ភ្នំពេញ: សម្តេចនាយករដ្ឋមន្ត្រី ហ៊ុន សែន បានដឹកនាំគណៈប្រតិភូជាន់ខ្ពស់នៃរាជរដ្ឋាភិបាលកម្ពុជា អញ្ជើញតាមយន្តហោះពិសេស Cambodia Angkor Air ចាកចេញពីព្រលានយន្តហោះអន្តរជាតិភ្នំពេញ កាលពីម៉ោង ៨ ព្រឹក ថ្ងៃសៅរ៍ ទី២២ ខែកញ្ញា ឆ្នាំ២០១២ ដើម្បីទៅចូលរួមព្រះរាជពិធីអភិសេក ព្រះរាជបុត្រីរបស់ស្តេចព្រុយណេ។
ថ្ងៃទី 22 កញ្ញា 2012
ដោយ: សុខ ភក្តី
CEN
សេចក្តីជូនព័ត៌មាន របស់ក្រសួងការបរទេស កាលពីថ្ងៃទី១៩ ខែកញ្ញា ឆ្នាំ២០១២ បង្ហាញថា តាមការអញ្ជើញរបស់ព្រះករុណា ស៊ុលតង់ ហាជិ ហាសាណាល់ បុកគៀស មូអ៊ីហ្សាឌីន វ៉ាដឌុលឡាស់ ស៊ូតង់ ដាន យ៉ាង-ឌី ផឿទាន់ ( Sutan Haji Hassanal Bolkiah Mu’izzaddin Waddulah Sultan Dan Yang-Di Pertuan ) នៃប្រទេសព្រុយណេ ដារូសាឡឹម សម្តេចអគ្គមហាសេនាបតីតេជោ ហ៊ុន សែន នាយករដេ្ឋមន្ត្រី នៃព្រះរាជាណាចក្រកម្ពុជា ត្រូវដឹកនាំគណៈប្រតិភូជាន់ខ្ពស់ អញ្ជើញទៅចូលរួមព្រះរាជពិធីអភិសេកព្រះរាជបុត្រី ហាចាសហាហ្វីហ្សា ស៊ូរូរុល បុលគៀស ( Princess Hajah Hafizah Surural Bolkiah ) ជាមួយនិង ផិនហ្គីរ៉ាន់ ហាជិ មូហាម៉ាដ រុសាយនី ប៊ិន ផិនហ្គីរ៉ាន់ បណ្ឌិត ហាជិ មូហាម៉ាដ យ៉ាគុប ( Pengiran Haji Muhammad Rusaini Bin Pengiran Dr. Haji Mohd Yakub ) ចាប់ពីថ្ងៃទី២២ ដល់ថ្ងៃទី២៤ ខែកញ្ញា ឆ្នាំ២០១២ នៅប្រទេសព្រុយណេ ដារូសាឡឹម។
កាសែតប្រទេសព្រុយណេ បានរាយការណ៍ថា ចាប់តាំងពីថ្ងៃអាទិត្យ ទី១៦ ខែកញ្ញា ឆ្នាំ២០១២ ក្នុងព្រះរាជវាំងស្តេចព្រុយណេ បានចាប់ផ្តើមរៀបព្រះរាជពិធីអភិសេកព្រះរាជបុត្រី តាមបែបប្រពៃណីអ៊ិស្លាម នៃរាជវង្សរបស់ប្រទេសព្រុយណេ។
ព្រះរាជពិធីរៀបអភិសេកព្រះរាជបុត្រីស្តេចព្រុយណេ ត្រូវបន្តតាមបែបប្រពៃណី ដោយមានការយាង និងអញ្ជើញចូលរួមពីព្រះរាជវង្សានុវង្ស ប្រមុខរដ្ឋ នាយករដ្ឋមន្ត្រី អ្នកការទូត រួមទាំងភ្ញៀវកិត្តិយសជាច្រើនផ្សេងទៀត មកពីគ្រប់ទិសទី ជុំវិញពិភពលោក។
កាសែត The Brunei Times បានរាយការណ៍ កាលពីថ្ងៃទី១៨ ខែកញ្ញា ឆ្នាំ២០១២ ថា ដើម្បីសាទរព្រះរាជពិធីអភិសេកព្រះរាជបុត្រីស្តេចព្រុយណេ ក្នុងរយៈពេលប៉ុន្មានថ្ងៃនេះ កម្មវិធីវប្បធម៌ប្រពៃណីជាច្រើន ត្រូវបានធ្វើឡើងយ៉ាងអធិកអធមតាមទីក្រុង ស្រុកទីប្រជុំជន សម្រាប់មហាជនចូលរួមកំសាន្តសប្បាយផងដែរ។
កាសែតបានរាយការណ៍ថា ដើម្បីចូលរួមសាទរដល់ព្រះរាជពិធីអភិសេកព្រះរាជបុត្រីរបស់ស្តេចព្រុយណេ ក៏មានការបើកវេទិកាប្រឡងចម្រៀងជាគូរវាងស្វាមីភរិយាជាច្រើនគូផងដែរ។
កម្មវិធីតាមបែបប្រពៃណីនោះ នឹងបន្តនៅក្នុងទីក្រុង ចាប់ពីម៉ោង ៨ ដល់ម៉ោង ១០ យប់ រហូតដល់ថ្ងៃទី២៤ ខែកញ្ញា ឆ្នាំ២០១២ ដែលជាថ្ងៃបញ្ចប់នៃព្រះរាជពិធីអភិសេកព្រះរាជបុត្រីស្តេចព្រុយណេ៕ S
មេដឹកនាំយួន (ហូ ជីមិញ) សុខចិត្តស្លាប់ខ្លួនដើម្បីជាតិ,
ឯមេដឹកនាំខ្មែរសុខចិត្តស្លាប់ជាតិ ដើម្បីបានខ្លួនរស់,….!