ថ្ងៃទី 21 មិថុនា 2012
ដោយ: រតនា
CEN

លោក អ៊ុច បូររិ​ទ្ធ រដ្ឋលេខាធិការ​ក្រសួងការបរទេស និងជាសហប្រធានគណៈកម្មាធិការចម្រុះសហភាពអឺរ៉ុប-កម្ពុជា និងH.E Mr. Pedro Serrano, Director for South and South East Asia

ភ្នំពេញ: ​វិស័យ​សំលៀកបំពាក់ និង​ស្បែកជើង នៅ​ប្រទេស​កម្ពុជា បាន​នាំ​ចូល​ទៅ​កាន់​ទីផ្សារ​នៃ​ប្រទេស​សហភាព​អឺរ៉ុប ដែលមាន ២៧ ប្រទេស គិត​ជា​ទឹកប្រាក់​ប្រមាណ ១.០០០ លាន​អឺរ៉ូ​។ នេះ​ជា​ប្រសាសន៍​របស់​លោក អ៊ុច បូររិ​ទ្ធ រដ្ឋលេខាធិការ​ក្រសួងការបរទេស បាន​លើកឡើង​នៅក្នុង​ពិធី​បើក​កិច្ចប្រជុំ​គណៈកម្មការ​ចម្រុះ សហភាព​អឺរ៉ុប ជាមួយ​កម្ពុជា លើក​ទី​៧ នៅ​ទីស្តីការ​ក្រសួងការបរទេស កាលពី​ព្រឹក​ថ្ងៃទី​២១ ខែមិថុនា ឆ្នាំ​២០១២​។​

​កិច្ចប្រជុំ​គណៈកម្មាធិការ​ចម្រុះ​កម្ពុជា​-​សហភាព ដែល​មាន​អនុ​ក្រុម​ប្រជុំ​តាម​ផ្នែក​និមួយៗ​នោះ បាន​ចាប់ផ្តើម​ដំណើរការ​កិច្ចប្រជុំ ចាប់តាំងពី​ថ្ងៃ​ទី​១៩ ខែមិថុនា ឆ្នាំ​២០១២​។ នៅ​រសៀល​ម៉ោង ៤ រសៀល​ថ្ងៃ​ទី​២១ ខែមិថុនា ឆ្នាំ​២០១២ មន្ត្រី​គណៈកម្មាធិការ​ចម្រុះ​កម្ពុជា និង​សហភាព​អឺរ៉ុប នឹង​ធ្វើ​សន្និសីទកាសែត​រួមគ្នា ស្តីពី លទ្ធផល​នៃ​កិច្ចប្រជុំ​រយៈពេល ៣ ថ្ងៃ​កន្លងមក​។​

​លោក អ៊ុច បូររិ​ទ្ធ បាន​មានប្រសាសន៍ថា កម្ពុជា​បាន​ងើប​ឡើងវិញ ពី​វិបត្ត​សេដ្ឋកិច្ច​សកល ហើយ​នៅ​ឆ្នាំ​២០១០ កម្ពុជា​មាន​កំនើន​សេដ្ឋកិច្ច​ជា​បន្តបន្ទាប់ គឺ​មាន​កំនើន​សេដ្ឋកិច្ច ៦,១​ភាគរយ​។

​លោក​រដ្ឋលេខាធិការ អ៊ុច បូររិ​ទ្ធ បាន​មានប្រសាសន៍​បន្ត​ថា កម្ពុជា កំពុងតែ​រក​ដៃគូ​វិនិយោគ​ម៉ាស៊ីន​កិនស្រូវ ដើម្បី​កម្ពុជា​នាំចេញ​អង្ករ ទៅ​កាន់​ទីផ្សារ​បរទេស ឲ្យ​ពេញ​សមត្ថភាព​។​

​លោក អ៊ុច បូររិ​ទ្ធ បាន​មានប្រសាសន៍​បញ្ជាក់​ថា “​កម្ពុជា​កំពុង​ដើរ​លើ​មាគ៌ា​ប្រជាធិបតេយ្យ និង​គោរព​សិទ្ធិមនុស្ស​ពេញលេញ​។ ចំពោះ​ការបោះឆ្នោត​ជ្រើសតាំង​សមាជិក​ក្រុមប្រឹក្សា​ឃុំ​សង្កាត់ អាណត្តិ​ទី​៣ កាលពី​ថ្ងៃ​ទី​៣ ខែមិថុនា កន្លងមក​នោះ គឺ​មាន​ភាពយុត្តិធម៌​ត្រឹមត្រូវ និង​គ្មាន​អំពើហឹង្សា​កើតឡើង​ទេ​”​។​

លោក អ៊ុច បូររិ​ទ្ធ រដ្ឋលេខាធិការ​ក្រសួងការបរទេស និងជាសហប្រធានគណៈកម្មាធិការចម្រុះសហភាពអឺរ៉ុប-កម្ពុជា

​សូម​រម្លឹកថា កិច្ចប្រជុំ​អនុ​ក្រុម នៃ​គណៈកម្មាធិការ​ចម្រុះ​កម្ពុជា​-​សហភាព​អឺរ៉ុប លើក​ទី​៧ ចាប់ពី​ថ្ងៃ​ទី​១៩​មិថុនា ឆ្នាំ​២០១២ និង​ថ្ងៃ​ទី​២០​មិថុនា ឆ្នាំ​២០១២ ផ្តោត​សំខាន់​លើ​កំណែទម្រង់​រដ្ឋបាល ច្បាប់ តុលាការ អភិបាលកិច្ច សិទ្ធិមនុស្ស ពាណិជ្ជកម្ម និង​ផ្នែក​សហប្រតិបត្តិការ​រវាង​កម្ពុជា និង​សហភាព​អឺរ៉ុប​។​

​កិច្ចប្រជុំ​ដោយ​បិទទ្វារ​រវាង​គណៈកម្មាធិកា​រ​ចម្រុះ​កម្ពុជា និង​សហភាព​អឺរ៉ុប ចាប់ពី​ថ្ងៃ​ទី​១៩ រហូត​ដល់​ថ្ងៃ​ទី​២១ ខែមិថុនា ឆ្នាំ​២០១២ មាន​ការចូលរួម​ពី​មន្ត្រីជាន់ខ្ពស់​តំណាង​សហភាព​អឺរ៉ុប និង​មន្ត្រី​ជាន់​ខ្ពស់​មក​ពី​ក្រសួង ស្ថាប័ន​របស់​រដ្ឋាភិបាល​កម្ពុជា​។

​កិច្ចប្រជុំ​នោះ ត្រូវ​ពិនិត្យ​ឡើងវិញ​លើ​គម្រោង​អភិវឌ្ឍន៍​នានា ដែល​សហភាព​អឺរ៉ុប បាន​ផ្តល់​ជំនួយ ហើយ​មន្ត្រី​រដ្ឋាភិបាល​កម្ពុជា ត្រូវ​លើក​បង្ហាញ​ពី​វឌ្ឍនភាព ដែល​រួមមាន​៖ កំណែទម្រង់​ច្បាប់ ប្រព័ន្ធយុត្តិធម៌ បញ្ហា​សិទ្ធិមនុស្ស និង​កំណែ​ទ្រង់​ដីធ្លី ជាដើម​។​

​របៀបវារៈ​នៃ​កិច្ចប្រជុំ​រយៈពេល ៣ ថ្ងៃ រវាង​គណៈកម្មាធិការ​ចម្រុះ​កម្ពុជា និង​សហភាព​​អឺរ៉ុប លើក​ទី​៧ បង្ហាញថា តំណាង​រដ្ឋាភិបាល​កម្ពុ​ជា និង​តំណាង​សហភាព​អឺរ៉ុប ដែលមាន ២៧ ប្រទេស បាន​លើក​ឡើង​លើ​ប្រធានបទ​សំខាន់និ​មួយៗ ដូចជា កំណែទម្រង់​ច្បាប់ និង​ប្រព័ន្ធ​យុត្តិធម៌ បញ្ហា​តុលាការ​កាត់ទោស​មេ​ខ្មែរក្រហម សេរីភាព​បញ្ចេញមតិ កំណែទម្រង់​ដីធ្លី យន្តការ​ដោះស្រាយ​ជម្លោះ​ដីធ្លី សម្បទាន​ដី​សេដ្ឋកិច្ច កំណែទម្រង់​ការបោះឆ្នោត និង​សេរីភាព​របស់​អង្គការ​សមាគម បញ្ហា​សិទ្ធិមនុស្ស សិទ្ធិ​ស្ត្រី និង​បញ្ហា​ពលករ​ចំណាកស្រុក​។​

​ប្រធានបទ​នីមួយៗ គឺ​ខាង​មន្ត្រី​រដ្ឋាភិបាល​កម្ពុជា មកពី​ក្រសួង​ស្ថាប័ន​ពាក់ព័ន្ធ ត្រូវធ្វើ​បទ​អន្តរាគមន៍ មុន​នឹង​តំណាង​សហភាព​អឺរ៉ុប ផ្តល់នូវ​ចំណាប់អារម្មណ៍ និង​អនុសាសន៍​លើ​ប្រធានបទ​ទាំងនោះ​៕​