Thursday, 31 May 2012
ឃុត សុភចរិយា
ភ្នំពេញ ប៉ុស្តិ៍
លំនៅ ដ្ឋាន ពល រដ្ឋ នៅ សហគមន៍ បឹង ឈូក ខណ្ឌឫស្សីកែវ ដែល ប្រឈម នឹង ការ ឲ្យ រុះ រើ ចេញ តាំងពី ឆ្នាំ ២០១០ ។ (រូបថត ហេង ជីវ័ន)
ភ្នំពេញៈ ពលរដ្ឋក្នុងសហគមន៍ភូមិបឹងឈូក ក្នុងសង្កាត់គីឡូម៉ែត្រលេខ៦ ខណ្ឌឫស្សីកែវ បានឲ្យដឹងកាលពីម្សិលមិញថា តុលាការរាជធានីភ្នំពេញ បានចេញដីកាកោះឲ្យសមាជិកក្នុងសហគមន៍នេះចំនួន៦នាក់ ចូលទៅបំភ្លឺនៅព្រឹកថ្ងៃព្រហស្បតិ៍នេះ តាមបណ្ដឹងចោទប្រកាន់ពីបទប្រើអំពើហិង្សាលើអ្នកកាន់កាប់អចលនវត្ថុដោយសុចរិត ដែលប្ដឹងដោយឈ្មោះ ទា ធឿន។
ពលរដ្ឋម្នាក់ក្នុងចំណោម៦នាក់ដែលមានឈ្មោះក្នុងដីកាកោះ អ្នកស្រី ខៀវ ចិន្តា អាយុ៤២ ឆ្នាំ បានប្រាប់ភ្នំពេញ ប៉ុស្តិ៍កាលពីម្សិលមិញថា កាលពីពីរបីថ្ងៃមុននេះមន្ត្រីនគរបាលនៅមណ្ឌលបឹងឈូកម្នាក់ បាននាំយកដីកាកោះរបស់លោក វ៉ា សក្ដា ជាតំណាងអយ្យការអមសាលាដំបូងរាជធានីភ្នំពេញ ទៅឲ្យពួកគាត់ ដែលក្នុងដីកាកោះនោះបានតម្រូវឲ្យពួកគាត់ចូលឆ្លើយបំភ្លឺនៅតុលាការ នៅថ្ងៃទី៣១ ខែឧសភានេះ តាមបណ្ដឹងរបស់ឈ្មោះ ទា ធឿន ដែលបានចោទប្រកាន់ពួកគាត់ពីបទប្រើហិង្សាទៅលើអ្នកម្ចាស់អចលនវត្ថុដោយសុចរិត។
អ្នកស្រីថ្លែងថា៖ «ជនដែលមានឈ្មោះ ទា ធឿន [នេះ] ខ្ញុំមិនដែលស្គាល់មុខឬក៏ធ្លាប់បានឮឈ្មោះទេពីមុនមក ហើយខ្ញុំក៏មិនដែលមានជម្លោះវាយតប់ជាមួយនរណាដែរ»។
អ្នកស្រីបញ្ជាក់ថា ៖ «ទោះជាបែបណា ខ្ញុំនឹងចូលទៅបំភ្លឺនៅតុលាការតាមពេលដែលបានកំណត់ ហើយខ្ញុំមានជំនឿថា តុលាការនឹងផ្ដល់ភាពយុត្តិធម៌សម្រាប់យើងខ្ញុំ»។
កាលពីដើមខែមីនាឆ្នាំ២០០៩ ពលរដ្ឋក្នុងសហគមន៍នេះមានការភ្ញាក់ផ្អើលជាខ្លាំង បន្ទាប់ពីអាជ្ញាធរសង្កាត់ទួលសង្កែ ខណ្ឌឫស្សីកែវបានចេញសេចក្ដីជូនដំណឹងមួយ តម្រូវឲ្យពួកគាត់ជាង៣០គ្រួសារ រុះរើលំនៅដ្ឋានដែលកំពុងរស់ចេញពីតំបន់នេះ ដោយចោទថា ពួកគាត់សង់ផ្ទះរស់នៅដោយអនាធិបតេយ្យលើដីរបស់រដ្ឋ ខណៈពួកគាត់មួយចំនួនបានមករស់នៅក្នុង[តំបន់នោះ]សង្កាត់គីឡូម៉ែត្រ លេខ៦ តាំងពីឆ្នាំ ១៩៩១ ហើយខ្លះ មកនៅក្នុងឆ្នាំ ១៩៩៦។
ក្នុងគ្រានោះពួកគាត់បានធ្វើការតវ៉ាជាខ្លាំងនៅមុខសាលាខណ្ឌ ឫស្សីកែវ ដើម្បីទាមទារឲ្យអាជ្ញាធរខណ្ឌជួយដោះស្រាយ ប៉ុន្តែ នៅដើមឆ្នាំ២០១០ លោក ឃ្លាំង ហួត អភិបាលខណ្ឌឫស្សីកែវ បានចេញសេចក្ដីជូនដំណឹងថ្មីមួយបញ្ជាក់ថាដីទំហំជាងមួយហិកតា ដែលអ្នកភូមិទាំងនោះកំពុងរស់នៅជាកម្មសិទ្ធិរបស់ឈ្មោះ ឡៅ តុងងី និងបានតម្រូវឲ្យពួកគាត់រុះរើផ្ទះចេញពីតំបន់នោះដោយស្ម័គ្រចិត្ត។ មិនតែប៉ុណ្ណោះនៅបានព្រមានថា នឹងប្រើវិធានការរដ្ឋបាលថែមទៀត បើពួកគាត់មិនព្រមអនុវត្តតាមសេចក្តីជូនដំណឹងនេះ។
នៅថ្ងៃទី១២ ខែឧសភា ឆ្នាំ២០១០ អាជ្ញាធរខណ្ឌឫស្សីកែវ និងអាជ្ញាធរសង្កាត់ទួលសង្កែ បានដឹកនាំកម្លាំងប្រមាណជិត១០០នាក់ ទៅធ្វើការហ៊ុមព័ទ្ធ និងរុះរើលំនៅដ្ឋានប្រជាពលរដ្ឋក្នុងសហគមន៍នេះចំនួន៦គ្រួសារ ។ ប៉ុន្តែវិធានការរុះរើនិងបណ្ដេញពលរដ្ឋរបស់អាជ្ញាធរនេះ បានផ្អាកទៅវិញ បន្ទាប់ពីពលរដ្ឋបាននាំគ្នាដាក់ញត្តិស្នើសុំកិច្ចអន្តរាគមន៍ពី គ្រប់ស្ថាប័នពាក់ព័ន្ធ ដូចជារដ្ឋសភា ព្រឹទ្ធសភា ប្រមុខរាជរដ្ឋាភិបាល និងអង្គការក្រៅរដា្ឋភិបាលនានា។
លោក ឈឹម សុផុន អ្នកនៅតំបន់នេះនិងរងបណ្តឹងម្នាក់ដែរបាននិយាយថា ពួកគាត់រស់នៅក្នុងតំបន់ភូមិបឹងឈូកនោះអស់ជាង២០ឆ្នាំមកហើយ មិនដែលស្គាល់មនុស្សឈ្មោះ «ឡៅ តុងងី ឬក៏ ទា ធឿន» នេះពីមុនមកទេ ហើយក៏មិនដែលប្រើហិង្សាអ្វីទៅលើជននោះដែរ ។
លោកបន្តថា ៖ «ខ្ញុំមិនដឹងថា តើគេមានបំណងអ្វីមកលើប្រជាពលរដ្ឋស្លូតត្រង់នៅក្នុងតំបន់បឹងឈូកនេះទេ?»។
លោក សុខ ឃីម ចៅសង្កាត់គីឡូម៉ែត្រលេខ៦ ក៏បានប្រាប់ភ្នំពេញ ប៉ុស្តិ៍ កាលពីម្សិលមិញដោយទទួលស្គាល់ថា ពលរដ្ឋទាំងនេះរស់នៅក្នុងដែនដីនៃសង្កាត់លោក ខ្លះជាងដប់ម្ភៃឆ្នាំមកហើយ តាំងពីតំបន់នេះនៅជាបឹងមកម្ល៉េះ។
លោក សុខ ឃីម បន្តថា ៖ «ខ្ញុំក៏មិនដឹងដែរថា ឈ្មោះ ឡៅ តុងងី ឬ ទា ធឿន នោះជានរណាដែរ?
ហើយពួកគេបានមករស់នៅក្នុងតំបន់នោះតាំងពីពេលណា មកដែរទេ ហើយក៏មិនដឹងថា ហេតុអ្វីបានជាពួកគេមិនព្រមប្ដឹងអាជ្ញាធរភ្លាមៗ នៅពេលដែលអ្នកភូមិចូលទៅរស់នៅក្នុងតំបន់នោះ»។
កាលពីថ្ងៃពុធម្សិលមិញ ភ្នំពេញ ប៉ុស្តិ៍ មិនអាចទំនាក់ទំនងសុំការពន្យល់ពាក់ព័ន្ធនឹងការប្តឹងប្តល់នេះ ពី ឈ្មោះ ឡៅ តុងងី និង ឈ្មោះ ទា ធឿន ជាដើមបណ្តឹងបានទេ៕
ឭកពួកអានាយទុនអស់ហ្នឹងវាតែអញ្ចឹង! ឆ្ងល់ដែរហេតុអ្វីពេលដែលពួកគាត់មកតាំងទីលំនៅដំបូង ម្តេចបានជាអាជ្ញាធរមិនប្រាប់ថាដីនេះជារបស់អ្នកនេះអ្នកនោះ ដល់ពេលដឺមានហាងឆេងធើឯង រត់ការ ធ្វើឯកសារប្លង់កម្មសិទ្ធិ បង្កើតអំពើពុករលួយ ស៊ីសស៊ូសគ្នា លេងល្បែងបួនសន្លឹកដាក់រាស្ត្រ ហើយថារាស្ត្រសង់លំនៅដ្ឋានក្នុងបឹងខុសច្បាប់ ចុះបើកន្លែងហ្នឹងខុសច្បាប់ ! ហេតុអ្វីបានជាធ្វើប្លង់ កម្មសិទ្ធិអោយឈ្មោះទា ធឿន ឫឈ្មោះ ឡៅ តុងងី ហ្នឹង តើអាហ្នឹងវាយ៉ាងម៉េចវិញ ? បើអាពីរនាក់ ហ្នឹងវាជាម្ចាស់ដីមុខមែនអញ្ចឹងយកវាទៅដាក់គុកទៅ រួមទាំងអាអ្នកចេញឯកសារកម្មសិទ្ធិផង ព្រោះបឹងជាទីសាធារណះ ហេតុអីក៍ចេះតែមកសំឡុតរាស្ត្រស្លូតត្រង់អញ្ចឹង ? តើអ្នកឯងអស់គ្នាហ្នឹងគិតថារាស្ត្រខ្មែរសព្វថ្ងៃមិនដឹងអីមែនទេ? បុព្វបុរសដែលជាម្ចាស់ដីហ្នឹងដាក់ បណ្តាស់សារពួកអាឈ្លានពានអស់ឯងហ្នឹងអោយត្រូវារន្ទះបាញ់ និងស្លាប់តៃហោងជាមិនខាន។
ខំទៅ!….ខំសាងអំពើបាបអោយបានច្រើនទៅ!