ដោយ លាង ដឺលុច
RFI
មន្ត្រីសាលារាជធានីភ្នំពេញបានចុះត្រួតពិនិត្យសំណង់អគារមន្ទីរពេទ្យជោរៃភ្នំពេញ នៅក្នុងខណ្ឌមានជ័យលើផ្លូវជាតិលេខ១ ខណៈដែលការដ្ឋាននេះកំពុងបំពាក់បណ្តាញអគ្គិសនី និងប្រព័ន្ធលូ។ មន្ទីរពេទ្យជោរៃភ្នំពេញដែលជាសាខាមួយនៃមន្ទីរពេទ្យជោរៃវៀតណាម ដ៏ល្បីមួយនោះ គឺជាគម្រោងវិនិយោគរួមរវាងក្រុមហ៊ុនសូគីមិចកម្ពុជា និងក្រុមហ៊ុនរបស់វៀតណាមដែលមានតម្លៃ៤២លានដុល្លារ។
រូបគម្រោងមន្ទីរពេទ្យជោរីវៀតណាម ដែលនឹងត្រូវគេបញ្ចប់ការសាងសង់ក្នុងទីក្រុងភ្នំពេញ នៅចុងឆ្នាំ ២០១៣
© REUTERS
ប្រសិនបើ ដំណើរការសាងសង់គ្មានឧបសគ្គទេនោះ មន្ទីរពេទ្យជោរៃភ្នំពេញនឹងបើកទ្វារបម្រើអតិថិជន នៅចុងឆ្នាំ២០១៣ខាងមុខនេះ។ នេះបើតាមប្រសាសន៍របស់ប្រធានក្រុមហ៊ុនសំណង់មន្ទីរពេទ្យ និងជាអគ្គនាយករងនៃមន្ទីរពេទ្យជោរៃវៀតណាមផងដែរ។
ការអះអាងរបស់តំណាងក្រុមហ៊ុនសាងសង់មន្ទីរពេទ្យជោរៃភ្នំពេញធ្វើឡើង ក្នុងខណៈដែលមន្ត្រីសាលារាជធានីភ្នំពេញបានចុះត្រួតពិនិត្យការសាងសង់កាលពីសប្តាហ៍មុន នេះបើយោងតាមគេហទំព័រសាលារាជធានីភ្នំពេញ។
មន្ទីរពេទ្យជោរៃភ្នំពេញដែលកំពុងត្រូវសាងសង់លើផ្ទៃដី៥ហិចតា នៅក្នុងខណ្ឌមានជ័យតាមបណ្តោយផ្លូវជាតិលេខ១ គឺជាគម្រោងរួមគ្នារវាងក្រុមហ៊ុនសូគីមិច និងក្រុមហ៊ុនវិនិយោគមេឌីខលសៃហ្កនរបស់វៀតណាម ដែលមានតម្លៃ៤២លានដុល្លារ។ ការសាងសង់បានចាប់ផ្តើម កាលពីខែឧសភាឆ្នាំ២០១០។
គម្រោងសំណង់មន្ទីរពេទ្យជោរៃ នៅភ្នំពេញដែលជាផ្លែផ្កានៃទំនាក់ទំនងរវាងវៀតណាម និងកម្ពុជាត្រូវបានគេពន្យល់ថា គឺដើម្បីជួយសម្រួលដល់ប្រជាពលរដ្ឋខ្មែរ ក្នុងការធ្វើដំណើរទៅទទួលការព្យបាលនៅក្នុងប្រទេសវៀតណាម ដែលសព្វថ្ងៃនេះ មានចំនួនច្រើនលើសលុបនោះ។
មន្ទីរពេទ្យនេះនឹងមានអគារចំនួន៣ ដែលពីរ អគារគឺជាអគារព្យាបាលអ្នកជំងឺ និងមួយអគារទៀតគឺជាអគាររដ្ឋបាល។
គេហទំព័រសាលារាជធានីភ្នំពេញបានស្រង់ប្រសាសន៍របស់លោក ង្វៀន ហ័ងណាមអគ្គនាយករងមន្ទីរពេទ្យជោរៃវៀតណាមដែលនិយាយថា ក្នុងជំហ៊ានទីមួយ មន្ទីរពេទ្យនឹងដាក់គ្រែទទួលអ្នកជំងឺចំនួន២០០គ្រែ និងជំហ៊ានទី២នឹងមាន៥០០គ្រែ។ លោកង្វៀន ហ័ងណាមបន្តអះអាងថា មន្ទីរពេទ្យជោរៃភ្នំពេញនឹងត្រូវបំពាក់បរិក្ខាពេទ្យទំនើប ដែលផលិតក្នុងប្រទេសអាល្លឺម៉ង់។
គួររម្លឹកថា ក្នុងពេលកន្លងមក ម្ចាស់គម្រោងមន្ទីរពេទ្យជោរៃភ្នំពេញធ្លាប់បានប្រកាសអោយដឹងថា មន្ទីរពេទ្យនេះនឹងត្រូវជ្រើសរើសបុគ្គលិក ជាវេជ្ជបណ្ឌិតខ្មែរចំនួន១០០នាក់ និងគិលានុបដ្ឋាយិការ១៨០នាក់។ បុគ្គលិកមន្ទីរពេទ្យទាំងនេះ នឹងត្រូវទទួលការបណ្តុះបណ្តាលនៅកម្ពុជាផង និងនៅមន្ទីរពេទ្យជោរៃវៀតណាមផង។
សូមរំលឹកថា ពលរដ្ឋខ្មែរជាច្រើននៅបន្តទៅទទួលការព្យាបាលពីប្រទេសជិតខាង ពិសេសប្រទេសវៀតណាមជារៀងរាល់ថ្ងៃ ហើយគ្រូពេទ្យ កម្ពុជាមួយចំនួនក៏តែងទទួលរងការរិះគន់ពីពលរដ្ឋកម្ពុជាខ្លួនឯង ទាំងផ្នែកសមត្ថភាព និងសីលធម៌៕
——————————————————
គេដាក់ឈ្មោះមន្ទីរពេទ្យដែលសង់នៅស្រុកខ្មែរដូចនៅស្រុកយួនបានន័យថាទឹកដីរបស់គេនៅ រហូតដល់មន្ទីពេទ្យចារីនៅស្រុកខ្មែរ។