ភ្នំពេញ: តារា​ខ្លះ​ចង់​ទៅ​ច្រៀង​នៅ​ឯ​ក្រៅប្រទេស ទោះបី​ដឹងថា ធ្លាក់​ថ្លៃ​ក៏ដោយ​។ ខ្លះ​សុខចិត្ត​ធីប​ស្នេហា​ទុក​សិន ហើយ​សិល្បករ​ខ្លះ​ល្បី​មួយ​ភ្លែត ក៏​បាត់​ឈឹង​ក៏មាន និង​សិល្បករ​ផ្សេងទៀត ប្រឹងប្រែង​បង្ហាញ​ម៉ូត ឲ្យ​កាន់តែ​រីក​ធំ​ធាត់​ជាង​មុន​។ គិត​ទៅ​ពី​មួយ​សប្តាហ៍ ទៅ​មួយ​សប្តាហ៍ តែងតែ​មាន​រឿង​រ៉ាង​អំពី​តារា​កម្ពុជា មិនចេះ​រីងស្ងួត​ឡើយ​។​

អ្នកចម្រៀង មាស សុខសោភា ដែលកំពុងជួបវិបត្តិស្នេហា នឹងបុរសខ្មែរ សញ្ជាតិកាណាដា

ថ្ងៃទី 14 តុលា 2012
ដោយ: វឿន សាវុធ​
CEN

សិល្បករ​បាន​នាំគ្នា​និយាយ​ពី​មាត់​មួយ​ទៅ​មាត់​មួយ​ថា ឥឡូវ ការចេញ​ទៅ​ច្រៀង​នៅ​អាមេរិក រក​លុយ​បាន​តិច​ជាង​មុន​។ ពួកគេ​បាន​លើក​ហេតុផល​ថា នោះ​ដោយសារតែ​មាន​តារា​ចម្រៀង កាន់តែច្រើន បាន​មានឱកាស​ទៅ​សម្តែង​នៅ​ទីនោះ​។​

ទោះបីជា​យ៉ាងនេះក្តី ពៅ សុជាតា ត្រូវបាន​គេ​រាយការណ៍​ថា មាន​គម្រោង​នឹង​ទៅ​ប្រមូល​ប្រាក់​ឲ្យបាន​ច្រើន ពេល​ទៅ​សម្តែង​នៅ​អាមេរិក នៅពេល​ខាងមុខ​នេះ​។

មាន​ប្រភព​ខ្លះ បាន​ប្រាប់ឲ្យដឹង​ថា មួយ​រយៈពេល​ចុងក្រោយ​នេះ បន្ទាប់​ពី​អាមេរិក បើកចំហ ឲ្យ​តារា​ចម្រៀង​ទៅ​ច្រៀង​នៅ​ទីនោះ មាន​អ្នកចម្រៀង​ជាច្រើនរូប បាន​ត្អូញត្អែរថា ពុំ​សូវ​រក​ប្រាក់​បានទេ​។​

ដោយឡែក លោក ម៉ែន និមល​រតន៍ ដែល​ជា​នាយក​គ្រប់គ្រង​ក្រុមហ៊ុន​បង្ហាញ​ម៉ូត Sun Super Model Cambodia និង​ជា​អតីត​អ្នក​ជាប់​ចំណាត់ថ្នាក់​លេខ​១ ផ្នែក​បុរស Model Look 2005 បាន​ប្រាប់ថា ការបង្ហាញ​ម៉ូត កំពុងតែ​ក្លាយទៅជា​ជំនួញ​មួយ មាន​ការរីក​ធំធាត់​នៅក្នុង​ប្រទេស​កម្ពុជា​។​

លោក​ ម៉ែន និមល​រតន៍ បាន​និយាយថា យុវជន និង​យុវតី​កម្ពុជា កាន់តែ​មាន​ចំណាប់​អារម្មណ៍​ជាង​មុន​។ ពេល​ដែល​មាន​ការបើក​វគ្គ​បណ្តុះបណ្តាល​ម្តងៗ គឺ​សង្កេតឃើញ​ថា មាន​មនុស្ស​កាន់តែ​ច្រើន​ជាង​មុន មាន​ការចាប់អារម្មណ៍​ចង់​ក្លាយជា អ្នក​បង្ហាញ​ម៉ូត​នេះ​។​

​ងាក​មក​មើល​តារាចម្រៀង​ដ៏​មាន​ប្រជាប្រិយភាព មាស សុខ​សោភា វិញ​ម្តង ទោះបី​បាន​ជួប​វិបត្តិ​ស្នេហ៍ ជាមួយ​បុរស​ខ្មែរ​សញ្ជាតិ​កាណាដា​យ៉ាងណាក្តី តែ​ឥឡូវ នាង​មិន​បាន​ធ្វើឲ្យ​រឿងរ៉ា​វ​ជូរចត់ ក្នុង​ជីវិត​ស្នេហា​មួយ​នេះ ធ្វើឲ្យ​នាង​ងងឹតផ្លូវ​ការងារឡើយ​។​
ឥឡូវ​នាង​កំពុង​តែ​សម្រុក​ធ្វើ​យ៉ាងណា ឲ្យ​ល្បីល្បាញ នៅ​ក្នុង​ពិភព​សិល្បៈ ដូច​ភាព​លេចធ្លោ ដែល​ធ្លាប់​ទទួលបាន​ដល់​កំពូល នា​ឆ្នាំ​ពី​២០០៨ និង​ឆ្នាំ​២០០៩៕​