ដោយ លី ម៉េងហួរ
RFI
អង្គការការពារអ្នកកាសែត បានវាយតម្លៃថា រយៈពេលមួយឆ្នាំ គិតចាប់ពីថ្ងៃ៣ឧសភា ឆ្នាំ២០១១ ដល់ថ្ងៃទី៣ឧសភា ឆ្នាំ២០១២ ស្ថានភាពរបស់អ្នកកាសែតកម្ពុជា បានល្អប្រសើរជាងឆ្នាំមុន។ ក្នុងនោះ បណ្តឹង និងការគំរាមកំហែងលើអ្នកកាសែតបានថយចុះ។ រីឯការបាញ់សម្លាប់អ្នកកាសែតពុំកើតមានទៀតឡើយ។ យ៉ាងណាក៏ដោយ អ្នកកាសែតកម្ពុជា ក្នុងឆ្នាំកន្លងមក នៅតែទទួលរងការគំរាមកំហែង។
អ្នកសារព័ត៌មាន ខ្មែរ ក្នុងពេល បំពេញ ការងារ (RFI/Channa Siv)
របាយការណ៍ពីស្ថានភាពអ្នកកាសែតកម្ពុជា ត្រូវបានផ្សព្វផ្សាយ នៅថ្ងៃនេះ ចំថ្ងៃប្រារព្ធទិវាសេរីភាពសារព័ត៌មានពិភពលោក ថ្ងៃ៣ឧសភា។ ពិធីជួបជុំរវាងអង្គការអ្នកកាសែត និងសេចក្តីថ្លែងការណ៍ ត្រូវបានធ្វើឡើង នៅព្រឹកមិញ ក្នុងទីក្រុងភ្នំពេញ ដោយមានវត្តមានរបស់លោក ខៀវ កាញារីទ្ធ រដ្ឋមន្ត្រីក្រសួងព័ត៌មាន និងតំណាងអង្គការយូណេស្កូ ជាដើម។
លោក ខៀវ កាញារីទ្ធ បានផ្តាំផ្ញើដល់អ្នកកាសែត ឲ្យប្រយ័ត្នប្រយែង ចំពោះការអនុវត្តវិជ្ជាជីវៈ ជាអ្នកសារព័ត៌មាន ប្រកបដោយវិជ្ជាជីវៈ និងការទទួលខុសត្រូវ។ ម្យ៉ាងទៀត ការជួបជុំនៅថ្ងៃប្រារព្ធទិវាសារព័ត៌មានពិភពលោក ថ្ងៃ៣ឧសភានេះ ដើម្បីធ្វើយ៉ាងណា លើកតម្កើងវិជ្ជាជីវៈសារព័ត៌មាន ឲ្យមានការទទួលខុសត្រូវ។
របាយការណ៍របស់ក្លឹបអ្នកកាសែតកម្ពុជា ដែលបានផ្សព្វផ្សាយ នៅថ្ងៃនេះ ក៏បានបង្ហាញថា ក្នុងរយៈពេលមួយឆ្នាំ គិតចាប់ពីថ្ងៃ៣ឧសភា ឆ្នាំ២០១១ មកដល់ថ្ងៃ៣ឧសភា ២០១២ មានអ្នកកាសែតកម្ពុជា ៧ នាក់ ត្រូវបានចាប់ខ្លួន ខណៈដែលឆ្នាំមុន មាន ១០ នាក់។ ដោយឡែក បណ្តឹងប្រឆាំងអ្នកកាសែត នៅកម្ពុជា មានចំនួន ៩ ករណី កាលពីឆ្នាំ២០១០ តែនៅឆ្នាំ២០១១ បានថយចុះ មកនៅត្រឹម ៤ ករណី។ ការប្តឹងផ្តល់នោះ ចោទប្រកាន់ពីបទផ្សាយព័ត៌មានមិនពិត និងបទបរិហារកេរ្តិ៍ តាមរយៈការចុះផ្សាយអត្ថបទព័ត៌មាន។ អ្នកកាសែត ដែលរងការប្តឹងផ្តល់ ស្ថិតនៅក្នុងកាសែត ដែលគាំទ្ររដ្ឋាភិបាល រួមមាន៖ កាសែតរស្មីកម្ពុជា កម្ពុជាថ្មី និងកាសែតកោះសន្តិភាព ជាដើម។ រីឯកាសែតប្រឆាំង មិនរងការប្តឹងផ្តល់ទេ។
ចំណែកករណីគំរាមកំហែង កាលពីឆ្នាំ២០១០ មាន ៧ ករណី តែនៅឆ្នាំ២០១១ បានថយមកនៅត្រឹម ៥ ករណី។
ក្លឹបអ្នកកាសែតកម្ពុជា របស់លោក ប៉ែន សមិទ្ធិ បានបង្ហាញថា ការវាយតម្លៃជារួម អំពីស្ថានភាពសារព័ត៌មាន ប្រសើរជាងឆ្នាំមុន បើទោះបីជាកាលពីសប្តាហ៍មុន ការឃុំខ្លួនអ្នកកាសែត ដឺឃែមបូឌា ដេលី (The Cambodia Daily) ជាស្ត្រីចំនួនពីរនាក់ ជាបណ្តោះអាសន្ន បានឆ្លុះបញ្ចាំងអំពីការពិតមួយ ដែលថា ការតស៊ូដើម្បីសេរីភាព គឺជាដំណើរផ្លូវមួយវែងឆ្ងាយទៀត ដែលយើងទាំងអស់គ្នាត្រូវតែសាមគ្គីគ្នា ពុះពារគ្រប់ឧបសគ្គ នៅក្នុងបេសកកម្មជាអ្នកផ្តល់ព័ត៌មានជូនសាធារណជន។
ក៏ប៉ុន្តែក្លឹបអ្នកកាសែតកម្ពុជា លើកឡើងថា មិនដូចនៅក្នុងពិភពលោកទាំងមូល ដែលមានអ្នកកាសែតចំនួន ៦២ នាក់ ត្រូវបានសម្លាប់នោះទេ នៅកម្ពុជា ក្នុងឆ្នាំកន្លងមក មិនមានអ្នកកាសែតកម្ពុជាណាម្នាក់ ត្រូវបានសម្លាប់ឡើយ។
ការឃាត់ខ្លួនស្ត្រីអ្នកកាសែត ២ រូប នៅកាសែត The Cambodia Daily នៅក្នុងព្រឹត្តិការណ៍បាញ់សម្លាប់លោក ឈុត វុទ្ធី ប្រធានអង្គការការពារធនធានធម្មជាតិ និងប៉េអឹម លោក អ៊ិត រតនា នៅខេត្តកោះកុង កាលពីថ្ងៃទី២៦ ខែមេសា ឆ្នាំ២០១២ ក៏ត្រូវបានក្លឹបអ្នកកាសែត រាប់ចូលក្នុងរបាយការណ៍ផងដែរ។
អង្គការអ្នកកាសែតគ្មានព្រំដែន ក៏បានបង្ហាញក្នុងរបាយការណ៍របស់ខ្លួនថា ក្នុងចំណោម ១៧៩ប្រទេស កម្ពុជាឈរនៅចំណាត់ថ្នាក់ទី ១១៧ ផ្នែកសេរីភាពសារព័ត៌មាន។ បើប្រៀបធៀបនឹងបណ្តាប្រទេសអាស៊ានទាំង ១០ កម្ពុជាមានចំណាត់ថ្នាក់សេរីភាពសារព័ត៌មានល្អប្រសើរជាងគេ៕
—————————————-
