ថ្ងៃទី 6 កក្កដា 2012
ដោយ: បាយ័ន
CEN
កំណាត់ផ្លូវជាច្រើនកន្លែងក្នុងចំណុចក្បាលដំរី ឃុំកំពង់ស្រឡៅ១ និងផ្លូវក្នុងឃុំឆែប១ ត្រូវបានកាត់ផ្ដាច់ ដោយសារលិចទឹកភ្លៀង និងផ្លូវបានដាច់ជាកង់ៗ
ខេត្ដព្រះវិហារ: កំណាត់ផ្លូវជាច្រើនកន្លែង ត្រូវបានកាត់ផ្ដាច់ និងមួយចំនួនទៀតប្រឈមនឹងការដាច់ ដោយសារទឹកភ្លៀងធ្លាក់ជាបន្ដបន្ទាប់ ហើយទឹកនោះហូរកាត់លើផ្លូវយ៉ាងគំហុក នៅចំណុចក្បាលដំរី ក្នុងឃុំកំពង់ស្រឡៅ១ និងឃុំឆែប១ ក្នុងស្រុកជាំក្សាន្ដ ខេត្ដព្រះវិហារ។ ករណីនេះ គឺជាមហន្ដរាយភ្លាមៗ ដែលដែលទាមទារឱ្យមានការជួសជុលផងដែរ បន្ទាប់ពីទឹកស្រកវិញ។
លោកឧត្ដមសេនីយ៍ឯក ខេង សុមេធ អគ្គស្នងការរងនគរបាលជាតិ ទទួលបន្ទុកព្រំដែនទិសទី៤ បានមានប្រសាសន៍នៅថ្ងៃត្រង់ ថ្ងៃទី៦ ខែកក្កដា ឆ្នាំ២០១២ នេះថា រយៈពេលបីថ្ងៃជាប់ៗគ្នា គឺថ្ងៃទី៤ ទី៥ និងទី៦ ខែកក្កដានេះ នៅតំបន់ប៉ែកខាងលើ ជាពិសេសស្រុកឆែប ខេត្ដព្រះវិហារ ដែលជាតំបន់ព្រៃ បានទទួលឥទ្ធិពលភ្លៀងធ្លាក់ជាបន្ដបន្ទាប់។
ករណីភ្លៀងដ៏គំហុកនេះ ត្រូវបានលោកឧត្ដមសេនីយ៍ឯក ខេង សុមេធ និយាយថា ទឹកភ្លៀងបានហូរធ្លាក់ពីប៉ែកខាងលើ ហើយឡើងលិចផ្លូវលំ តាមបណ្ដោយពីចំណុចក្បាលដំរី ក្នុងឃុំកំពង់ស្រឡៅ១ និងនៅតំបន់ឃុំឆែប១ ស្រុកឆែប ខេត្ដព្រះវិហារ យ៉ាងដំណំ ដែលធ្វើឱ្យមានការព្រួយបារម្ភ។
លោក ខេង សុមេធ បានបន្ដថា កំណាត់ផ្លូវនេះត្រូវបានកាត់ផ្ដាច់ទាំងស្រុងរួចទៅហើយ មិនអាចធ្វើដំណើរឆ្លងកាត់បានឡើយ ព្រោះថាទឹកភ្លៀងបានឡើងលិចផ្លូវចំណុចខាងលើ ចាប់តាំងពីថ្ងៃទី៤ រហូតមកដល់ថ្ងៃទី៦ ខែកក្កដានេះ ទឹកមិនទាន់ស្រកនៅឡើយទេ។ ដោយឡែក នៅព្រឹកថ្ងៃទី៦ ខែកក្កដានេះដែរ ភ្លៀងកំពុងតែបន្ដធ្លាក់ នៅតំបន់ដែលមានផ្លូវកំពុងរងគ្រោះនោះទៀតផង។
នៅជំហានដំបូង លោកឧត្ដមសេនីយ៍ឯក អគ្គស្នងការរងនគរបាលជាតិ ទទួលបន្ទុកព្រំដែន មិនបានបញ្ជាក់យ៉ាងណានៅឡើយទេ ដោយលោកគ្រាន់តែប្រាប់ថា មានផ្លូវមួយកន្លែងៗរាប់សិបម៉ែត្រ ត្រូវបានដាច់ជាកង់ៗរួចហើយ និងកម្ពស់ទឹកមានខ្លះត្រឹមចង្កេះ ខ្លះត្រឹមកក៏មានដែរ ដែលទឹកទាំងនោះឡើងលិចផ្លូវតែម្ដង ហើយទឹកបានហូរកាត់យ៉ាងគំហុកថែមទៀតផង។
លោកប៉ាន់ប្រមាណថា ផ្លូវអាចខូចរាប់សិបគីឡូម៉ែត្រ បន្ទាប់ពីទឹកស្រកទៅវិញ។ ចំពោះថាទឹកស្រកនៅពេលណានោះ វាអាស្រ័យទៅលើអាកាសធាតុ ព្រោះថា បើភ្លៀងនៅធ្លាក់ ទឹកបន្ដឡើងលិចបន្ថែមទៀត។ តែបើភ្លៀងមិនបន្ដធ្លាក់ ផ្លូវដែលលិចទាំងប៉ុន្មាន នឹងគោករាក់រយៈពេលពីរទៅបីថ្ងៃក្រោយជាក់ជាមិនខាន ប៉ុន្ដែពេលនេះផ្លូវត្រូវទឹកលិច មិនអាចចរាចរទៅមកដូចមុនបានឡើយ។
គួរបញ្ជាក់ដែរថា នេះជាលើកដំបូងក្នុងរដូវវស្សា ឆ្នាំ២០១២នេះ ដែលផ្លូវលំកសាងជាបន្ដបន្ទាប់ ក្រោមការបញ្ជាផ្ទាល់ពីសម្ដេចនាយករដ្ឋមន្ដ្រី ហ៊ុន សែន តភ្ជាប់ពីតំបន់ប្រាសាទព្រះវិហារ ស្រុកជាំក្សាន្ដ ទៅកាន់តំបន់មុំបី និងឆ្លងកាត់ឃុំកំពង់ស្រឡៅ១-កំពង់ស្រឡៅ២ ក្នុងស្រុកឆែប ខេត្ដព្រះវិហារ ទៅដល់ស្រុកថាឡាបរិវ៉ាត់ ខេត្ដស្ទឹងត្រែង។ កំណាត់ផ្លូវនេះដែរ ត្រូវបានកសាងឡើងដោយកងវិស្វកម្មតេជោហ៊ុនសែនសៀមរាប កាលពីចន្លោះឆ្នាំ២០០៩ មកដល់ឆ្នាំ២០១២នេះ៕ K
Message
That is the disaster of our country because of the coruption the day by day.