ភ្នំពេញៈ យុវវ័យខ្មែរភាគច្រើននាំគ្នានិយមសម្លៀកបំពាក់ស្ទីលកូរ៉េ និងខោអាវនាំចូលពីថៃ ចិន និងហុងកុង។
Thursday, 23 August 2012
ឈឹម ស្រីនាង
ភ្នំពេញ ប៉ុស្តិ៍
ម៉ូដសម្លៀកបំពាក់របស់លោក ហុង ឈិន មានលក្ខណៈសាមញ្ញ តែទាន់សម័យសម្រាប់យុវវ័យ។ រូបថត សហការី
ថ្វីដ្បិតតែសម្លៀកបំពាក់នាំចូលមកពីបរទេសនេះមានតម្លៃមិនសូវជា ថ្លៃប៉ុន្មានមែន ប៉ុន្តែអ្នកច្នៃម៉ូដវ័យក្មេង ហុង ឈិន តែងគិតថា យុវវ័យខ្មែរនៅតែត្រូវការទីផ្សារសម្លៀកបំពាក់ច្នៃម៉ូដក្នុងស្រុក។
ដូច្នេះហើយទើប លោក ឈិន បានផ្ដួចផ្ដើមគំនិតដ៏ច្នៃប្រឌិតមួយ នោះគឺការបង្កើតម៉ាកសញ្ញាផ្ទាល់ខ្លួន និងច្នៃម៉ូដផ្ទាល់ដៃដើម្បីតម្រូវទីផ្សារយុវវ័យ ជាជាងឲ្យពួកគេគ្មានជម្រើស ហើយចាប់យកតែខោអាវមកពីក្រៅប្រទេសនោះ។
ស្ថិតក្នុងវ័យប្រមាណ២០ឆ្នាំ ហុង ឈិន ជិតបញ្ចប់ការសិក្សាថ្នាក់ច្នៃម៉ូដសម្លៀកបំពាក់ពីសាកលវិទ្យាល័យលីមកុកវីង ហើយជាមួយនឹងមហិច្ឆតាបង្កើតម៉ាកសញ្ញាសម្លៀកបំពាក់ខ្មែរ ដើម្បីឲ្យយុវវ័យទាំងឡាយមានមោទនភាពក្នុងការជ្រើសរើសសម្លៀក បំពាក់ដែលច្នៃម៉ូដដោយកូនខ្មែរដូចគ្នា។
តាមការពិតទៅ អ្នកច្នៃម៉ូដរូបនេះចាប់ផ្ដើមក្ដីសុបិនក្នុងវិស័យច្នៃម៉ូដរបស់ ខ្លួនតាំងពីឆ្នាំ២០១០មកម្ល៉េះ។ ជាទូទៅ ម៉ូដដែលលោក ហុង ឈិន បង្កើតឡើង មានលក្ខណៈសាមញ្ញ ប៉ុន្តែទាន់សម័យ ដែលមានរូបលោកផ្ទាល់ ជាអ្នកគូសម៉ូដ អ្នកវាស់វែង កាត់ក្រណាត់ និងដេប៉ាក់។ ប៉ុន្តែសព្វថ្ងៃ លោកបានប្រគល់ការងារដេរសម្លៀកបំពាក់នេះទៅឲ្យបុគ្គលិកហើយដោយសារ តែភាពមមាញឹក និងតម្រូវការមានកំណើនជាលំដាប់។
ស្នាដៃរបស់លោក ហុង ឈិន មានលក់ដូចជានៅ ហាង Brono និង Wow shop ដែលជាហាងលក់សម្លៀកបំពាក់បុរស។ ខោអាវទាំងនោះរួមមានប្រភេទជាអាវយឺត អាវក្រណាត់ ខោ អាវពាក់ក្រៅ និងខោខ្លីជាដើម។
ចំពោះតម្លៃវិញ អាវយឺតគឺចាប់ពី៨ដល់១៤ដុល្លារ និងអាវក្រណាត់ ១៣ដល់២០ដុល្លារ អាស្រ័យទៅតាមម៉ូដ និងគុណភាពសាច់ក្រណាត់។
បច្ចុប្បន្ន ស្នាដៃរបស់លោក ហុង ឈិន ទទួលបានការគាំទ្រច្រើនពីយុវវ័យនៅភ្នំពេញ ហើយលោកក៏គ្រោងនឹងនាំចេញទៅលក់នៅវៀតណាម និងប្រទេសដទៃទៀតផងដែរ៕
ហាងរបស់គាត់នៅម្តុំណាដែរណ៎?
where your shop?