ថ្ងៃទី 5 ឧសភា 2012
ដោយ: ឌីណា
CEN
ជញ្ជាំង ផ្ទះ ធ្លុះធ្លាយ ដែល ម្ចាស់ អះអាងថា ត្រូវ អ្នកជិតខាង កាប់ និង យក ទ្រព្យ របស់ អស់ សន្ធឹកសន្ធាប់
កំពត: អំពើលួចទ្រព្យសម្បត្ដិអ្នកដទៃ តាមរយៈការប្រើហិង្សា ដោយកាប់ជញ្ជាំងផ្ទះ និងទ្វារ រួចសម្រុកចូលយកអស់របស់មានតម្លៃសន្ធឹកសន្ធាប់ ហើយលទ្ធផល បានត្រឹមជនរងគ្រោះខកចិត្ដ ត្បិតសមត្ថកិច្ច គ្មានចំណាត់ការ ទោះមកឃើញភស្ដុតាងផ្ទាល់ តាមរយៈការទំនាក់ទំនងសុំអន្ដរាគមន៍ក្ដី។
ករណីនោះផ្ដើមឡើង ដោយបុរសម្នាក់ ស្ថិតក្នុងភាពស្រវឹង សម្រុកចូលរើកកាយយកលុយ និងមាសអ្នកជិតខាងកាលពីយប់ថ្ងៃទី៤ ខែឧសភា ឆ្នាំ២០១២ នៅភូមិបង់បក់ ឃុំភ្នំប្រាសាទ ស្រុកកំពង់ត្រាច ខេត្តកំពត។
បុរសឈ្មោះ កែវ ហ៊ាន អាយុ ៣៦ឆ្នាំ កសិកររស់នៅភូមិឃុំកើតហេតុខាងលើ បានរៀបរាប់ថា កាលពីវេលាម៉ោងប្រហែល ៧ និង ៣០ នាទីយប់ ថ្ងៃទី៤ ខែឧសភា ឆ្នាំ២០១២ ឈ្មោះ តេង សុបញ្ញា ភេទប្រុស អាយុប្រហែល ៤០ឆ្នាំ ដែលមានលំនៅស្ថានក្បែរផ្ទះរបស់គាត់ កំពុងមានភាពស្រវឹងផងនោះ បានយកកាំបិតមកកាប់ជញ្ជាំង និងទ្វារធ្វើឱ្យគាត់ និងប្រពន្ធកូនភ័យរន្ធត់ នាំគ្នារត់ចេញ តាមទ្វារក្រោយយ៉ាងប្រញាប់។
បានឱកាសល្អ បុរសរូបនោះ រើកកាយសម្លៀកបំពាក់ និងរបស់របរក្នុងផ្ទះតាមអំពើចិត្ដ។ លុះឮគាត់ទូរស័ព្ទហៅ និងមុនពេលសមត្ថកិច្ច មកដល់ជននោះ ក៏គេចខ្លួនចេញវិញបាត់។
អ្វីដែលគាត់សោកស្ដាយនោះ ពេលគាត់ពិនិត្យមើលដឹងថា បាត់លុយអស់ជិតពីរលានរៀល និងមាសប្រាំហ៊ុន ហើយប៉ូលិសមូលដ្ឋានមកដល់ ប្រាប់រឿងនេះ បែរជាមិនជឿ ព្រមទាំងមិនបានតាមឃាត់ជនសង្ស័យ ដែលមានផ្ទះជិតគ្នាបង្កើយ ទោះជាឃើញជញ្ជាំង និងទ្វារផ្ទះគាត់ធ្លុះធ្លាយយ៉ាងណាក្ដី។
ជនរងគ្រោះអះអាងទៀតថា ពេលប៉ូលិសមូលដ្ឋានវិលត្រឡប់ទៅវិញ បុរសដដែលនេះ បានត្រលប់មកសាជាថ្មី បម្រុងដុតផ្ទះគាត់ចោល ប៉ុន្ដែបានអ្នកជិតខាង ជួយឃាត់ និងសម្លុតគំរាម ទើបជននោះ គេចខ្លួនបាត់។
កែវ ហ៊ាន បញ្ជាក់ថា រឿងដែលគាត់អាក់អន់ចិត្ដទៀតនោះ គឺប៉ូលិសមូលដ្ឋាន មិនបានជឿនូវពាក្យសម្ដីគាត់ ដែលថា បាត់លុយអស់មួយលានកៅសិបម៉ឺនរៀល និងមាសប្រាំហ៊ុន ដែលគាត់ខំសន្សំជាយូរមកហើយនោះទេ ដោយនិយាយថា គាត់មានផ្ទះតូចតាច ធ្លុះធ្លាយ មិនអាចមានលុយបាត់ច្រើនដល់ម្លឹងទេ។
ជុំវិញរឿងរ៉ាវខាងលើគេហទំព័រ CEN មិនអាចទំនាក់ទំនងសុំការបកស្រាយពីលោក ដុស ពិសិដ្ឋ នាយប៉ុស្ដិ៍ប៉ូលិសរដ្ឋបាល ឃុំភ្នំប្រាសាទបានទេ តែលោក រ័ត្ន សំណាង អធិការរងស្រុកកំពង់ត្រាច ទទួលបន្ទុកផែនយុត្ដិធម៌ បានបញ្ជាក់តាមទូរស័ព្ទ នារសៀលថ្ងៃទី៥ ខែឧសភា ឆ្នាំ២០១២ ថា ដោយសារក្រោយកើតហេតុ ជនសង្ស័យបានគេចខ្លួនបាត់ ដូច្នេះហើយទើបប៉ូលិសប៉ុសិ៍្ដរដ្ឋបាលធ្វើជារបាយការណ៍ ដាក់ជូនមកអធិការដ្ឋានដើម្បីចាត់ការតាមនីតិវិធី។ លោកអធិការបន្ដថា មិនមែនសមត្ថកិច្ច មិនគិតគូនោះទេ រាល់ហេតុការណ៍ ដែលកើតឡើងចាំបាច់ ត្រូវតែចាត់ការ៕
ត្រូវដងត្រូវផ្លែគ្នាទេដឹង? បើមិនអីចឹងទេប្រហែលជាសមត្ថកិច្ចខ្ជិលធ្វើការហើយ។
i will take the time to look how he explain next time about that