21 June 2012
ឈន ណន
ភ្នំពេញ ប៉ុស្តិ៍
កីឡាករហែម ប៊ុនទីងរត់មកដល់ទីមុនគេក្នុងកម្មវិធី ភ្នំពេញពាក់កណ្តាលម៉ារ៉ាតុងអន្តរជាតិលើកទី២ កាលអាទិត្យមុន។
កីឡាករម៉ារ៉ាតុងលំដាប់កំពូលរបស់កម្ពុជា ហែម ប៊ុនទីង ដែលធ្លាប់ដណ្តើមបានមេដាយប្រាក់ និងមេដាយសំរឹទ្ធិ នាការប្រកួតស៊ីហ្គេម និងជាម្ចាស់ជ័យលាភីរាល់ការប្រកួតពាក់កណ្តាលម៉ារ៉ាតុងនៅក្នុងស្រុកនោះ កំពុងតែមានអារម្មណ៍កក់ក្តៅនៅក្នុងអាជីពរបស់ខ្លួន ខណៈរូបគេទើបរកបានម្ចាស់ឧបត្ថម្ភ ដែលបានសន្យាជួយជ្រោមជ្រែង រាល់សកម្មភាពប្រកួតរបស់គេ ទាំងនៅក្នុងស្រុក និងនៅលើឆាកអន្តរជាតិនោះ។
កីឡាករមានដើមកំណើតនៅខេត្តស្ទឹងត្រែង ហែម ប៊ុនទីង បានប្រាប់ភ្នំពេញប៉ុស្តិ៍កាលពីពុធម្សិលមិញថា៖«កាលល្ងាចថ្ងៃអង្គារ ខ្ញុំបានទៅជួបលោកនាយកសាកលវិទ្យាល័យអាស៊ីអឺរ៉ុប ដែលធ្លាប់តែជួយឧបត្ថម្ភដល់ការប្រកួតរបស់ខ្ញុំកន្លងមក ហើយនៅពេលនោះ គាត់បាននិយាយប្រាប់ខ្ញុំថា គាត់នឹងបន្តជួយឧបត្ថម្ភដល់ការហ្វឹកហាត់និងការប្រកួតទាំងនៅក្នុងស្រុកនិងក្រៅស្រុករបស់ខ្ញុំ ដ្បិតអីខ្ញុំជានិស្សិតនិងជាកីឡាករតំណាងក្រុមកីឡាករអត្តពលកម្មផ្សេងទៀត នៅក្នុងសាកលវិទ្យាល័យមួយនេះ ដោយខ្ញុំគ្រាន់តែធ្វើរបាយការណ៍ពីការចំណាយ និងគម្រោងនៃការប្រកួតឲ្យបានច្បាស់លាស់ ដើម្បីយកឲ្យគាត់ពិនិត្យ»។
លោក ពៅ ហុក គ្រូបង្វឹកកីឡាអត្តពលកម្មនៅសាកលវិទ្យាល័យអាស៊ីអឺរ៉ុប និងជាអ្នកជួយជ្រោមជ្រែងនាំ ហែម ប៊ុនទីង ឲ្យទៅជួបនាយកសាកលវិទ្យាល័យអាស៊ីអឺរ៉ុប កាលពីល្ងាចថ្ងៃអង្គារនោះ បានប្រាប់ឲ្យដឹងកាលពីព្រឹកថ្ងៃព្រហសត្បិ៍ម្សិលមិញដែរថា៖«ពិតណាស់អ្វីដែល ប៊ុនទីង បាននិយាយវាជាការពិត ព្រោះខ្ញុំក៏បានចូលរួម និងស្តាប់ពីអ្វីដែលលោកនាយកសាកលវិទ្យាល័យបានមានប្រសាសន៍ក្នុងពេលនោះដែរ»។
ខ្ញុំគាំទ្រ ប៊ុនទីង សូមសំណាងល្អ!!!!
សូមចូលរួមត្រេកអរផង។ ហើយសូមកម្ពុជាមានឆន្ទះក្នុងការជម្រុញលើកទឹកចិត្តកីឡាករផង
Bun Ting, has a bad attitude, I will never support him.