ថ្ងៃទី 6 ឧសភា 2012
ដោយ: បាយ័ន
CEN
សៀមរាប: សាមណេរ និងសីលវតីប្រមាណជិត ៤០នាក់ ក្នុងចំណោម ១.០០០ នាក់ ដែលបានបំបួសកាលពីថ្ងៃទី១ ខែឧសភា ត្រៀមសម្រាប់ចូលរួមក្នុងពិធីបុណ្យពិសាខបូជា បានដួលសន្លប់នៅវត្តអង្គរខាងត្បូង កាលពីរាត្រីទី៥ ខែឧសភា។ ករណីនេះត្រូវបាន
អះអាងផ្សេងគ្នាថា មកពីមនុស្សច្រើន អាកាសធាតុហប់ខ្លាំង ទើបបណ្តាលឲ្យដួលសន្លប់យ៉ាងនេះ ឯមួយទៀតថា ក្រោយពេលស្តាប់លោកទេសនា ធ្លាក់រឿងលន្លង់លន្លោច ទើបបណ្តាលឲ្យមានអារម្មណ៍រន្ធត់ ក៏ដួលសន្លប់យ៉ាងនេះ។
ទាក់ទិននឹងការដួលសន្លប់ខាងលើ នៅព្រឹកថ្ងៃទី៦ ខែឧសភា ប្រភពនិយាយថា នៅក្នុងរាត្រីថ្ងៃទី៥ឧសភា ដែលជាថ្ងៃបុណ្យពិសាខបូជា មានការសូត្រទេសនា ដោយមានសាមណេរ សីលវតី ១.០០០ នាក់ យាយជីតាជី និងពុទ្ធបរិស័ទជុំវិញវត្តរាប់ពាន់នាក់ទៀតចូលរួម។ ដោយសារទីធ្លាវត្តមិនធំទូលាយ មនុស្សម្នាចូលរួមច្រើន ហើយអាកាសធាតុមានសភាពមិនសូវល្អ (ហប់) ទើបមនុស្សមួយចំនួន ដែលមានសុខភាពខ្សោយដួលសន្លប់យ៉ាងនេះ។
ចំណែកព្រះតេជគុណ ព្រះនាម សម្បត្តិ លីយឿត សមុហ៍អនុគណក្រុងសៀមរាប បានឲ្យដឹងថា ការដួលសន្លប់នេះមិនមានរឿងអ្វីធំទេ គឺកើតឡើងក្រោយពេលលោកសូត្រទេសនា ធ្លាក់ដល់រឿងដឹងគុណមាតាបិតា កាលពីនៅពពោះរហូតប្រសូត្រចេញមក។
ព្រះតេជគុណបញ្ជាក់ថា ក្រោយពេលលោកសូត្រដល់ចំណុចគុណមាតាបិតា ស្តាប់ទៅហាក់មានអារម្មណ៍លន្លង់លន្លោច ក៏ស្រាប់តែសាមណេរ និងសីលវតីមួយចំនួនដួលសន្លប់យ៉ាងនេះ តែមិនមានអ្វីធំនោះទេ ក្រោយពេលគ្រូពេទ្យធ្វើចលនា ក៏ដឹងខ្លួនវិញជាធម្មតា។ ចំណែក ៧នាក់ ដែលមានសភាពធ្ងន់ ដឹកទៅមន្ទីរពេទ្យ ក៏បានចេញមកវិញអស់ទាំងយប់ផងដែរ។
សូមរម្លឹកថា កាលពីថ្ងៃទី១ ខែឧសភាកន្លងទៅ នៅវត្តអង្គរខាងត្បូង មានការបំបួសសាមណេរ និងសីលវតីចំនួន ១.០០០ នាក់ សម្រាប់ចូលរួមក្នុងពិធីបុណ្យពិសាខបូជា នៅថ្ងៃទី៥ឧសភា៕ K